ໃນວັນທີ 19 ເມສານີ້ຢູ່ກະຊວງການຕ່າງປະເທດ, ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ,ລັດຖະມົນຕີວ່າການກະຊວງການຕ່າງປະເທດແຫ່ງ ສປປ ລາວ ໄດ້ຕ້ອນຮັບ ແລະ ພົບປະສອງຝ່າຍກັບ ທ່ານ ໂຮເຊ
ເຮັນເນ ອາລເມັນດຣາສ ລັດຖະມົນຕີວ່າການ ກະຊວງການຕ່າງປະເທດແຫ່ງສາ ທາລະນະລັດ ຟິລິບປິນ ພ້ອມຄະນະໃນໂອກາດເດີນທາງມາຢ້ຽມຢາມ ສປປ
ລາວ ແຕ່ວັນທີ 18-20 ເມສາ 2016 ນີ້.
ການພົບຄັ້ງນີ້, ສອງຝ່າຍໄດ້ສະແດງຄວາມຍິນດີ ແລະ ຕີລາຄາສູງຕໍ່ໝາກຜົນຂອງການພົວພັນ ແລະ ຮ່ວມມືອັນດີງາມ ລະຫວ່າງ ສອງປະເທດໃນໄລຍະຜ່ານມາ ເຊິ່ງສະແດງອອກໃນການແລກປ່ຽນການຢ້ຽມຢາມ ລະຫວ່າງ ການນໍາຂັ້ນສູງຂອງສອງປະເທດຕະຫລອດຮອດບັນດາຂະແໜງການຕ່າງໆໃນທຸກໆລະດັບໂດຍສະເພາະການຊ່ວຍເຫລືອເຊິ່ງກັນ ແລະ ກັນໃນເວທີພາກພື້ນ ແລະ ສາກົນ. ທັງສອງຝ່າຍ
ຕ່າງກໍໄດ້ແຈ້ງໃຫ້ກັນຊາບກ່ຽວກັບສະພາບພາຍໃນປະເທດຂອງຕົນທີ່ພົ້ນເດັ່ນເປັນຕົ້ນ: ດ້ານການເມືອງ, ການພັດທະນາເສດຖະກິດ-ສັງຄົມ, ການເຄື່ອນໄຫວໃນເວທີພາກພື້ນ ແລະ ສາກົນ ພ້ອມດຽວກັນນັ້ນ ສອງຝ່າຍຍັງໄດ້ປຶກສາຫາລືກ່ຽວກັບຜົນສໍາເລັດກອງປະຊຸມວົງແຄບລັດຖະມົນຕີຕ່າງປະເທດອາຊຽນ ທີ່ນະຄອນຫລວງວຽງຈັນ ແລະ ກອງປະຊຸມສຸດຍອດສະໄໝພິເສດອາຊຽນ-ອາເມລິກາທີ່ຄາລິຟໍເນຍປະເທດສະຫະລັດອາເມລິກາໄດ້ຈັດຂຶ້ນໃນເດືອນກຸມພາ 2016 ຜ່ານມາ, ປີ
2016 ນີ້ ສປປ
ລາວ ໄດ້ຮັບກຽດເປັນປະທານອາຊຽນ, ທັງສອງຝ່າຍເຫັນວ່າມີຄວາມຈໍາເປັນຢ່າງຍິ່ງທີ່ຈະປະສົມປະສານ ແລະ ຮ່ວມມືເຊິ່ງກັນ ແລະ ກັນ ເພື່ອໃຫ້ບັນລຸຕາມເປົ້າໝາຍຂອງສາມເສົາຄໍ້າຂອງປະຊາຄົມອາຊຽນ, ສິ່ງສໍາຄັນແມ່ນການຮ່ວມມືໃນການຈັດຕັ້ງປະຕິບັດປະຊາຄົມເສດຖະກິດອາຊຽນໃຫ້ເກີດຜົນເປັນຮູບປະທໍາເທື່ອລະກ້າວ ນອກນີ້ ຍັງໄດ້ແລກປ່ຽນຄວາມຄິດຄວາມເຫັນຮ່ວມກັນກ່ຽວກັບບັນຫາພາກພື້ນ ແລະ ສາກົນ
ທີ່ມີຄວາມສົນໃຈ ພ້ອມໄດ້ປຶກສາຫາລື ແລະ ເຫັນດີຊອກຫາຊ່ອງທາງໃນການສົ່ງເສີມການຄ້າ, ການລົງທຶນ, ການສຶກສາ ກໍຄື ການພົວພັນຮ່ວມມືທາງດ້ານບໍລິການ-ການບິນ, ການສົ່ງເສີມຊຸກຍູ້ການຮ່ວມມື ແລະ ການລົງທຶນໃນຂົງເຂດເສດຖະກິດຂະໜາດກາງ ແລະ ຂະໜາດນ້ອຍ, ການຍົກເວັ້ນພາສີຊໍ້າຊ້ອນ
ແລະ ອື່ນໆ
ລະຫວ່າງ ສອງປະເທດ ໃນຂອບສອງຝ່າຍ ແລະ ຫລາຍຝ່າຍໃຫ້ນັບມື້ນັບເຂົ້າສູ່ລວງກວ້າງ ແລະ ລວງເລິກ ເພື່ອໃຫ້ເກີດດອກອອກຜົນຍິ່ງໆຂຶ້ນ ບົນພື້ນຖານຕ່າງຝ່າຍຕ່າງມີຜົນປະໂຫຍດ.
No comments:
Post a Comment