ກອງປະຊຸມຄະນະກຳມະການອາຊຽນ ເພື່ອຈັດຕັ້ງປະຕິບັດຖະແຫລງການອາຊຽນ ວ່າດ້ວຍການປົກປ້ອງ ແລະ ສົ່ງເສີມສິດທິແຮງງານເຄື່ອນຍ້າຍ ຄັ້ງທີ 9, ໄດ້ຈັດຂຶ້ນໃນວັນທີ 10-11 ພຶດສະ ພານີ້, ທີ່ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ພົງໄຊສັກ ອິນຖາລາດ ຫົວໜ້າກົມຄຸ້ມຄອງແຮງານ ກະຊວງແຮງງານ ແລະ ສະຫວັດດີການ ສັງຄົມ,
ມີບັນດາຜູ້ຕາງໜ້າຈາກ 10 ປະເທດອາຊຽນເຂົ້າຮ່ວມ.
ທ່ານ
ໂຈມແຍງ ແພງທອງສະຫວັດ ຮອງຫົວໜ້າກົມແຜນການ ແລະ ການຮ່ວມມື ກະຊວງແຮງງານ ແລະ ສະຫວັດດີການສັງຄົມ, ທັງເປັນປະທານກອງປະຊຸມ ກ່າວວ່າ: ກອງປະຊຸມຄັ້ງນີ້ ນອກຈາກຈະທົບທວນຄືນບັນດາແຜນວຽກ, ແຜນການ ແລະ ໂຄງການຕ່າງໆທີ່ອາຊຽນໄດ້ຮ່ວມກັນຈັດຕັ້ງປະຕິບັດ ໃນໄລຍະຜ່ານມາແລ້ວ ຍັງຈະມີການປຶກສາຫາລືຄວາມຄືບໜ້າບັນຫາສຳຄັນອື່ນໆ ເພື່ອຈະນຳໄປສະເໜີຕໍ່
ກອງປະຊຸມເຈົ້າໜ້າທີ່ອາວຸໂສແຮງງານອາຊຽນ, ໂດຍສະເພາະ ຮ່າງນິຕິກຳການປົກປ້ອງ ແລະ ສົ່ງເສີມສິດທິແຮງງານເຄື່ອນຍ້າຍ, ເນື່ອງຈາກວ່າ 5 ປີຜ່ານມາ, ບັນດາປະເທດສະມາຊິກອາຊຽນ ໄດ້ປຶກສາຫາລືກັນຫລາຍຄັ້ງ ແຕ່ຍັງບໍ່ສາມາດເປັນເອກກະພາບກັນໄດ້, ໃນບັນຫານີ້ ກອງປະຊຸມຈະສຸມໃສ່ປຶກສາຫາລືຮ່າງແຜນງານຂອງຄະນະກຳມະການອາຊຽນວ່າດ້ວຍການປົກປ້ອງ ແລະ ສົ່ງເສີມສິດທິແຮງງານເຄື່ອນຍ້າຍໃນອາຊຽນ 2015-2020, ເຊິ່ງເປັນແຜນງານຕົວແບບທີ່ກອງປະຊຸມເທື່ອນີ້ຈະໄດ້ເປັນເອກກະພາບ ແລະ ຕົກລົງຮັບຮອງເອົາ ພ້ອມທັງກຳນົດບັນດາກິດຈະກຳ ແລະ ໂຄງການຕ່າງໆ, ໂດຍມອບໃຫ້ປະເທດໃດໜຶ່ງເປັນເຈົ້າຂອງໂຄງການ, ເພື່ອຮ່ວມກັນລະດົມທຶນເຂົ້າໃນການຈັດຕັ້ງປະຕິບັດໃຫ້ສຳເລັດໃນປີ
2020.
ກອງປະຊຸມຄັ້ງນີ້ ຖືວ່າເປັນກອງປະຊຸມປິ່ນອ້ອມໜຶ່ງຂອງກອງປະຊຸມລັດຖະມົນຕີແຮງງານອາຊຽນ ຄັ້ງທີ
24, ເຊິ່ງຈະມີຂຶ້ນໃນທ້າຍອາທິດນີ້, ລວມມີ 8 ກອງປະຊຸມຄື:
ກອງປະຊຸມຄະນະກຳມະການ ເພື່ອຈັດຕັ້ງປະຕິບັດຖະແຫລງການອາຊຽນວ່າດ້ວຍການປົກປ້ອງ ແລະ ສົ່ງເສີມສິດທິຂອງແຮງງານເຄື່ອນຍ້າຍອາຊຽນ ຄັ້ງທີ
9; ກອງປະຊຸມເຈົ້າໜ້າທີ່ອາວຸໂສ
ຄັ້ງທີ 12; ກອງປະຊຸມເຈົ້າໜ້າທີ່ອາວຸໂສແຮງງານອາຊຽນ +3 ຄັ້ງທີ
14; ກອງປະຊຸມພັດທະນາຊັບພະຍາກອນມະນຸດອາຊຽນ ຄັ້ງທີ
5; ກອງປະຊຸມລັດຖະມົນຕີແຮງງານອາຊຽນຄັ້ງທີ 24, ກອງປະຊຸມລັດຖະມົນຕີແຮງງານອາຊຽນ +3 ຄັ້ງທີ
9 ແລະ ກອງປະຊຸມຍ່ອຍອື່ນໆ. ໃນປີ
2007 ຜູ້ນຳອາຊຽນ ໄດ້ຮັບຮອງຖະແຫລງການແຮງງານເຄື່ອນຍ້າຍ ທີ່ປະເທດຟີລີປິນ, ລັດຖະບານ ກໍຄືກະຊວງແຮງງານ ແລະ ສະຫວັດ ດີການສັງຄົມ ໄດ້ເອົາໃຈໃສ່ຈັດຕັ້ງຜັນຂະຫຍາຍ, ທັງເປັນເຈົ້າການຮ່ວມກິດຈະກຳຕ່າງໆໃນອາຊຽນຕະຫລອດມາ,
ສະເພາະ ສປປ ລາວ ກໍໄດ້ເອົາໃຈໃສ່ສ້າງເປັນນິຕິກຳເພື່ອເຊື່ອມສານເຂົ້າເທື່ອລະໜ້ອຍ ໃນກົດໝາຍແຮງານສະບັບປັບປຸງ, ກົດໝາຍປະກັນສັງຄົມ ແລະ ອື່ນໆ. ນອກນັ້ນ ຍັງໄດ້ຮ່ວມມືກັບທຸກຝ່າຍທີ່ກ່ຽວຂ້ອງ ເພື່ອເຮັດວຽກປົກປ້ອງ ແລະ ຄຸ້ມຄອງສິດຜົນປະໂຫຍດຂອງຜູ້ອອກແຮງງານເຄື່ອນຍ້າຍ, ທັງແຮງງານພາຍໃນ
ແລະ ຕ່າງປະເທດ, ທັງຊຸກຍູ້ບັນດາກົນໄກຕ່າງໆເພື່ອຈັດຕັ້ງປະຕິບັດບົດບັນທຶກຄວາມເຂົ້າໃຈໃນການຮັບ-ສົ່ງແຮງງານເຄື່ອນຍ້າຍກັບປະເທດເພື່ອນບ້ານໃຫ້ເປັນລະບົບ.
No comments:
Post a Comment