ຈະຈັດງານວາງສະແດງ Vientiane International Motor Expo ຄັ້ງທຳອິດຢູ່ລາວ

          ໃນກອງປະຊຸມຖະແຫຼ່ງຂ່າວທີ່ໄດ້ຈັດຂຶ້ນໃນວັນທີ 11 ກໍລະກົດນີ້, ທີ່ສະມາຄົມນັກຂ່າວແຫ່ງປະເທດລາວ ທ່ານ ສົມຫວັງ ນິນທະວົງ ຫົວໜ້າກົມສົ່ງເສີມ ແລະ ພັດທະນາສິນຄ້າ, ກະຊວງອຸດສາ ຫະກຳ ແລະ ການຄ້າ ແລະ ທ່ານ ພອນຈັນ ເພັງສຸວັນ ປະທານບໍລິສັດ ພີພີ ໄຊໂຍອິນເຕີເທັນເມັນ ແອນອໍກາໄນເຊີ ກຳຈັດ ຜູ້ດຽວໄດ້ຖະແຫຼງຕໍ່ສືມວນຊົນວ່າ: ໃນວັນທີ 30 ກັນຍາ - 6 ຕຸລາ 2016 ນີ້ບໍລິສັດຂອງຕົນຈະຮ່ວມກັບກະຊວງອຸດສາຫະກຳ ແລະ ການຄ້າຈັດງານວາງສະແດງລົດນາໆຊາດ( Vientiane International Motor Expo ) ຂຶ້ນເປັນຄັ້ງທຳອິດ, ຢູ່ສູນການຄ້າໄອເຕັກ, ນະຄອນ ຫຼວງວຽງຈັນ, ໂດຍຈະມີກິດ ຈະກຳຕ່າງໆເຊັ່ນ: ການ

ວາງສະແດງ ແລະ ໂຊສະມັດຕະພາບລົດຫຼາກຫຼາຍຍີ່ຫໍ້, , ການວາງສະແດງ ແລະ ຂາຍສິນຄ້າເຄື່ອງຈັກ, ເຄື່ອງໃຊ້ໄພຟ້າທີ່ທັນສະໄໝຕ່າງໆທັງພາຍໃນ ແລະ ຕ່າງປະເທດຫຼາຍກວ່າ  500 ບໍລິສັດເຂົ້າຮ່ວມ, ນອກນັ້ນຍັງຈະມີກິດຈະກຳສຳມະນາ ແລະ ການແຂ່ງຂັນລົດ ຈາກບໍລິສັດຕ່າງໆທີ່ເຂົ້າຮ່ວມງານຄື: ແຂ່ງດຣິບລົດ, ປະກວດລົດງານ, ແຂ່ງ ຂັນ ເຄື່ອງສຽງລົດ ແລະ ອື່ນໆ , ພິເສດແມ່ນຈະມີລົດ ແລະ ນະວັດຕະກຳທີ່ທັນສະໄໝມາຮ່ວມວາງສະ ແດງໃຫ້ຄົນລາວໄດ້ເບິ່ງໄດ້ຊົມ,ພ້ອມນັ້ນງານດັ່ງກ່າວຍັງເປີດໂອກາດໃຫ້ມີການພົບປະຂອງນັກທຸລະກິດ, ບໍລິສັດນຳເຂົ້າ ແລະ ຄ້າຂາຍລົດລະ ຫວ່າງພາຍໃນ ແລະ ຕ່າງປະເທດ.

          ຫົວໜ້າກົມສົ່ງເສີມ ແລະ ພັດທະນາສິນຄ້າໃຫ້ຮູ້ວ່າ: ງານດັ່ງກ່າວແມ່ນຈັດຂຶ້ນເປັນຄັ້ງທຳອິດຢູ່ ສປ ລາວ, ເພື່ອເປັນການຕ້ອນຮັບການເຂົ້າເປັນສະມາຊິກປະຊາຄົມເສດຖະກິດອາຊຽນ ແລະ ກອງປະຊຸມສຸດຍອດອາຊຽນທີ່ລາວໄດ້ຮັບກຽດເປັນເຈົ້າພາບທີ່ຈະຈັດຂື້ນໃນເດືອນກັນຍາທີ່ຈະມາເຖິງນີ້,ທັງເປັນການສະແດງປະສິດທິພາບຂອງສິນຄ້າ ເແລະ ການພັດທະນາເທັກໂນໂລ ຢິກ່ຽວກັບພາຫະນະທີ່ມີຊີ່ສຽງຂອງໂລກ ແລະ ໃນກຸ່ມປະເທດອາຊຽນດ້ວຍກັນ ໂດຍຜ່ານຊ່ອງທາງສົ່ງເສີມການຄ້າພາຍໃນປະເທດອາຊຽນ, ທັງເປັນການດຶງດູດການຄ້າ-ການລົງທຶນ ແລະ ການທ່ອງທ່ຽວຈາກຕ່າງປະ ເທດໃຫ້ເຂົ້າມາລາວໃຫ້ນັບມື້ຫຼາຍຂຶ້ນ, ເພື່ອເພີ່ມທາງເລືອກໃຫ້ແກ່ຜູ້ຊົມໃຊ້ຫຼາຍຂຶ້ນ, ທັງຈະປະກອບ ສ່ວນສຳຄັນເຂົ້າໃນການພັດທະນາເຕັກໂນໂລຊີຂອງປະເທດອີກດ້ວຍ.