ກົມຄຸ້ມຄອງສະຖາບັນການເງິນ
ທະນາຄານແຫ່ງ ສປປ ລາວ ( ທຫລ ) ມີພາລະບົດບາດ ໜ້າທີ່ໃນການຄຸ້ມຄອງ, ຕິດຕາມ ແລະ
ກວດກາວຽກງານຄຸ້ມຄອງສະຖາບັນການເງິນ,
ເປັນເສນາທິການໃຫ້ແກ່ຄະນະພັກ-ຄະນະຜູ້ວ່າການ ທຫລ ໃນການຈັດຕັ້ງປະຕິບັດການຄຸ້ມຄອງ ແລະ ພັດທະນາສະຖາບັນການເງິນໃນທົ່ວປະເທດໃຫ້ດໍາເນີນໄປພາຍໃຕ້ລະບຽບ ກົດໝາຍຂອງບ້ານເມືອງ
ແນໃສ່ເຮັດໃຫ້ປະ ຊາຊົນບັນດາເຜົ່າ ໄດ້ເຂົ້າເຖິງແຫຼ່ງທຶນຢ່າງງ່າຍດາຍ
ປະກອບສ່ວນເຂົ້າໃນການພັດທະນາເສດ ຖະກິດ-ສັງຄົມຂອງຊາດ ຕາມແນວທາງຂອງພັກ ແລະ ລັດຖະບານ.
ທ່ານ ດຣ ອາຄົມ
ປຣະເສີດ ຄະນະພັກ-ຫົວໜ້າກົມຄຸ້ມຄອງສະຖາບັນການເງິນ ໄດ້ຢືນຢັນວ່າ: ໃນປີ 2015 ສະຖາບັນການ ເງິນຈຸລະພາກທີ່ຂຶ້ນທະບຽນນໍາ ທຫລ ມີທັງໝົດ 141 ແຫ່ງ ເພີ່ມຂຶ້ນ 17 ແຫ່ງ
ເມື່ອທຽບໃສ່ປີ 2014,
ສະຖາບັນການເງິນຈຸລະພາກທີ່ຮັບເງິນຝາກ 14 ແຫ່ງ
ແລະສະຖາບັນການເງິນຈຸລະພາກທີ່ບໍ່ຮັບເງິນຝາກ 39 ແຫ່ງ, ສະຫະກອນສິນເຊື່ອ ແລະ ເງິນຝາກປະຢັດ 32 ແຫ່ງ, ບໍລິສັດເຊົ່າສິນເຊື່ອ 21 ແຫ່ງ, ໂຮງຊວດຈໍາ
28 ແຫ່ງ, ບໍລິສັດຕົວແທນໂອນເງິນດ່ວນ 5
ແຫ່ງ, ສະຖາບັນເງິນຝາກປະຫຍັດໄປສະນີລາວ 1 ແຫ່ງ ແລະ ອອມຊັບພະນັກງານ 2 ແຫ່ງ.
ໃນປີ 2015 ຜ່ານມາ,
ກົມຄຸ້ມຄອງສະຖາບັນການເງິນ ໄດ້ມີການເຄື່ອນໄຫວຢ່າງຕັ້ງໜ້າ ໂດຍສຸມໃສ່ກວດກາການປະຕິບັດລະ
ບຽບການຮັກສາຄວາມໝັ້ນຄົງຂອງສະຖາບັນການເງິນໂດຍນໍາໃຊ້ຫລັກການ CAMELs ເປັນບ່ອນອີງ, ລະບົບການກວດກາປະຈຸບັນປະກອບດ້ວຍການກວດກາກັບທີ່ປະຈໍາປີ,
ການກວດກາກັບທີ່ແບບສຸກເສີນ ແລະ ກວດກາທາງເອກະສານ, ຜ່ານການຄຸ້ມຄອງ ກວດ ກາ
ເຫັນວ່າລະບົບສະຖາບັນການເງິນ ມີຄວາມເຕີບໃຫຍ່ເຂັ້ມແຂງທັງດ້ານປະລິມານ ແລະ ຄຸນນະພາບ
ໂດຍໃນປີ 2015 ມີຍອດຊັບສິນທັງໝົດ 494,76 ຕື້ກ່ວາກີບເພີ່ມຂຶ້ນ 56%, ໜີ້ສິນທັງໝົດ 379,36 ຕື້ກ່ວາກີບເພີ່ມຂຶ້ນ 64%, ທຶນທັງໝົດ 99,82 ຕື້ກ່ວາກີບເພີ່ມຂຶ້ນ 36,53%, ຍອດເຫຼືອເງີນຝາກທັງໝົດ 667,67 ຕື້ກ່ວາກີບ ເພີ່ມຂຶ້ນ 62,41%, ຍອດເຫຼືອເງີນກູ້ທັງໝົດ 319,35 ຕື້ ກ່ວາກີບ ເພີ່ມຂຶ້ນ 35,25% ແລະ ກຳໄລ-ຂາດທຶນທັງໝົດ 13,23 ຕື້ກ່ວາກີບ ຫຼຸດລົງ 20,25% ເມື່ອທຽບໃສ່ປີ 2014.
ທ່ານ ຫົວໜ້າກົມຄຸ້ມຄອງສະຖາບັນການເງິນ ໄດ້ກາຍວ່າ: ໃນໄລຍະດຽວກັນກໍໄດ້ມີການກວດກາ ແລະ ຄຸ້ມຄອງບັນດາສະຖາບັນການເງິນທັງໝົດ 6 ຮູບແບບ ແລະ
ມີມາດຕະການຈຳນວນໜຶ່ງ
ປະຕິບັດຕໍ່ບັນດາສະຖາບັນການເງິນທີ່ດຳເນີນທຸລະກິດບໍ່ສອດຄອງກັບລະບຽບການຄຸ້ມຄອງສະຖາບັນການເງິນ
ໂດຍໄດ້ອອກແຈ້ງການຫາບັນດາສະຖາບັນການເງິນທັງໝົດຈຳນວນ 58 ຄັ້ງ, ສຳ
ເລັດການກວດກາສຸກເສີນສະຖາບັນການເງິນຈຸລະພາກທັງໝົດ 5 ແຫ່ງ, ສຳເລັດການລາຍງານກ່ຽວກັບບັນດາໂຮງຊວດຈຳທີ່ດຳເນີນທຸລະກິດບໍ່ຖືກຕ້ອງກັບດຳລັດ ແລະ
ບົດແນະນຳໃນການຈັດຕັ້ງປະຕິ ບັດ 3 ແຫ່ງ,
ຕິດຕາມການແກ້ໄຂຂໍ້ຄົງຄ້າງຂອງສະຖາບັນການເງິນ 17 ແຫ່ງ, ທົ່ວລະບົບສະຖາບັນການເງິນມີໜີ້ NPLs ກວມ 5%
ຂອງຍອດສິນເຊື່ອທົ່ວລະບົບ, ນອກນີ້ ສະຖາບັນການເງິນໄດ້ປະຕິ ບັດພາລະບົດບາດສໍາຄັນໃນການປະກອບສ່ວນສະໜອງແຫຼ່ງທຶນໃຫ້ແກ່ປະຊາຊົນເພື່ອທໍາການຜະລິດ
ສ້າງເສດຖະກິດຄອບຄົວປັບປຸງຊີວິດການເປັນຢູ່ຂອງປະຊາຊົນຜູ້ທຸກຍາກໃຫ້ດີຂຶ້ນ,
ຫັນການເງິນນອກລະບົບເຂົ້າມາເຄື່ອນໄຫວໃນລະບົບຫຼາຍຂຶ້ນກວ່າເກົ່າ.
ເຖິງຢ່າງໃດກໍຕາມ
ຄຽງຄູ່ກັບຂໍ້ສະດວກດັ່ງກ່າວມາຂ້າງເທິງນັ້ນ ກໍຍັງພົບກັບຄວາມຫຍຸ້ງຍາກຈໍານວນໜຶ່ງ ແລະ
ສິ່ງທ້າທາຍຕົ້ນຕໍກໍແມ່ນຄວາມສາມາດໃນການຄຸ້ມຄອງບໍ່ສົມຄູ່ກັບຈັງຫວະການເພີ່ມຂຶ້ນຂອງສະຖາບັນການເງິນ
ເຊິ່ງສະແດງອອກໃນດ້ານຄວາມຮູ້-ຄວາມສາມາດ ແລະ
ປະສົບການຂອງພະນັກງານຄຸ້ມຄອງ-ກວດກາຍັງມີຈໍາກັດ ສ່ວນຫຼາຍເປັນພະນັກງານໜຸ່ມນ້ອຍ,
ທາງດ້ານເຄື່ອງມືໃນການຄຸ້ມຄອງສະຖາບັນການເງິນທີ່ໃຊ້ໃນປະຈຸບັນ ໂດຍສະເພາະບັນດາດໍາລັດ,
ຂໍ້ກໍານົດ, ກົດລະບຽບຂອງສະຖາບັນການເງິນຍັງບໍ່ທັນພຽງພໍ
ແລະ ສອດຄ່ອງກັບສະພາບຄວາມເປັນຈິງ, ການສ້າງ ແລະ
ປັບປຸງປ່ຽນແປງມີລັກສະນະຊັກຊ້າ.
ພ້ອມກັນນັ້ນ ມີບາງສະຖາບັນຍັງບໍ່ມີສະຕິຕໍ່ການຈັດຕັ້ງ,
ບໍ່ປະຕິບັດຕາມດໍາລັດ, ຂໍ້ກໍານົດ, ກົດລະບຽບ,
ບໍ່ເອົາໃຈໃສ່ແກ້ໄຂບັນດາຂໍ້ຄົງຄ້າງ
ຈຶ່ງເຮັດໃຫ້ບໍ່ສາມາດປະຕິບັດອັດຕາສ່ວນຕ່າງໆຕາມມາດຖານທີ່ ທຫລ ວາງອອກ, ຄະນະກວດກາພາຍໃນປະຕິບັດໜ້າທີ່ຂອງຕົນບໍ່ເຕັມສ່ວນ
ຍັງຢູ່ພາຍໃຕ້ການຊີ້ນຳຂອງຜູ້ອຳນວຍການໃນການຕິດຕາມກວດກາ
ທຸກການເຄື່ອນໄຫວຂອງສະຖາບັນ, ສະເພາະແຕ່ປີ 2015 ມີສີ່ສະຖາບັນຂາດທຶນ ໂດຍມີສາເຫດມາຈາກຈຸດບົກຜ່ອງທາງດ້ານບໍລິ
ຫານ-ຈັດການ, ການວາງແຜນຍຸດທະສາດ, ການຄຸ້ມຄອງພະນັກງານ, ການຄົ້ນຄ້ວາການຕະຫລາດ ແລະ
ການຄຸ້ມຄອງບໍລິຫານສີນເຊື່ອທີ່ຂາດປະສິດທິຜົນ ແລະ ມີ 12
ສະຖາບັນຍັງບໍ່ໄດ້ຮັບການກວດສອບຈາກບໍລິສັດກວດສອບຈາກພາຍນອກ ເນື່ອງຈາກເປັນສະຖາບັນທີ່ເປີດໃໝ່
ບໍ່ທັນມີຄວາມເຂັ້ມແຂງທາງດ້ານການເງິນ
ຈຶ່ງບໍ່ສາມາດຈ້າງຜູ້ກວດສອບຈາກພາຍນອກເຂົ້າມາກວດ.
ນອກນີ້ ມີບາງສະຖາບັນບໍ່ມີລະບົບໂປຣແກຣມບັນຊີທີ່ມາດຕະຖານ
ມີພຽງການຈົດບັນທຶກບັນຊີປະຈໍາວັນດ້ວຍ EXCEL ເຮັດໃຫ້ສະຖາບັນບໍ່ສາມາດຕິດຕາມທຸກການເຄື່ອນໄຫວ,
ຍັງຂາດພະນັກງານທີ່ມີຄວາມຮູ້ດ້ານບັນຊີເພື່ອສະຫຼຸບສັງລວມບັນຊີປະຈໍາວັນ,
ປະຈໍາເດືອນ, ປະຈໍາງວດ ແລະ ປະຈໍາປີ
ເຮັດໃຫ້ການສົ່ງລາຍງານໃຫ້ແກ່ຜູ້ຄຸ້ມຄອງກໍ່ຄືກົມຄຸ້ມຄອງສະຖາບັນການເງິນ
ທຫລ ບໍ່ຖືກຕ້ອງກັບບັນຊີຕົວຈິງທີ່ທາງຄະນະກວດກາໄດ້ລົງກວດກາຕົວຈິງ,
ບໍ່ພໍເທົ່ານັ້ນ ມີບາງສະຖາບັນກໍ່ບໍ່ໃຫ້ການຮ່ວມມືແກ່ຄະນະກວດ ກາ, ຍັງມີການເຊື່ອງອໍາຂໍ້ມູນ, ໃຫ້ຂໍ້ມູນແກ່ຜູ້ກວດກາຜິດພາດ
ຈຶ່ງເຮັດໃຫ້ເກີດມີບັນຫາການຮ້ອງຟ້ອງຂໍຄວາມເປັນທໍາໃນບັນຫາລູກຄ້າເງິນຝາກຂອງບາງສະຖາບັນການເງິນຈຸລະພາກທີ່ຮັບເງິນຝາກ
ບໍ່ສາມາດຖອນເງິນຈາກບັນຊີເງິນຝາກຂອງຕົນ ແລະ
ຍັງມີກໍລະນີລູກຄ້າເງິນກູ້ຈໍານວນຫຼາຍຖືກຫັກເງິນຄໍ້າປະກັນເງິນກູ້
ເຮັດໃຫ້ໄດ້ຮັບເງິນກູ້ບໍ່ເຕັມຈໍານວນ ແຕ່ຄິດໄລ່ດອກເບ້ຍເຕັມຈໍານວນ ແລະ ອື່ນໆ.
ເພື່ອຮັບປະກັນການເຄື່ອນໄຫວສະຖາບັນການເງິນມີຄວາມໝັ້ນຄົງ
ແລະ ເຂັ້ມແຂງ, ກົມຄຸ້ມຄອງສະຖາບັນການເງິນ
ທຫລ ຈະສືບຕໍ່ປັບປຸງຍົກປະສິດທິພາບການດໍາເນີນ ແລະ ການຄຸ້ມຄອງສະຖາບັນການເງິນ ໂດຍຈະເອົາໃຈໃສ່ຝຶກອົບຮົມໃຫ້ແກ່ພະນັກງານດ້ານການເມືອງແນວຄິດ, ລະບຽບກົດໝາຍ, ຄວາມຮູ້-ຄວາມສາມາດດ້ານວິຊາການ, ກວດກາຄືນຄູ່ມືໃນການກວດກາ, ລະບຽບການທີ່ໃຊ້ໃນການຄຸ້ມຄອງບັນດາສະຖາບັນການເງິນຈຸລະພາກໃຫ້ເໝາະສົມ, ຖອດຖອນບົດຮຽນຄືນກ່ຽວກັບການຂຶ້ນແຜນລົງກວດກາ,
ເດັດຂາດ ແລະ ເຂັ້ມງວດຕໍ່ສະຖາບັນການເງິນທີ່ລະເມີດລະບຽບການ,
ເອົາໃຈໃສ່ຕິດຕາມຢ່າງໃກ້ຊິດກັບຄະນະສະພາບໍລິຫານ, ຄະ ນະກຳມະການຕ່າງໆ
ແລະ ຜູ້ຈັດການປັບປຸງແກ້ໄຂບັນດາຂໍ້ຄົງຄ້າງຂອງສະຖາບັນ ຫາກແຫ່ງໃດບໍ່ສາມາດລາຍງານການແກ້ໄຂຂໍ້ຄົງຄ້າງໃຫ້ກັບ ທຫລ
ໄດ້ພາຍໃນ 1 ໄຕມາດ ແລະ
ບໍ່ສາມາດປະຕິບັດໄດ້ ກົມຄຸ້ມຄອງສະຖາບັນການເງິນ
ຈະນຳໃຊ້ມາດຕະການຕາມທີ່ລະບຸໄວ້ຕາມມາດຕາ 82 ຂອງດຳລັດວ່າດ້ວຍສະຖາບັນການເງິນຈຸລະພາກ.
ໃນສະພາບການໃໝ່
ຍຸກແຫ່ງການເຊື່ອມໂຍງປະຊາຄົມ ອາຊຽນ ມັນໄດ້ເລັ່ງທວງໃຫ້ສະຖາບັນການເງິນຕ້ອງໄດ້ຍົກສູງສະຕິຕໍ່ລະບຽບກົດໝາຍ,
ເຄົາລົບ ແລະ ປະຕິບັດຕາມດໍາລັດ, ຂໍ້ກໍານົດ, ກົດລະບຽບທີ່ ທຫລ
ວາງອອກໃນແຕ່ລະໄລຍະ,
ເອົາໃຈໃສ່ແກ້ໄຂບັນດາຂໍ້ຄົງຄ້າງທີ່ທາງຄະນະກວດກາແນະນຳໃນແຕ່ລະປີ
ເພື່ອຮັບປະກັນໃຫ້ສະຖາບັນມີຄວາມຍືນຍົງ, ເພີ່ມທຶນໃຫ້ມີຄວາມພຽງພໍໃນການດໍາເນີນທຸລະກິດ
ແລະສາມາດຮອງຮັບເປັນທັນສະໄໝ, ເພີ່ມທະວີວຽກງານການກວດກາພາຍໃນໃຫ້ມີຄວາມເຂັ້ມແຂງ, ປະຕິບັດ
ລະບອບການກວດສອບພາຍນອກ ແລະ ເຜີຍແຜ່ຖານະການເງິນໃຫ້ຖືກຕ້ອງ,
ຮ່ວມມືກັນໃນການດໍາເນີນທຸລະກິດ, ແກ່ງແຍ່ງແຂ່ງຂັນ ບົນຫຼັກການ ແລະ
ລະບຽບກົດໝາຍກໍານົດໄວ້, ປັບປຸງໂຄງຮ່າງການຈັດຕັ້ງ ແລະ
ລະບົບບໍລິຫານພາຍໃນຂອງສະຖາບັນການເງິນໃຫ້ຮັດກຸມ ແລະ ຖືກຕ້ອງຕາມລະບຽບກົດໝາຍ,
ເອົາໃຈໃສ່ກໍ່ສ້າງ, ບໍາລຸງ ຖັນແຖວພະນັກງານ
ສາມາດຕອບສະໜອງຄວາມຮຽກຮ້ອງຕ້ອງການຂອງການດໍາເນີນທຸລະກິດໃຫ້ສາມາດເຊື່ອມໂຍງກັບພາກພື້ນ
ແລະ ສາກົນ. ຂຽນໂດຍ: ຣັດສະໝີ
ດວງສັດຈະ
No comments:
Post a Comment