ທ່ານຫົວໜ້າກົມອຸດສາຫະກຳ ແລະ
ຫັດຖະກຳ ໃຫ້ຮູ້ວ່າ: ປັດຈຸບັນ ຢູ່ລາວເຮົາມີໂຮງງານ
ອຸດສາຫະກຳປຸງແຕ່ງໄມ້ 30.000 ກວ່າແຫ່ງ, ໃນນັ້ນ ໂຮງງານຂະໜາດໃຫຍ່ ມີ
500 ກວ່າແຫ່ງ, ຂະໜາດກາງ 600 ກວ່າແຫ່ງ, ຂະໜາດນ້ອຍ 12.000 ກວ່າແຫ່ງ ແລະ ແບບຄອບຄົວ 20.000 ກວ່າແຫ່ງ. ດັ່ງນັ້ນ ການເກັບກຳສະຖິຕິອຸດສາຫະກຳປຸງແຕ່ງ ແລະ ຫັດຖະກຳ ຈຶ່ງເປັນຂໍ້ມູນພື້ນຖານສຳຄັນໃນການວິເຄາະ, ວິໃຈ,
ຕີລາຄາການຂະຫຍາຍຕົວ, ການວາງແຜນສົ່ງເສີມ ແລະ ພັດທະນາວຽກງານປຸງແຕ່ງໃນທົ່ວປະເທດໃຫ້ມີຄວາມກ້າວໜ້າ. ໄລຍະຜ່ານມາ ວຽກງານສະຖິຕິອຸດສາຫະກຳປຸງແຕ່ງ ແລະ ຫັດຖະກຳ
ກໍໄດ້ເອົາໃຈໃສ່ຈັດຕັ້ງປະຕິບັດມາເປັນຢ່າງດີ, ໂດຍການສັງລວມຂໍ້ມູນຂອງໂຮງງານແຕ່ລະແຫ່ງ ເພື່ອລາຍງານສະພາບການຂະຫຍາຍຕົວ ເປັນຕົ້ນ ສະຖິຕິມູນຄ່າຜະລິດຕະພັນອຸດສາຫະກຳປຸງແຕ່ງ ແລະ ຫັດຖະກຳ, ຈຳນວນໂຮງງານ ແລະ ອື່ນໆ, ແຕ່ໂດຍລວມແລ້ວ ຍັງເຫັນວ່າບໍ່ທັນມີຄວາມຊັດເຈນ, ຖືກຕ້ອງຕາມລະບົບສະຖິຕິ ແລະ ບາງຄັ້ງກໍມີຄວາມຊັກຊ້າ, ເນື່ອງມາຈາກຫລາຍສາເຫດດ້ວຍກັນເຊັ່ນ: ຂາດພະນັກງານຜູ້ທີ່ມີຄວາມຮູ້ໂດຍກົງ, ຂາດງົບປະມານ, ຂາດການເກັບກຳຂໍ້ມູນສະຖິຕິທີ່ຖືກວິທີ ແລະ ຍັງບໍ່ທັນມີການເດີນສໍາຫລວດສະຖິຕິຢ່າງເປັນທາງການເທື່ອ. ດັ່ງນັ້ນ ຈຶ່ງໄດ້ຈັດຝຶກອົບຮົມດັ່ງກ່າວຂຶ້ນ ເພື່ອໃຫ້ພະນັກງານວິຊາການ ຮູ້ນຳເອົາບົດຮຽນ ແລະ ວິທີການຕ່າງໆ ລົງເກັບກຳຂໍ້ມູນຢູ່ຕາມໂຮງຈັກ, ໂຮງງານແຕ່ລະແຫ່ງ ໃຫ້ທີ່ຖືກຕ້ອງ, ຊັດເຈນ ເພື່ອນຳເອົາຂໍ້ມູນດັ່ງກ່າວໄປປັບປຸງລະບົບຖານສະຖິຕິ ໃຫ້ມີການພັດທະນາ ແລະ ຊອກຫາວິທີສົ່ງເສີມວຽກງານດັ່ງກ່າວ ໃຫ້ມີຄຸນນະພາບດີຂຶ້ນເລື້ອຍໆ ກ້າວໄປສູ່ລະດັບສາກົນ ແລະ ພາກພື້ນໂດຍໄວ.
ທ່ານຫົວໜ້າກົມ ກ່າວວ່າ: ຕໍ່ກັບຄຳສັ່ງຂອງນາຍົກລັດຖະມົນຕີ ເມື່ອບໍ່ດົນນີ້, ກົມອຸດສາຫະກຳ ແລະ ຫັດຖະກຳ
ກໍໄດ້ເອົາໃຈໃສ່ຈັດຕັ້ງປະຕິບັດ, ໂດຍການລົງໄປດັດສົມຢູ່ບັນດາໂຮງງານປຸງແຕ່ງໄມ້ໃນແຂວງຕ່າງໆ, ມາຮອດປັດຈຸບັນ ສຳເລັດໄປແລ້ວໃນ 5 ແຂວງຄື: ບໍລິຄຳໄຊ,
ຄຳມ່ວນ, ສະ ຫວັນນະເຂດ, ສາລະວັນ ແລະ ເຊກອງ ແລະ ຈະສືບຕໍ່ໃຫ້ສຳເລັດທົ່ວປະເທດໃນທ້າຍປີ
2016ນີ້ ແລະ
ເມື່ອມໍ່ໆມານີ້
ກໍໄດ້ລົງໄປແຂວງຈຳປາສັກ ແລະ ອັດຕະປື ເພື່ອປັບປຸງ ແລະ ດັດສົມບັນດາໂຮງງານປຸງແຕ່ງໄມ້ແຂວງດັ່ງກ່າວ ໃຫ້ເປັນລະບົບຕ່ອງໂສ້ ເປັນຕົ້ນ ວັດຖຸເຂົ້າ-ອອກໂຮງງານຈະຕ້ອງຖືກຕ້ອງຕາມລະບຽບກົດໝາຍ.
No comments:
Post a Comment