laophatthananewspaper: ນຳສະເໜີແນວທາງໃໝ່ໃນການຄຸ້ມຄອງປ່າໄມ້ຕໍ່ກອງປະຊຸມປ່າໄມ້ປະຈຳພາກພື້ນອາຊີ-ປາຊີຟິກທີ່ຟີລິບປິນ

ລັດຖະບານລາວຮ່ວມກັບສະມາຄົມອຸດສາຫະກຳປຸງແຕ່ງໄມ້ລາວ ໄດ້ເຜີຍແຜ່ໝາກຜົນກ່ຽວກັບແນວທາງໃໝ່ເພື່ອໃຊ້ເຂົ້າໃນການປັບປຸງການຄຸ້ມຄອງປ່າໄມ້ໃນປະເທດລາວ ເຊິ່ງເອີ້ນວ່າ: “ການສຶກສາການສັງລວມຄວາມຮູ້ດ້ານກົດໝາຍປ່າໄມ້” ໃນກອງປະຊຸມປ່າໄມ້ປະຈຳພາກພື້ນອາຊີ-ປາຊີຟິກ (Asia-Pacific Forestry Week) ໃນລະຫວ່າງວັນທີ 22-26 ກຸມພາ 2016 ທີ່ປະເທດຟີລິບປິນ ເຊິ່ງເປັນກອງປະຊຸມທີ່ສຳຄັນກ່ຽວກັບວຽກງານປ່າໄມ້ໃຫຍ່ທີ່ສຸດໃນພາກພື້ນ.

ທ່ານ ຊູຊາດ ໄຊຍະກຸມມານ ຫົວໜ້າກົມປ່າໄມ້ ກະຊວງກະສິກຳ ແລະ ປ່າໄມ້ຂອງລາວ ໄດ້ກ່າວວ່າ: ໝາກຜົນທີ່ສຳຄັນໜຶ່ງທີ່ໄດ້ນຳສະເໜີໃນກອງປະຊຸມຄັ້ງນີ້ແມ່ນການສຶກສາການສັງລວມຄວາມຮູ້ດ້ານກົດໝາຍປ່າໄມ້ ເຊິ່ງເປັນວຽກງານທີ່ສັບຊ້ອນກ່ຽວຂ້ອງກັບຂະແໜງປ່າໄມ້ໃນລາວ ຕະຫລອດຮອດຕ່ອງໂສ້ການສະໜອງຜະລິດຕະພັນໄມ້ ເຊິ່ງເລີ່ມຈາກການຈັດປະເພດພື້ນທີ່ປ່າ, ການແບ່ງເຂດແດນ, ການເກັບກຳຂໍ້ມູນ, ການອະນຸມັດໂກຕ້າ, ການຄຸ້ມຄອງ ແລະ ການຕັດໄມ້, ການຂົນສົ່ງ, ການປຸງແຕ່ງ ແລະ ການສົ່ງອອກ. ການສັງລວມນິຕິກຳກ່ຽວກັບວຽກງານປ່າໄມ້ນີ້ຈະສາມາດຊ່ວຍເຂົ້າໃນການຮ່າງນິຍາມຄວາມຖືກຕ້ອງທາງກົດໝາຍຂອງໄມ້ ເຊິ່ງເປັນສ່ວນສຳຄັນຂອງແຜນງານການຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ (FLEGT VPA) ເຊິ່ງລັດຖະບານລາວພວມເອົາໃຈໃສ່ໃນການຈັດຕັ້ງປະຕິບັດ.

ທ່ານ ທອງສະຫວັນ ສຸລິຍະມາດ ປະທານສະມາຄົມອຸດສາຫະກຳປຸງແຕ່ງໄມ້ລາວ ໄດ້ກ່າວໃນກອງປະຊຸມດັ່ງກ່າວວ່າ: ລັດຖະບານລາວໄດ້ເລັ່ງເຫັນຄວາມສຳຄັນຂອງພາກເອກະຊົນໃນການເປັນໜ່ວຍງານຕົ້ນຕໍ ເພື່ອພັດທະນາຂະແໜງອຸດສາຫະກຳປຸງແຕ່ງໄມ້ ແລະ ມີພາລະບົດບາດສຳຄັນໃນແຜນງານ FLEGT VPA ເຊິ່ງເປັນແນວຄິດລິເລີ່ມໃໝ່ ເພື່ອຮັບປະກັນການສະໜອງໄມ້ທີ່ຖືກຕ້ອງຕາມກົດໝາຍໃຫ້ຂະແໜງອຸດສາຫະກຳຢ່າງພຽງພໍ ແລະ ຮັບປະກັນການປັບປຸງການຄຸ້ມຄອງປ່າໄມ້ ແລະ ການບໍລິຫານຈັດການປ່າໄມ້ແບບຍືນຍົງໃນລາວ. ນອກຈາກນີ້, ຄະນະຜູ້ແທນຈາກປະເທດລາວໄດ້ລາຍງານຄວາມຄືບໜ້າການເພີ່ມຂຶ້ນຂອງປ່າໄມ້ປົກຫຸ້ມໃນລະຫວ່າງປີ 2010-2015 ເຊິ່ງເປັນໝາກຜົນຈາກການຫລຸດຜ່ອນທາງດ້ານການຕັດໄມ້ ແລະ ການເພີ່ມຂຶ້ນຂອງການຟື້ນຟູປ່າ ໂດຍສະເພາະໃນເຂດທີ່ມີການຕັດໄມ້, ພ້ອມທັງການປະຕິບັດແນວທາງການມີສ່ວນຮ່ວມຂອງພາກສ່ວນຕ່າງໆ, ການປົກປັກຮັກສາລະບົບນິເວດວິທະຍາ ແລະ ການສ້າງຜົນປະໂຫຍດຕໍ່ການດຳລົງຊີວິດໃນການຟື້ນຟູປ່າ.

ທ່ານ ຄຳພຸດ ພັນດານຸວົງ ຫົວໜ້າກົມກວດກາປ່າໄມ້ ກະຊວງກະສິກຳ ແລະ ປ່າໄມ້ ກ່າວວ່າ: ສປປ ລາວ ພວມອອກແຮງຈັດຕັ້ງປະຕິບັດວຽກງານ ເພື່ອສ້າງຄວາມເຂັ້ມແຂງໃຫ້ແກ່ການຄຸ້ມຄອງປ່າໄມ້ໃນປະເທດ. ແຜນງານການຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ ແລະ ຂໍ້ຕົກລົງການເຂົ້າເປັນຄູ່ຮ່ວມສັນຍາການຄ້າແບບສະໝັກໃຈ (FLEGT VPA) ແມ່ນຂີດໝາຍອັນສຳຄັນທີ່ປະກອບສ່ວນເຂົ້າໃນວຽກງານຄຸ້ມຄອງປ່າໄມ້, ການຄຸ້ມຄອງປ່າໄມ້ທີ່ດີນັ້ນຈະຊ່ວຍໃຫ້ພວກເຮົາສາມາດປົກປັກຮັກສາປ່າໄມ້ ເພື່ອອະນາຄົດຂອງຄົນຮຸ້ນໃໝ່, ເສີມຂະຫຍາຍໂອກາດໃຫ້ແກ່ຂະແໜງການປຸງແຕ່ງໄມ້ໃນປະເທດ, ສ້າງມູນຄ່າເພີ່ມໃຫ້ແກ່ຜະລິດຕະພັນໄມ້, ສ້າງໂອກາດໃນການຈ້າງງານໃນຂະແໜງປ່າໄມ້ ແລະ ເປີດກວ້າງໂອກາດທາງການຕະຫລາດທີ່ໃຫຍ່ຂຶ້ນກວ່າເກົ່າ. ພາຍຫລັງທີ່ແຜນງານການຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ ແລະ ຂໍ້ຕົກລົງການເຂົ້າເປັນຄູ່ຮ່ວມສັນຍາການຄ້າແບບສະໝັກໃຈ ໄດ້ຖືກຈັດຕັ້ງປະຕິບັດແລ້ວ, ຜະລິດຕະພັນໄມ້ຂອງລາວກໍຈະສາມາດຕອບສະໜອງຕາມກົດລະບຽບວ່າດ້ວຍໄມ້ຂອງສະຫະພາບເອີຣົບ ເຊິ່ງຈະເປັນການສົ່ງເສີມການສົ່ງອອກໄມ້ທີ່ຖືກກົດໝາຍໄປຍັງຕະຫລາດຂອງສະຫະພາບເອີຣົບ ແລະ ປະເທດຄູ່ຮ່ວມການຄ້າຂອງສະຫະພາບເອີຣົບ. ພ້ອມກັນນັ້ນ ບັນດາບໍລິສັດປຸງແຕ່ງໄມ້ໃນລາວກໍຈະສາມາດເຂົ້າເຖິງຕະຫລາດອື່ນໆໄດ້ງ່າຍຂຶ້ນ ເປັນຕົ້ນເຂົ້າເຖິງຕະຫລາດຂອງບັນດາປະເທດອາຊຽນ, ສະຫະລັດອາເມລິກາ, ອົດສະຕຣາລີ, ນິວຊີແລນ ແລະ ຍີ່ປຸ່ນ.

ກອງປະຊຸມປ່າໄມ້ປະຈຳພາກພື້ນອາຊີ-ປາຊີຟິກ ແມ່ນຈັດຂຶ້ນທຸກ 4 ປີ, ແມ່ນເວທີຂອງວຽກງານປ່າໄມ້ທີ່ໃຫຍ່ ແລະ ສຳຄັນທີ່ສຸດໃນພາກພື້ນ ແລະ ມີຜູ້ເຂົ້າຮ່ວມຫລາຍກວ່າພັນຄົນ ເຊິ່ງເປັນຕົວແທນຈາກພາກລັດໃນຂະແໜງປ່າໄມ້, ຊັບພະຍາກອນທຳມະຊາດ ແລະ ບັນດາພາກສ່ວນທີ່ມີສ່ວນຮ່ວມຕ່າງໆເຊັ່ນ: ໜ່ວຍງານກຳນົດ ແລະ ອອກລະບຽບນະໂຍບາຍ, ຊ່ຽວຊານ, ສະຖາບັນການສຶກສາ, ສະຖາບັນການຄົ້ນຄວ້າ, ອົງການຈັດຕັ້ງທີ່ບໍ່ຂຶ້ນກັບລັດຖະບານ ແລະ ພາກເອກະຊົນຈາກຫລາຍກວ່າ 30 ປະເທດ ເພື່ອຕີລາຄາການພັດທະນາຕ່າງໆທາງດ້ານຕະຫລາດ ແລະ ການຄ້າໄມ້ສາກົນ ແລະ ເພື່ອແກ້ໄຂບັນຫາຕ່າງໆທີ່ກ່ຽວຂ້ອງກັບທ່າອ່ຽງ ແລະ ອະນາຄົດຂອງຕະຫລາດ ແລະ ການຄ້າໄມ້ສາກົນໃນຂົງເຂດການຄ້າໄມ້ແບບຍືນຍົງ ແລະ ແນວທາງການຮ່າງນິຍາມຄວາມຖືກຕ້ອງທາງກົດໝາຍຂອງໄມ້ ແລະ ການຂະຫຍາຍຕົວໃນອະນາຄົດພາຍໃນພາກພື້ນ.

ສະຫະພາບເອີຣົບ (EU) ໄດ້ລິເລີ່ມແຜນງານການຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ (FLEGT) ເພື່ອສະກັດກັ້ນການຂຸດຄົ້ນໄມ້ທີ່ຜິດກົດໝາຍໃນທົ່ວໂລກ. ພ້ອມນັ້ນ EU ຍັງໄດ້ກະກຽມການເຈລະຈາຂໍ້ຕົກລົງການເຂົ້າເປັນຄູ່ຮ່ວມສັນຍາການຄ້າແບບສະໝັກໃຈ (VPA) ກັບບັນດາປະເທດຜະລິດໄມ້. ຂໍ້ຕົກລົງ VPA ແມ່ນຂໍ້ຕົກລົງການຄ້າສາກົນ ເຊິ່ງມີຈຸດປະສົງເພື່ອຫລຸດຜ່ອນການຕັດໄມ້ທີ່ຜິດກົດໝາຍ ແລະ ສົ່ງເສີມການຄ້າໄມ້ທີ່ຖືກກົດໝາຍ.

ສປປ ລາວ ແມ່ນໜຶ່ງໃນບັນດາປະເທດທີ່ເລີ່ມເຈລະຈາຂໍ້ຕົກລົງການເຂົ້າເປັນຄູ່ຮ່ວມສັນຍາດັ່ງກ່າວກັບສະຫະພາບເອີຣົບ ເຊິ່ງໄດ້ຮັບການຊ່ວຍເຫລືອຈາກໂຄງການ GIZ ການສະໜັບສະໜູນແຜນງານການຈັດຕັ້ງປະຕິບັດກົດໝາຍໄມ້, ການຄຸ້ມຄອງ ແລະ ການຄ້າໄມ້ ລະຫວ່າງ ສປປ ລາວ ກັບສະຫະພາບເອີຣົບ (ProFLEGT).

ProFLEGT ແມ່ນໂຄງການລິເລີ່ມຮ່ວມກັນຂອງລັດຖະບານລາວ ແລະ ການຮ່ວມມືການພັດທະນາຂອງເຢຍລະມັນ ເຊິ່ງເປັນໂຄງການທີ່ເຮັດວຽກຮ່ວມກັບກະຊວງກະສິກຳ ແລະ ປ່າໄມ້ (ໂດຍຜ່ານຫ້ອງການແຜນງານ FLEGT Standing Office ພາຍໃຕ້ການຊີ້ນຳຂອງກົມກວດກາປ່າໄມ້, DOFI), ກະຊວງອຸດສາຫະກຳ ແລະ ການຄ້າ ແລະ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ລວມທັງອົງການຈັດຕັ້ງອື່ນໆຂອງລັດ, ອົງການຈັດຕັ້ງທາງສັງຄົມ, ສະຖາບັນການສຶກສາ ແລະ ອຸດສາຫະກຳປຸງແຕ່ງໄມ້.