ເມື່ອບໍ່ດົນມານີ້, ທ່ານ ຄໍາລຽນ
ພົນເສນາ ຮອງລັດຖະມົນຕີກະຊວງແຜນການ ແລະ ການລົງທຶນ ພ້ອມຄະນະ ໄດ້ເຂົ້າຮ່ວມກອງປະຊຸມສະຫະປະຊາຊາດ ກ່ຽວກັບປະຊາກອນ ແລະ
ການພັດທະ ນາ ຄັ້ງທີ 49 ທີ່ນີວຢອກ,
ໂດຍມີຜູ້ຕາງໜ້າລັດຖະບານຈາກປະເທດຕ່າງໆ, ບັນ ດາອົງການຈັດຕັ້ງສາກົນ,
ອົງການທີ່ບໍ່ຂຶ້ນກັບລັດຖະບານ ແລະ ອົງການຈັດຕັ້ງສັງຄົມຕ່າງໆໃນໂລກ
ເຂົ້າຮ່ວມ. ເພື່ອຄົ້ນຄວ້າ ແລະ ປຶກສາຫາລືການສ້າງຄວາມເຂັ້ມແຂງກ່ຽວກັບການນໍາໃຊ້ຜົນປະໂຫຍດຈາກການປ່ຽນແປງໂຄງປະກອບອາຍຸຂອງປະຊາກອນເຂົ້າໃນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ(SDGSs) ແຕ່ນີ້ຮອດປີ 2030.
ໃນໂອກາດດຽວກັນ, ທ່ານຄໍາລຽນ ພົນເສນາ
ກໍໄດ້ລາຍງານຕໍ່ກອງປະຊຸມໂດຍໄດ້ເນັ້ນເຖິງຄວາມສໍາຄັນຂອງວຽກງານປະຊາກອນ
ແລະ ການພັດທະນາລວມ ທັງການເຊື່ອມສານວຽກງານດັ່ງກ່າວເຂົ້າໃນການພັດທະນາເສດຖະກິດ-ສັງຄົມ
ແລະ ການຈັດຕັ້ງປະຕິບັດຕົວຈິງໃນໄລຍະຜ່ານມາເຫັນໄດ້ວ່າ 20 ປີຜ່ານມາວຽກງານປະຊາກອນຢູ່ ສ ປປ ລາວມີຄວາມຄືບໜ້າດີ; ອັດຕາການຕາຍຂອງແມ່ໄດ້ຫລຸດລົງ ແລະ ບັນລຸເປົ້າໝາຍ MDGs ໃນປີ 2015; ອັດຕາອາຍຸຍືນສະເລ່ຍໄດ້ເພີ່ມຂຶ້ນເປັນ
64,4 ປີ ໃນປີ 2011 ມາເປັນ 68,3 ປີ ໃນປີ 2015;
ເສດຖະກິດໄດ້ມີການຂະຫຍາຍຕົວຢ່າງຕໍ່ເນື່ອງ
ເຮັດໃຫ້ອັດຕາຄວາມທຸກຍາກຂອງປະຊາຊົນຫລຸດລົງຢ່າງຈະແຈ້ງ,
ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນ. ພ້ອມທັງແຈ້ງໃຫ້ຊາບກ່ຽວກັບເປົ້າໝາຍ ແລະ
ຄາດໝາຍສູ້ຊົນຂອງ ສປປ ລາວ; ບັນຫາ, ສິ່ງທ້າທາຍ
ແລະ ຂໍ້ຫຍຸ້ງຍາກໃນຕໍ່ໜ້າ ເຊິ່ງຈະຕ້ອງສືບຕໍ່ແກ້ໄຂ ແລະ
ຄວາມຕັດສິນໃຈຂອງລັດຖະບານ ທີ່ຈະສືບຕໍ່ຮ່ວມມືກັບບັນດາຄູ່ຮ່ວມພັດທະນາກ່ຽວກັບ
ການສ້າງຄວາມສາມາດໃນການເກັບກໍາ ແລະ ນໍາໃຊ້ຜົນປະໂຫຍດທາງດ້ານປະຊາກອນ
ເຂົ້າໃນການຈັດຕັ້ງປະຕິບັດເປົ້າ
ໝາຍ SDGs ໃຫ້ບັນລຸໃນປີ 2030
ຢ່າງມີໝາກຜົນສູງ.
ນັບແຕ່ປີ 2012-2015 ກອງທຶນຂອງສະຫະປະຊາຊາດໃນວຽກງານປະຊາກອນ
(UNF PA) ໄດ້ໃຫ້ການຊ່ວຍເຫລືອແກ່ ສປປ ລາວ ມູນຄ່າ 22,5
ລ້ານໂດລາສະຫະລັດ ໃນຂົງເຂດວຽກງານດ້ານສຸຂະພາບຈະເລີນພັນ,
ດ້ານປະຊາກອນ ແລະ ການພັດທະນາ, ຄວາມສະເໝີພາບລະຫວ່າງຍິງ-ຊາຍ ແລະ
ການປະສານງານລະຫວ່າງແຜນງານ. ໃນຕໍ່ໜ້າແຕ່ປີ 2017-2021 ຈະຊ່ວຍ 20
ລ້ານໂດລາສະຫະລັດ ໃນຂົງເຂດວຽກງານດ້ານສຸຂະພາບຈະເລີນພັນ ແລະ
ການມີເພດສໍາພັນທີ່ມີຄວາມຖືກຕ້ອງ ແລະ ປອດໄພ, ດ້ານການພັດທະນາໄວໜຸ່ມ,
ໂຄງສ້າງດ້ານປະຊາກອນ ແລະ ດ້ານການປະສານງານລະຫວ່າງແຜນງານ.
No comments:
Post a Comment