ຄະນະຜູ້ແທນ ລາວ ເຂົ້າຮ່ວມສະຫລອງວັນວິທະຍາສາດເຕັກໂນໂລຊີ ແລະ ນະວັດຕະກໍາ ຢູ່ ສສ ຫວຽດນາມ

          ຄະນະ​ຜູ້​ແທນ​ລາວ ນຳ​ໂດຍ ທ່ານ ຫຸມພັນ ອິນທະຣາດ ຮອງລັດຖະມົນຕີ ກະຊວງວິທະຍາ ສາດ ແລະ ເຕັກໂນໂລຊີ ​ໄດ້​ເດີນທາງ​ໄປ​ຮ່ວມສະຫລອງວັນວິທະຍາສາດ, ເຕັກໂນໂລຊີ ແລະ ນະວັດຕະກໍາ ຢູ່ ສສ ຫວຽດນາມ ​ແໃນວັນ​ທີ 10-12 ພຶດສະພານີ້, ​ໂດຍມີຜູ້ຕາງໜ້າຈາກອົງການຈັດ ຕັ້ງສາກົນ,​ ອົງການຜູ້ສະໜອງທຶນ ​ແລະ ພາກສ່ວນ​ກ່ຽວຂ້ອງ​ຕ່າງໆເຂົ້າ​ຮ່ວມນໍາດ້ວຍ.

​          ໃນ​ໂອກາດ​ດັ່ງກ່າວ, ທ່ານ ຫຸມພັນ ອິນທະຣາດ ​ໄດ້​ມີ​ຄຳ​ເຫັນ​ໃນກອງປະຊຸມໂຕະມົນກ່ຽວກັບບັນຫາດັ່ງກ່າວເພື່ອຊີ້ແຈງເຖິງທັດສະນະຂອງອາຊຽນ ໃນນາມທີ່ເປັນປະທານຂອງຄະນະກໍາມະການອາຊຽນ ດ້ານວິທະຍາສາດ ແລະ ເຕັກໂນໂລຊີເຊັ່ນ: ບົດບາດຂອງນະວັດຕະກໍາ ແລະ ພູມປັນຍາ,​ ບົດ ຮຽນທີ່ຖອດຖອນໄດ້,​ ສິ່ງທ້າທາຍ ແລະ ກາລະໂອກາດຂອງມະຫາວິທະຍາໄລ, ຊັບສິນທາງປັນຍາ, ການ

ປ່ຽນແປງສະພາບຢູ່ໃນຂົງເຂດອາຊີອາຄະເນ, ການຮ່ວມມືສາກົນ ແລະ ຂອບແຜນງານ ລະ ຫວ່າງອາຊຽນ-ເອີຣົບ ຕໍ່ການເຊື່ອມຍົງທາງດ້ານເສດຖິດ. ພ້ອມ​ທັງໄດ້ແຈ້ງໃຫ້ ຊາບເຖິງ ຍຸດທະສາດຫລັກຂອງຂະແໜງ ວິທະຍາສາດ, ເຕັກໂນໂລຊີ ແລະ ນະວັດຕະກໍາອາຊຽນ ແຕ່ປີ 2016-2025 ​ໃຫ້​ຜູ້​ເຂົ້າ​ຮ່ວມ​ກອງ​ປະຊຸມ​ໄດ້​ຮັບ​ຊາບ​ຕື່ມ​ອີກ.

          ນອກຈາກນີ້,​ ຄະນະຜູ້ແທນ ລາວ ຍັງໄດ້ເຂົ້າຮ່ວມກອງປະຊຸມຕ່າງໆຕາມວາລະຂອງກອງປະຊຸມ ແລະ ຍາດແຍ່ງໂອກາດ ເພື່ອປຶກສາຫາລືກັບຜູ້ຊ່ຽວຊານຈາກ ອົງການ GIZ ຂອງເຍຍລະມັນ ​ເຊິ່ງອົງການ​ດັ່ງກ່າວ ເຫັນດີໃຫ້ການສະໜັບສະໜູນແກ່ ສປປ ລາວ ກ່ຽວກັບການຈັດກອງປະຊຸມວິຊາການຂຶ້ນ ຢູ່ ສປປ ລາວ ໃນເດືອນ ສິງຫາ-ກັນຍາ 2016 ທີ່ຈະມາເຖິງ ເພື່ອຜັນຂະຫຍາຍ “ຂອບແຜນງານນະໂຍບາຍອາຊຽນ ກ່ຽວກັບການເປັນຫຸ້ນສ່ວນ ເພື່ອການພັດທະນາເຕັກໂນໂລຊີ ແລະ ນະວັດຕະກໍາ” ໃຫ້ກາຍມາເປັນພາກປະຕິບັດຕົວຈິງ ໂດຍສອດຄ່ອງກັບສະພາບການຂະຫຍາຍຕົວ ທາງດ້ານເສດຖະກິດ ແລະ ເຕັກນິກ ຂອງ ສປປ ລາວ.

          ໃນວັນສໍາຄັນດັ່ງກ່າວຍັງໄດ້ງານວາງສະແດງຜົນງານ ຈາກການຄົ້ນຄວ້າ ແລະ ການຮ່ວມມືທາງດ້ານະວັດຕະກໍາ ລະຫວ່າງສອງພູມີພາກ ອາຊຽນ-ອີຍູ ​ເຊິ່ງປີນີ້ ໄດ້ສຸມໃສ່ການສະແດງຜົນການຮ່ວມມື ລະຫວ່າງພາກການສຶກສາ ແລະ ອຸດສາກໍາ ທີ່ນອນຢູ່ໃນຂອບສິ່ງທ້າທາຍຕ່າງໆສໍາລັບສອງພູມີພາກ. ​ແລະ ຍັງເປັນເວທີ ເພື່ອສ້າງເຄື່ອຄ່າຍນັກຄົ້ນຄວ້າຮ່ວມກັນ, ການອໍານວຍຄວາມສະດວກໃນການແລກປ່ຽນຄວາມຄິດເຫັນ ຕໍ່ຫົວຂໍ້ທີ່ມີຜົນປະໂຫຍດຮ່ວມກັນ ພ້ອມກັບການຊອກຮູ້ໂອກາດໃໝ່ ເພື່ອການຮ່ວມມືໃນອານາຄົດ.