ຊາວພຸດລາວຮ່ວມໃສ່ບາດບຸນເຂົ້າພັນສາດ້ວຍຈິດໃຈຊື່ນບານ

        ເຊົ້າມື້ນີ້, ວັນທີ 19 ກໍລະກົດ, ຊຶ່ງກົງກັບຂຶ້ນ 15 ຄ່ຳ ເດືອນ 8 ລາວ ແລະ ເປັນມື້ເຂົ້າພັນສາຂອງພະສົງຕາມປະເພນີທີ່ໄດ້ສືບທອດກັນມາ, ຕາມຮີດ 12 ຄອງ 14 ຂອງຊາວພຸດລາວເຮົາ, ຊຶ່ງວັດຕ່າງໆໃນຂອບເຂດທຸກປະເທດຈະຈັດໃຫ້ມີພິທີຕັກບາດ, ຖວາຍສັງຄະທາດແຕ່ພະສົງແກ່ພະສົງດັ່ງທຸກໆປີຜ່ານມາ ແລະ ເຊົ້າມື້ນີ້ຊາວພຸດທະສາສະນິກະຊົນ ແລະ ອອກຕົນຍາດໂຍມຕ່າງກໍຈະປະດັບປະດາໄປດ້ວຍເຄື່ອງນຸ່ງໃໝ່ໆທັງຍິງ ແລະ ຊາຍ, ເດັກນ້ອຍ, ຜູ້ໃຫຍ່, ເຖົ້າແກ່ອາວຸໂສກໍຈະຖືຂັນ, ໂອທີ່ກະກອບໄປດ້ວຍວັດຖຸປັດໄຈ, ທູບທຽນ, ດອກໄມ້ບູຊາເພື່ອເຂົ້າມາວັດໃນເຂດບ້ານຂອງຕົນ, ເພື່ອຮ່ວມໃສ່ບາດ ແລະ ຟັງເທດສະໜາຢ່າງພ້ອມພຽງຮຽງໜ້າ ແລະ ຈິດໃຈຊື່ນບານ, ໂດຍໄດ້ນຳເອົາເຄື່ອງປັດໄຈທານຂອງຕົນໄປມອບແດ່ພະສົງສຳມະເນນດ້ວຍຈິດໃຈອັນຜ່ອງໃສ່, ເພື່ອສະນຶກເຖິງຄຸນຂອງພະຣັດຕະນະໄຕຣ 3 ປະການຄື: ຄຸນພະພຸດ, ພະທຳ ແລະ ພະສົງ, ພ້ອມທັງອຸທິດສ່ວນບຸນກຸສົນໄປເຖິງດວງວິນຍານຂອງບັນພະບູລຸດ, ຄຸນບິດາ, ມານດາ, ຄູບາອາຈານ ແລະ ຍາດຕິພີ່ນ້ອງທີ່ລວງລັບໄປແລ້ວນັ້ນໃຫ້ມາຮັບເອົາເຄື່ອງປັດໄຈທານຕ່າງໆດັ່ງກ່າວ, ພ້ອມກັນນີ້ກໍຍັງມີຜູ້ທີ່ມີຈິດໃຈໃສ່ສັດທາເປັນຈຳນວນຫຼາຍທີ່ຮ່ວມບໍລິຈາກເພື່ອອຸປະຖຳຄ້ຳຊູບຳລຸງພະພຸດທະສາສະໜາ, ເປັນຕົ້ນແມ່ນການສ້າງກຸຕິ, ສາລາຢູ່ຕາມວັດຕ່າງໆໃຫ້ເຫຼື້ອມໃສຕະຫຼອດມາ.

          ຕາມຄຳບອກເລົ່າຂອງຜູ້ເຖົ້າຜູ້ແກ່ໃຫ້ຮູ້ວ່າ: ວັນບຸນເຂົ້າພັນສາເປັນວັນວິສະຄະບູຊາຂອງພະສຳມາສຳພຸດທະເຈົ້າ, ທັງເປັນໄລຍະເຂົ້າຈຳພັນສາຂອງພະສົງເປັນເວລາ 3 ເດືອນທີ່ໄດ້ສືບທອດກັນມາແຕ່ສະໄໝພຸດທະການ, ຊຶ່ງການເຂົ້າພັນສານີ້, ແມ່ນເປັນຄຳຂໍຮ້ອງຂອງຊາວກະສິກອນໃນສະໄໜທີ່ພຸດທະການທີ່ຕ້ອງການໃຫ້ພະສົງສາວົກຂອງພະສຳມາສຳພຸດທະເຈົ້າຢຸດທຽວສັນຈອນໄປມາໃນໄລຍະລະດູຝົນ, ເນື່ອງຈາກວ່າເປັນລະດູທຳການຜະລິດຊອງຊາວກະສິກອນ, ເຮັດໃຫ້ເຄື່ອງປູກ ແລະ ໄຮ່ນາຕາກ້າເກີດຄວາມເສຍຫາຍ, ເມື່ອພະສຳມາສຳພຸດທະເຈົ້າໄດ້ຮັບຮູ້ເຊັ່ນນັ້ນແລ້ວ, ຈຶ່ງໄດ້ວາງຂໍບັນຍັດອອກມາວ່າ: ຫ້າມບໍ່ໃຫ້ພະສົງສາວົກທຽວສັນຈອນໄປມາໃນໄລຍະລະດູຝົນ, ໂດຍໃຫ້ຈຳພັນສາ, ເພື່ອບຳເພັນພຽງຈະເລີນເມດຕາພາວະນາຢູ່ຕາມອາຣາມ ຫຼື ວັດວາຂອງໃຜລາວເປັນໄລຍະເວລາ 3 ເດືອນ ນັບແຕ່ມື້ຂຶ້ນ 15 ຄ່ຳເດືອນ 8 ຈົນເຖິງມື້ຂຶ້ນ 15 ຄຳ່ເດືອນ 11 ເພັງ, ຊຶ່ງໄລະຍເຂົ້າພັນສານັ້ນແມ່ນຫ້າມພະສົງເຄື່ອນຍ້າຍສັນຈອນໄປ-ມາ ຫຼື ພັກແຮມຄ້າງຄືນຢູ່ວັດອື່ນທີ່ບໍ່ແມ່ນວັດຂອງຕົນໃນຍາມວິການ, ເວັ້ນເສຍແຕ່ກໍລະນີຈຳເປັນແຕ່ບໍ່ໃຫ້ເກີນ 7 ວັນ, ຖ້າຫາກພະສົງອົງໃດຢູ່ຈຳພັນສາບໍ່ຄົບ 3 ເດືອນຕາມກຳນົດ, ຖືວ່າພັນສາຂາດ ແລະ ພະອົງນັ້ນບໍ່ມີພັນສາເລີຍໃນປີນັ້ນ.