ເມືອງມໍລະດົກໂລກ ຫລວງພະບາງຕັ້ງເປົ້າພາຍໃນປີ 2016
ຈະມີນັກທ່ອງທ່ຽວຕ່າງປະເທດເຂົ້າມາທ່ຽວຊົມພາຍໃນແຂວງຂອງຕົນ
ປະມານ 6 ແສນກວ່າຄົນ,
ຂະນະທີ່ອຳນາດການປົກແຂວງ
ເລັ່ງສ້າງສິ່ງອຳນວຍຄວາມສະດວກດ້ານການຂົນສົ່ງທາງບົກ, ທາງອາກາດ ແລະ ສະຖານທີ່ຮອງຮັບໃຫ້ດີ ແລະ ມີມາດຕະຖານ
ເພື່ອຕອບສະໜອງຄວາມຕ້ອງການທີ່ເພີ່ມຂຶ້ນຢ່າງຕໍ່ເນື່ອງ.
ພະແນກຖະແຫລງຂ່າວ, ວັດທະນະທຳ
ແລະ ທ່ອງທ່ຽວແຂວງຫລວງພະບາງ ໃຫ້ຮູ້ວ່າ: ປີ 2015 ຜ່ານມາ ມີຊາວຕ່າງຊາດເຖິງ 5 ແສນຄົນ
ໄດ້ເດີນທາງມາທ່ອງທ່ຽວເມືອງມໍລະດົກໂລກຫລວງພະບາງ ແລະ
ເຮັດໃຫ້ມີລາຍຮັບຈາກອຸດສາຫະກຳທ່ອງທ່ຽວຫລາຍລ້ານໂດລາສະຫະລັດ ເຊິ່ງໄດ້ປະກອບສ່ວນເຂົ້າໃນການພັດທະນາເສດຖະກິດສັງຄົມ
ແລະ ແກ້ໄຂຊີວິດການເປັນຂອງປະຊາຊົນດີຂຶ້ນເປັນກ້າວໆ
ສະເພາະປີ 2016 ນີ້
ຄາດວ່າຈະມີນັກທ່ອງທ່ຽວເຂົ້າມາຢ້ຽມຢາມແຂວງຫລວງພະບາບຫລາຍກວ່າ 6
ແສນຄົນ, ພາຍຫລັງເມືອງມໍລະດົກໂລກ ໄດ້ຄອງແຊັມເມືອງຍອດນິຍົມ ແລະ
ເມືອງປາຍທາງຂອງການທ່ອງທ່ຽວໃນໂລກ ຕິດຕໍ່ກັນຫລາຍປີຊ້ອນ
ພ້ອມໄດ້ມີຫລາຍສາຍການບິນໂດຍກົງ ຈາກປະເທດຕ່າງໆເຂົ້າມາແຂວງ
ຫລວງພະບາງ ເຊັ່ນ: ແອເອເຊຍ, ແອກາຕ້າ,
ເອເມເຣດ, ເອີຣົບ, ເກົາຫລີ, ໄທ, ຫວຽດນາມ ແລະ
ອື່ນໆ.
ພະແນກ ຖວທ ແຂວງດັ່ງກ່າວໃຫ້ຮູ້ວ່າ: ການໄດ້ຮັບຄວາມນິຍົມຂອງເມືອງມໍລະດົກຫລວງພະບາງ
ນັ້ນແມ່ນຜົນມາຈາກຫລາຍປັດໄຈໃນດ້ານປະຫວັດສາດ, ວັດທະນະທຳຮີດຄອງປະເພນີ,
ວິຖີຊີວິດ ແລະ ທຳມະຊາດອັນດັ້ງເດີມ ທີ່ຕິດພັນກັນຢ່າງສະໜິດແໜ້ນ.
ນອກຈາກນັ້ນ, ແຂວງຂອງຕົນໄດ້ມີສົນທິສັນຍາ
ກ່ຽວກັບການປົກປັກຮັກສາມໍລະດົກຢ່າງເຄັ່ງຄັດ ໃນນັ້ນ ການກໍ່ສ້າງ ແລະ
ບູລະນະສ້ອມແປງເຮືອນ, ອາຄານ, ວັດ ແລະ ສະຖານທີ່ຕ່າງໆພາຍໃນແຂວງ
ຕ້ອງໄດ້ຮັກສາຮີດຄອງອັນດີງາມຂອງພໍ່-ແມ່ປະຊາຊົນ ແລະ
ສິ່ງດັ້ງເດີມທີ່ເປັນເອກະລັກໄວ້ ສະນັ້ນ,
ຈຶ່ງຖືເອົາວຽກງານການສຶກສາອົບຮົມ ແລະ
ໃຫ້ຄວາມຮູ້ຕໍ່ປະຊາຊົນໃນທົ່ວແຂວງເປັນສຳຄັນ.
ປີ 2015 ວາລະສານ (Wanderlus
Magazine) ເຊິ່ງເປັນວາລະສານດ້ານການທ່ອງ ທ່ຽວຊັ້ນນຳຂອງໂລກໃນປະເທດອັງກິດ
ລາຍງານວ່າ:
ບັນດາສະມາຊິກຂອງວາລະສານໄດ້ຈັດໃຫ້ເມືອງມໍລະດົກໂລກຫລວງພະບາງ
ເປັນເມືອງທີ່ໜ້າທ່ອງທ່ຽວທີ່ສຸດອັນດັບ 1 ຂອງໂລກ ໃນປີ 2015 ນີ້ ດ້ວຍຄະແນນສູງເຖິງ 97% ຂອງຈຳນວນສະມາຊິກທັງໝົດ ທີ່ໄດ້ປະກອບຄວາມເຫັນເຂົ້າໃນການສຳຫລວດ
ເມື່ອທ້າຍປີທີ່ຜ່ານມາ, ສ່ວນອັນດັບທີ 2 ແລະ 3 ກໍຄືເມືອງພຸກາມ ໃນສະຫະພາບມຽນມາ ແລະ ນະຄອນຫລວງ Stockholm ປະເທດສະວີເດັນ. ຕາມສະຖິຕິຂອງກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ
ລາຍງານວ່າ ປີ 2015 ຜ່ານມານັກທ່ອງທ່ຽວເຂົ້າທ່ຽວຊົມ
ສປປ ລາວ ປະມານ 4 ລ້ານກວ່າຄົນ ແລະ ຄາດວ່າ
ຈຳນວນນັກທ່ອງທ່ຽວຈະເພີ່ມຂຶ້ນຕື່ມອີກ ເນື່ອງຈາກວ່າ ສປປ ລາວ
ເປັນປະເທດມີຄວາມສະຫງົບສຸກ; ມີສະຖານທີ່ດ້ານປະຫວັດສາດ,
ວັດທະນະທຳ ແລະ ທຳມະຊາດດັ້ງເດີມ ແລະ ອື່ນໆ.
No comments:
Post a Comment