ທ່ານນາງ ໃບຄຳ ຂັດທິຍະ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ຖະແຫລງຄວາມພ້ອມຂອງການກະກຽມເປັນປະທານຈັດກອງປະຊຸມລັດຖະມົນຕີແຮງງານອາຊຽນ ຄັ້ງທີ
24 ວ່າ: ກອງປະຊຸມດັ່ງກ່າວ, ຈະໄດ້ຈັດຂຶ້ນໃນລະຫວ່າງວັນທີ
10-16 ພຶດສະພານີ້, ທີ່ນະຄອນຫລວງວຽງຈັນ, ໂດຍຈະມີການພິຈາລະນາຮັບຮອງເອົາຫລາຍບັນຫາສຳຄັນ ໃຫ້ແກ່ການຈັດຕັ້ງປະຕິບັດວິໄສທັດຂອງປະຊາຄົມເສດຖະກິດອາຊຽນຕິດພັນກັບບັນຫາແຮງງານເປັນຕົ້ນ ຂໍ້ແນະນຳສຳລັບ ລະບົບການຮັບຮູ້ ແລະ ຢັ້ງຢືນມາດຕະຖານສີມືຢູ່ອາຊຽນ, ຂໍ້ແນະນຳຂອງອາຊຽນ ສຳລັບຄວາມຮັບຜິດຊອບທາງສັງຄົມໃນດ້ານແຮງງານ, ການຄຸ້ມຄອງ ແລະ ໂຄງສ້າງດ້ານມາດຕະຖານສີມືແຮງງານອາຊຽນ ແລະ ບັນຫາອື່ນໆອີກ. ພາຍຫລັງກອງປະຊຸມສຳເລັດລົງ ລາວເຮົາຈະໄດ້ສືບຕໍ່ເປັນປະທານທາງດ້ານແຮງງານອາຊຽນ ຈົນຮອດປີ 2018 ແລະ ຈະມອບຕໍ່ໃຫ້ປະເທດມາເລເຊຍ. ດັ່ງນັ້ນ ເພື່ອເຮັດໃຫ້ກອງປະຊຸມຄັ້ງນີ້ ດຳເນີນໄປດ້ວຍຜົນສຳເລັດຈົບງາມຕາມຄາດໝາຍທີ່ໄດ້ກຳນົດໄວ້ ແລະ ຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍ ພາກສ່ວນກ່ຽວຂ້ອງ ກໍຄື
ກະຊວງແຮງງານ ແລະ ສະຫວັດດີການສັງຄົມ ໄດ້ກຽມຄວາມພ້ອມຮອບດ້ານ, ໂດຍການແຕ່ງຕັ້ງບັນດາອະນຸກຳມະການ ແລະ ພາກສ່ວນກ່ຽວຂ້ອງ ໃນການຂຶ້ນແຜນວຽກ, ແຜນບຸກຄະລາກອນ ແລະ ແຜນງົບປະມານ, ໂດຍມີການແບ່ງຄວາມຮັບຜິດ ຊອບໃຫ້ແຕ່ລະພາກສ່ວນ, ແຕ່ລະບຸກຄົນໄປຈັດຕັ້ງປະຕິບັດ ໂດຍການຊີ້ນຳ,
ຕິດຕາມ, ກວດກາຢ່າງເປັນປົກກະຕິຈາກຂັ້ນເທິງ, ເຊິ່ງມາຮອດປັດຈຸບັນ ເຫັນວ່າມີຄວາມພ້ອມແລ້ວ ໃນການກ້າວເຂົ້າສູ່ການເປັນເຈົ້າພາບກອງປະຊຸມລັດຖະມົນຕີແຮງງານອາຊຽນ ຄັ້ງທີ
24, ກອງປະຊຸມລັດຖະມົນຕີແຮງງານອາຊຽນ ບວກ
3 ຄັ້ງທີ 9 ແລະ ກອງປະຊຸມປິ່ນອ້ອມຕ່າງໆ.
No comments:
Post a Comment