#
ວິເສດ ສະແຫວງສຶກສາ
ໃນສອງ-ສາມປີຜ່ານມານີ້ ສາຍການບິນຂອງຫລາຍໆປະເທດໃນໂລກໄດ້ເພີ່ມມາດຕະການປ້ອງກັນຄວາມປອດໄພບໍ່ໃຫ້ຕົກເປັນເປົ້າຂອງກຸ່ມຫົວຮຸນແຮງ
ແລະ ພວກກໍ່ການຮ້າຍ ເຊິ່ງເປັນໄພຂົ່ມຂູ່ໝາຍເລກໜຶ່ງສຳລັບສາຍການບິນພົນລະເຮືອນ.
ສິ່ງທ້າທາຍໃໝ່ຖັດຈາກການກໍ່ການຮ້າຍນັ້ນເກີດຈາກກະໂຕນັກບິນທີ່ມີສະພາບຈິດຜິດປົກກະຕິ
ຍ້ອນຄວາມຄຽດ ຫລື ຍ້ອນພະຍາດປະຈຳຕົວ. ນອກນັ້ນ ກໍຍັງມີໄພອັນຕະລາຍຈາກຜູ້ໂດຍສານທີ່ມີພຶດຕິກຳອັນຕະພານກໍ່ອາລະວາດຢູ່ໃນເຄື່ອງບິນ
ດັ່ງທີ່ເຄີຍເປັນຂ່າວຢູ່ເລື້ອຍໆ. ຢູ່ຟີລິບປິນ ຫວ່າງບໍ່ດົນມານີ້, ກໍໄດ້ມີການປັບປຸງລະບຽບກ່ຽວກັບຄວາມປອດໄພຂອງການບິນພົນລະເຮືອນໃຫ້ສອດຄ່ອງກັບລະບຽບການບິນຂອງປະເທດອື່ນໆ
ໂດຍເນັ້ນກ່ຽວກັບວັດຖຸສິ່ງຂອງທີ່ອະນຸຍາດ ແລະ ບໍ່ອະນຸຍາດໃຫ້ເອົາຂຶ້ນເຄື່ອງບິນ.
ຜ່ານມາ ຄົນໂດຍສານສາຍການບິນຟີລິບປິນໄດ້ພົບຫລາຍບັນຫາຢູ່ຕ່າງປະເທດ ເພາະສິ່ງທີ່ສາຍ
ການບິນຟີລິບປິນອະນຸຍາດນຳຂຶ້ນເຄື່ອງບິນຈຳນວນໜຶ່ງພັດເປັນສິ່ງຕ້ອງຫ້າມສຳລັບສາຍການບິນອື່ນໆ.
ດັ່ງນັ້ນ ຈຶ່ງເກີດມີກໍລະນີຜູ້ໂດຍສານຕິດແຮ້ວຄະດີຢູ່ປະເທດອື່ນ. ການປັບປຸງລະບຽບກ່ຽວກັບຄວາມປອດໄພຄັ້ງຫລ້າສຸດ
ໄດ້ມີການກຳນົດຫ້າມບໍ່ໃຫ້ຖືກັບໄຟ ຫລື ເຫລັກໄຟຂຶ້ນເຄື່ອງບິນເດັດຂາດ
ບໍ່ວ່າຈະເອົາໄວ້ໃນຖົງຖືຕິດໂຕ ຫລື ໃນຖົງເຄື່ອງຝາກ. ສ່ວນອາວຸດ, ຂອງມີຄົມ
ແລະ ອື່ນໆນັ້ນຕ້ອງໄດ້ຮັບອະນຸຍາດເປັນພິເສດ ແລະ ມີການຄວບຄຸມຄັກແນ່. ຢູ່ຫລາຍປະເທດໃນເອີຣົບໄດ້ມີການກຳນົດໃຫ້ນັກບິນ,
ຜູ້ຊ່ວຍນັກບິນຢູ່ໃນຫ້ອງຂັບບໍ່ຫລຸດສອງຄົນ, ຖ້າໃນກໍລະນີໃຜຜູ້ໜຶ່ງອອກໄປເຮັດທຸລະຢູ່ຫ້ອງນ້ຳກໍຕ້ອງໄດ້ເອີ້ນເອົາພະນັກງານປະຈຳເຄື່ອງບິນທີ່ຮູ້ເຕັກນິກການບິນມາຢູ່ປ່ຽນແທນ
ເພື່ອໃຫ້ມີສອງຄົນຢູ່ຫ້ອງຂັບສະເໝີ. ເມື່ອສອງປີກ່ອນໜ້ານີ້, ນັກບິນສຳຮອງເຄື່ອງບິນໂດຍສານສາຍການບິນເຈິເມິນວິງ
(German Wing) ໄດ້ຈົງໃຈຂັບຍົນຕຳພູແອນ (Alps) ໃນປະເທດຝຣັ່ງ ໃນຂະນະທີ່ເຂົາຢູ່ຫ້ອງຂັບພຽງຄົນດຽວ
ເພາະນັກບິນໃຫຍ່ໄປເຂົ້າຫ້ອງນ້ຳ. ນອກຈາກກຳນົດຈຳນວນນັກບິນທີ່ຕ້ອງມີໜ້າຢູ່ຫ້ອງຂັບແລ້ວ
ກໍຍັງໄດ້ປັບປຸງລະບົບກວດສຸຂະພາບຂອງນັກບິນ ທັງສຸຂະພາບດ້ານຮ່າງກາຍ ແລະ ສຸຂະພາບຈິດວ່າປົກກະຕິ
ຫລື ບໍ່. ຜົນພິສູດທາງການແພດຊີ້ອອກວ່າ ນັກບິນສຳຮອງຂອງ German Wing ທີ່ຂັບຍົນຕຳພູຄັ້ງນັ້ນມີສະພາບຈິດໃຈຜິດປົກກະຕິ.
ອີກບັນຫາໜຶ່ງທີ່ທຸກໆສາຍການບິນເອົາໃຈໃສ່ເປັນພິເສດ ກໍຄືຜູ້ໂດຍສານທີ່ມັກມີພຶດຕິກຳເປັນອັນຕະພານກໍ່ອາລະວາດໃນເຄື່ອງບິນ.
ເຊັ່ນກໍລະນີນັກບິນດື່ມເຄື່ອງມຶນເມົາກ່ອນຂຶ້ນຍົນ, ນັກບິນໃຊ້ອາລົມຂົ່ມຂູ່ພະນັກງານບໍລິການໃນເຄື່ອງບິນ
ຍ້ອນເສີບອາຫານບໍ່ຖືກປາກ ຫລື ຍ້ອນບໍ່ໄດ້ບ່ອນນັ່ງຕາມໃຈມັກ, ຄົນໂດຍສານປະເພດມືໄວຈັບຕ້ອງຮ່າງກາຍນາງອາກາດແບບນັກເລງ.
ນອກນີ້ກໍຍັງມີຄົນໂດຍສານທີ່ເວົ້າບໍ່ຄຶດ ຫລື ທີ່ເອີ້ນວ່າປະເພດ “ໄວປາກເສຍສິນ…”
ດັ່ງທີ່ເປັນຂ່າວວ່າມີຖ້ຽວບິນຕ່າງປະເທດຫລາຍຖ້ຽວຕ້ອງໄດ້ລົງຈອດສຸກເສີນ
ຫລື ເລື່ອນການບິນ ຍ້ອນມີຜູ້ໂດຍສານຂົ່ມຂູ່ວ່າມີລະເບີດໃນເຄື່ອງບິນ ຫລືບອກວ່າ
ຕົນມີລະເບີດໃນຫີບຫໍ່, ແຕ່ເມື່ອກວດແລ້ວບໍ່ພົບຫຍັງ. ຍ້ອນແນວນີ້ລະບຽບຄວາມປອດໄພຂອງສາຍການບິນຂອງປະເທດຕ່າງໆຈຶ່ງໄດ້ກຳນົດໂທດສຳລັບພວກ
“ໄວປາກ” ຢ່າງໜັກໜ່ວງກວ່າເກົ່າ.
ຢູ່ ສປ ຈີນ, ກົດລະບຽບການບິນພົນລະເຮືອນທີ່ມີມາແລ້ວເປັນເວລາ
20 ປີ ໄດ້ຮັບການປັບປຸງຄືນໃໝ່ ຫວ່າງບໍ່ດົນມານີ້ ໂດຍໄດ້ກຳນົດປ້ອງກັນຄວາມປອດໄພຈາກປັດໄຈ
“ຄົນ” ເປັນຕົ້ນຕໍ. ຄືພະນັກງານໃນອຸດສາຫະກຳການບິນທຸກຄົນໃນທົ່ວປະເທດຕ້ອງໄດ້ຜ່ານຂັ້ນຕອນການກວດສອບຊີວະປະຫວັດ
ໂດຍເນັ້ນທ່າອ່ຽງທີ່ອາດຈະມີການປະພຶດແບບອັນຕະພານ ຫລື ກໍ່ການຮ້າຍ. ກົດລະບຽບໄດ້ກຳນົດຫ້າມການກະທຳທີ່ທຳລາຍຄວາມສະຫງົບ
ແລະ ຄວາມເປັນລະບຽບຮຽບຮ້ອຍຂອງຜູ້ໂດຍສານທັງຢູ່ໃນເຄື່ອງບິນ ແລະ ຢູ່ພາກພື້ນດິນ
ເຊັ່ນການຂົ່ມຂູ່ພະນັກງານການບິນ, ການບໍ່ຍອມເຂົ້າແຖວຮັບບໍລິການຕາມທີ່ກຳນົດໄວ້,
ການທຳລາຍວັດຖຸສິ່ງຂອງພາຍໃນອາຄານການບິນ, ການຢືນກີດຂວາງບ່ອນກວດປີ້ໂດຍສານ
ແລະ ອື່ນໆ. ທາງການ ສປ ຈີນ ຖືວ່າປັດໄຈ “ຄົນ” ແມ່ນບັນຫາຕົ້ນຕໍໃນຂະບວນການປ້ອງກັນຄວາມປອດໄພໃຫ້ແກ່ການບິນພົນລະເຮືອນ,
ຖ້າຄົນເປັນໃຈ ຫລື ຮ່ວມຫົວກັບພວກກໍ່ການຮ້າຍແລ້ວ, ເຄື່ອງມືປ້ອງກັນຄວາມປອດໄພອື່ນໆກໍຈະບໍ່ມີປະໂຫຍດຫຍັງໝົດ.
ການສືບສວນກ່ຽວກັບເຫດວາງລະເບີດຢູ່ສະໜາມບິນບຣຸກແຊນຫວ່າງແລ້ວນີ້ພົບວ່າມີພະນັກງານໃນສະໜາມບິນຈຳນວນ
50 ຄົນເປັນໃຈໃຫ້ຄວາມສະດວກແກ່ມືລະເບີດ.
No comments:
Post a Comment