25 ປີແຫ່ງການຄຸ້ມຄອງສັງຄົມດ້ວຍລັດຖະທຳມະນູນ

        ໃນໂອກາດສະເຫລີມສະຫລອງວັນສ້າງຕັ້ງລັດຖະທຳມະນູນແຫ່ງ ສປປ ລາວ ຄົບຮອບ 25 ປີ (15 ສິງຫາ 1991 - 15 ສິງຫາ 2016) ທ່ານປະທານສານປະຊາຊົນສູງສຸດ ຄຳພັນ ສິດທິດຳພາ ໄດ້ໃຫ້ສຳພາດຕໍ່ນັກຂ່າວພວກເຮົາເມື່ອວັນທີ 17 ສິງຫາຜ່ານມານີ້ວ່າ: ຕະຫລອດ 25 ປີຜ່ານມາ, ພວກເຮົາໄດ້ຫັນລັດຖະທຳມະນູນເປັນກົດໝາຍໄດ້ 119 ສະບັບ, ລັດຖະບັນຍັດ ແລະ ດຳລັດ ອີກຫລາຍຮ້ອຍສະບັບ, ຊຶ່ງເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍ ນັບມື້ເປັນລະບົບຄົບຊຸດເທື່ອລະກ້າວ, ເປັນພື້ນຖານຄ້ຳປະກັນໃຫ້ແກ່ການປະຕິບັດ ແລະ ເສີມຂະຫຍາຍສິດເປັນເຈົ້າຂອງປະຊາຊົນບັນດາເຜົ່າມີບາດກ້າວຂະຫຍາຍຕົວຕາມລຳດັບ, ພ້ອມທັງໂຄສະນາເຜີຍແຜ່ລັດຖະທຳມະນູນ ແລະ ກົດໝາຍໃຫ້ກວ້າງຂວາງດ້ວຍຫລາຍຮູບ, ຫລາຍສີເປັນການປະກອບສ່ວນໃນການຍົກສູງສະຕິເຄົາລົບລັດຖະທຳມະນູນ ແລະ ກົດໝາຍນັບມື້ສູງຂຶ້ນ, ທັງເອົາໃຈໃສ່ຊຸກຍູ້ຈັດຕັ້ງປະຕິບັດເຮັດໃຫ້ລະບົບການເມືອງຂອງລະບອບປະຊາທິປະໄຕ ປະຊາຊົນລາວ  ແລະ ປະຊາຊົນລາວບັນດາເຜົ່າ ມີບ່ອນອີງໃນການເຄື່ອນໄຫວທຳການຜະລິດ, ດຳເນີນທຸລະກິດ ແລະ ທຳມາຫາກິນຕາມລະບຽບກົດໝາຍຫລາຍຂຶ້ນ, ເຮັດໃຫ້ການເມືອງມີສະຖຽນລະພາບ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ. ແຕ່ຄຽງຄູ່ກັນນີ້ ເມື່ອກົດໝາຍໄດ້ຖືກປະກາດໃຊ້ຫລາຍກວ່າ 100 ສະບັບ, ແຕ່ບັນຫາຂໍ້ຂັດແຍ່ງ ກໍໄດ້ເກີດຂຶ້ນຢ່າງຫລວງຫລາຍໂດຍບໍ່ສາມາດຫລີກລ່ຽງໄດ້, ໃນບັນຫານີ້ພັກ-ລັດຖະບານ ໄດ້ຫັນເອົາແນວທາງນະໂຍບາຍ ອອກມາເປັນກົດໝາຍເພື່ອຄຸ້ມຄອງລັດ, ຄຸ້ມຄອງສັງຄົມດ້ວຍລະບຽບກົດໝາຍເພື່ອສ້າງໃຫ້ ສປປ ລາວ ກາຍເປັນລັດຄຸ້ມຄອງດ້ວຍກົດ ໝາຍ, ໂດຍການຮັບຮອງ ແລະ ປະກາດໃຊ້ຫລາຍຮ້ອຍສະບັບ, ພ້ອມທັງເອົາໃຈໃສ່ໂຄສະນາ, ເຜີຍ ແຜ່, ອະທິບາຍໃຫ້ປະຊາຊົນຮັບຮູ້ເຂົ້າໃຈ, ເພື່ອສ້າງສະຕິກົດໝາຍໃຫ້ທົ່ວສັງຄົມ ໄດ້ຮັບຮູ້ ແລະ ເຂົ້າ ໃຈລັດຖະທຳມະນູນ ແລະ ກົດໝາຍສະບັບຕ່າງໆຢ່າງຊັດເຈນ ແລະ ຈະແຈ້ງຂຶ້ນຕື່ມ. ເຖິງຢ່າງໃດກໍຕາມ ບໍ່ວ່າກົດໝາຍຈະປະກາດໃຊ້ຫລາຍຮ້ອຍສະບັບກໍຕາມ, ແຕ່ມີບຸກຄົນຈຳນວນໜຶ່ງຍັງຂາດສະຕິ, ສວຍໃຊ້ສ່ອງຫວ່າງຂອງກົດໝາຍ, ບາງຄົນແມ່ນມີເຈດຕະນາລະເມີດກົດໝາຍເປັນຕົ້ນ ຮັບຮູ້ວ່າມີລະບຽບກົດໝາຍຫ້າມໄວ້ ແຕ່ກໍຍັງລ່ວງລະເມີດກົດໝາຍ. ສະນັ້ນ ພວກເຮົາໃນຖານະເປັນຜູ້ຄຸ້ມຄອງກົດໝາຍ ກໍໄດ້ອີງໃສ່ກົດໝາຍເພື່ອນຳມາຈັດຕັ້ງປະຕິບັດໃສ່ໂທດກັບຜູ້ທຳຜິດກົດໝາຍແມ່ນນັບມື້ຫລາຍຂຶ້ນເລື້ອຍໆ. ເວົ້າລວມແລ້ວ ລັດຖະທຳມະນູນ ເປັນກົດໝາຍພື້ນຖານຂອງຊາດຂອງລະບອບປະຊາຊົນ ປະຊາທິປະໄຕ, ທັງເປັນໝາກຜົນລວມຍອດໃນການປະກອບຄວາມຄິດຄວາມເຫັນຢ່າງກວ້າງຂວາງ ຂອງປະຊາຊົນ ໃນທົ່ວປະເທດ ທີ່ສ່ອງແສງຢ່າງຈະແຈ້ງເຖິງເຈຈຳນົງຢ່າງສູງສົ່ງຍາວນານ ແລະ ຄວາມຕັດສິນໃຈອັນແຂງກ້າຂອງວົງຄານະຍາດ ທີ່ພ້ອມຈະສູ້ຊົນໃຫ້ບັນລຸຈຸດໝາຍ ສ້າງ ສາປະເທດຊາດໃຫ້ເປັນປະເທດສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ.
          ທ່ານ ປະທານສານປະຊາຊົນສູງສຸດ ກ່່າວວ່າ: ໄລຍະຜ່ານມາວຽກງານສານປະຊາຊົນເຫັນວ່າມີຄວາມຫຍຸ້ງຍາກຫລາຍປະການ, ແຕ່ມາຮອດປັດຈຸບັນ ແມ່ນມີຄວາມເຕີບໃຫຍ່ຂະຫຍາຍຕົວເປັນກ້າວໆ ສາມາດຮອງຮັບໜ້າທີ່ການເມືອງຂອງພັກ-ລັດ ທີ່ນັບມື້ນັບສູງຂຶ້ນ ແລະ ການເຊື່ອມໂຍງສາ ກົນ ແລະ ພາກພື້ນ. ສານປະຊາຊົນສູງສຸດເປັນທີ່ພຶ່ງ, ຄວາມໄວ້ເນື້ອເຊື່ອໃຈ ແລະ ການໃຫ້ຄວາມຮ່ວມມືຢ່າງດີຂອງພໍ່ແມ່ປະຊາຊົນ ຈຶ່ງເຮັດໃຫ້ການຕັດສິນຄະດີຂອງສານມີຄວາມຖືກຕ້ອງ ແລະ ມີຄວາມເປັນທຳຫລາຍຂຶ້ນ.