laophatthananewspaper: ນາຍົກລັດຖະມົນຕີ ທອງລຸນ ສີສຸລິດ ຢ້ຽມຢາມ ສສ ຫວຽດນາມຢ່າງເປັນທາງການ

ໂດຍຕອບສະໜອງຕາມຄຳເຊີນຂອງສະຫາຍ ຫງວຽນ ຊວັນ ຟຸກ ນາຍົກລັດຖະມົນຕີແຫ່ງສາທາລະນະລັດສັງຄົມນິຍົມ ຫວຽດນາມ, ສະຫາຍ ທອງລຸນ ສີສຸລິດ ນາຍົກລັດຖະມົນຕີແຫ່ງສາ ທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ, ໄດ້ເດີນ ທາງຢ້ຽມຢາມ ສສ ຫວຽດນາມ ຢ່າງເປັນທາງການໃນລະຫວ່າງວັນທີ 15-17 ພຶດສະພານີ້, ເພື່ອຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງປະເທດລາວ ແລະ ຫວຽດນາມ.

ໃນວັນທີ 15 ພຶດສະພາທີ່ສໍານັກງານນາຍົກລັດຖະມົນຕີແຫ່ງ ສສ ຫວຽດນາມ, ທ່ານນາ ຍົກລັດຖະມົນຕີແຫ່ງ ສປປ ລາວ ທອງລຸນ ສີສຸລິດ ໄດ້ຮັບການຕ້ອນຮັບຈາກ ທ່ານ ຫງວຽນ ຊວັນ ຟຸກ

ນາຍົກລັດຖະມົນຕີແຫ່ງ ສສ ຫວຽດນາມ ຢ່າງອົບອຸ່ນ, ສະໜິດສະໜົມ ແລະ ສົມກຽດ. ຈາກນັ້ນ ໄດ້ຈັດການພົບປະສອງຝ່າຍຂຶ້ນລະຫວ່າງສອງນາຍົກລັດຖະມົນຕີ. ໃນການພົບປະສອງຝ່າຍສະຫາຍ ຫງວຽນ ຊວັນ ຟຸກ ໄດ້ຕີລາຄາສູງຕໍ່ສະຫາຍ ທອງລຸນ ສີສຸລິດ ທີ່ໄດ້ຮັບການເລືອກຕັ້ງໃຫ້ເປັນນາຍົກລັດຖະມົນຕີແຫ່ງ ສປປ ລາວ, ເຊິ່ງສະແດງໃຫ້ເຫັນເຖິງຄວາມເຊື່ອໝັ້ນຂອງການນໍາ ພັກ-ລັດ ກໍຄືປະຊາຊົນລາວ, ສະຫາຍ ທອງລຸນ ສີສຸລິດ ກໍໄດ້ສະແດງຄວາມປິຕິຊົມຊື່ນເປັນຢ່າງຍິ່ງ ແລະ ຮູ້ສຶກເປັນກຽດ ທີ່ໄດ້ນຳພາຄະນະຜູ້ແທນຂັ້ນສູງຂອງລັດຖະບານ ແຫ່ງ ສປປ ລາວ ເດີນທາງຢ້ຽມຢາມ ສສ ຫວຽດນາມ ຢ່າງເປັນທາງການ, ເຊິ່ງເປັນການເຄື່ອນໄຫວວຽກງານການຕ່າງປະເທດຄັ້ງທຳອິດພາຍຫລັງໄດ້ຮັບແຕ່ງຕັ້ງເປັນນາຍົກລັດຖະມົນຕີ ແຫ່ງ ສປປ ລາວ ເພື່ອເປັນການປະກອບສ່ວນອັນສຳຄັນເຂົ້າໃນການເພີ່ມທະວີສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບ ດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ທີ່ມີມູນເຊື້ອອັນດີງາມນັ້ນໃຫ້ນັບມື້ມີຄວາມແໜ້ນແຟ້ນ, ຈະເລີນງອກງາມ ແລະ ແຕກດອກອອກຜົນຍິ່ງໆຂຶ້ນ.

ທັງສອງຝ່າຍ ໄດ້ຕົກລົງເຫັນດີສືບຕໍ່ປະຕິບັດບັນດາຂໍ້ຕົກລົງ 2 ກົມການເມືອງ ແລະ ບົດບັນ ທຶກຄັ້ງທີ 38 ຂອງຄະນະກຳມາທິການຮ່ວມມືລະຫວ່າງສອງລັດຖະບານ, ສືບຕໍ່ເພີ່ມທະວີການຮ່ວມມືຢ່າງແໜ້ນແຟ້ນລະຫວ່າງບັນດາແຂວງຊາຍແດນ ເພື່ອພ້ອມກັນສະກັດກັ້ນປະກົດການຫຍໍ້ທໍ້ທີ່ເກີດຂຶ້ນ, ຍົກສູງຄຸນນະພາບການຮ່ວມມືທາງດ້ານການສຶກສາ, ວັດທະນະທຳ-ສັງຄົມ, ດ້ານວຽກງານການຕ່າງປະເທດ ແລະ ພິເສດປີ 2017 ສອງປະເທດຈະໄດ້ຮ່ວມກັນສະເຫລີມສະຫລອງ 2 ວັນປະຫວັດ ສາດ ຄື: ຄົບຮອບ 55 ປີແຫ່ງການສ້າງຕັ້ງສາຍພົວພັນການທູດລາວ-ຫວຽດນາມ ແລະ ວັນຄົບຮອບ 40 ປີແຫ່ງສົນທິສັນຍາມິດຕະພາບ ແລະ ການຮ່ວມມືລະຫວ່າງລາວ-ຫວຽດນາມ, ການຮ່ວມມືໃນຂອບແມ່ນ້ຳຂອງ, ການຮ່ວມມືໃນພາກພື້ນ ແລະ ສາກົນ. ນອກນັ້ນສອງຝ່າຍຍັງໄດ້ປຶກສາຫາລືບັນ ຫາສາກົນທີ່ພົ້ນເດັ່ນທີ່ສອງຝ່າຍສົນໃຈຮ່ວມກັນ.

ໂອກາດຢ້ຽມຢາມ ສສ ຫວຽດນາມຄັ້ງນີ້, ສະຫາຍ ທອງລຸນ ສີສຸລິດ ຍັງໄດ້ເຂົ້າຢ້ຽມ

ຂໍ່ານັບສະຫາຍ ຫງວຽນ ຟູ້ ຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດ ນາມ, ເຂົ້າຢ້ຽມຂໍ່ານັບສະຫາຍ ເຈິນ ດາຍກວາງ ປະທານປະເທດ ແຫ່ງ ສສ ຫວຽດນາມ, ພົບປະກັບສະຫາຍນາງ ຫງວຽນ ທິ ກີມ ເງິນ ປະທານສະພາແຫ່ງຊາດ ສສ ຫວຽດນາມ, ຕ້ອນຮັບການເຂົ້າຢ້ຽມຂໍ່ານັບຂອງສະຫາຍປະທານສະມາຄົມມິດຕະພາບຫວຽດນາມ-ລາວ ແລະ ໄດ້ພົບປະກັບບັນດາສະຫາຍອະດີດການນຳ ສສ ຫວຽດນາມ ເຊັ່ນ: ສະຫາຍ ເຈືອງ ເຕິນ ຊາງ ອະດີດປະທານປະເທດ, ສະຫາຍ ຫງວຽນ ເຕິນ ຢຸ້ງ ອະດີດນາຍົກລັດຖະມົນຕີ ແລະ ສະຫາຍ ເລ ແທັງ ຫາຍ ອະດີດເລຂາພັກນະຄອນໂຮ່ຈິມິງ.