ລາວຈະດໍາເນີນຫລາຍມາດຕະການຊຸກຍູ້ແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII

          ກະຊວງແຜນການ ແລະ ການລົງທຶນ ໃຫ້ຮູ້ວ່າ: ປີ 2016 ນີ້, ແມ່ນປີເລີ່ມຕົ້ນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII (2016-2020), ຊຶ່ງແຜນດັ່ງກ່າວໄດ້ວາງຄາດໝາຍສໍາຄັນໄວ້ຄື: ສູ້ຊົນເຮັດໃຫ້ເສດຖະກິດຂະຫຍາຍຕົວຕໍ່ເນື່ອງສະເລ່ຍບໍ່ຫລຸດ 7,5% ຕໍ່ປີ, ຫັນໂຄງປະກອບເສດຖະກິດໄປຕາມທິດຫັນເປັນອຸດສະຫະກໍາທັນສະໄໝ, ໃນນັ້ນຂະແໜງກະສິກໍາ-ປ່າໄມ້ກວມເອົາ 19%, ອຸດສະຫະກໍາ 32% ແລະ ຂະແໜງບໍລິການກວມເອົາ 41% ຂອງລວມຍອດຜະລິດຕະພັນພາຍໃນ (GDP), ຂະນະທີ່ຄວາມຕ້ອງການແຫລ່ງທຶນເພື່ອການພັດທະນາປະເທດມີເຖິງ 223 ພັນຕື້ກີບ, ໃນນັ້ນການລົງທຶນຂອງພາກລັດກວມເອົາປະມານ 23-28% ຂອງການລົງທຶນທັງໝົດ ແລະ ເພື່ອໃຫ້ບັນລຸຄາດໝາຍດັ່ງກ່າວລັດຖະບານ

ຈະໄດ້ເພີ່ມທະວີຄວາມພະຍາຍາມຫລາຍຂຶ້ນໃນການນໍາໃຊ້ມາດຕະການຕ່າງໆ ເພື່ອສ້າງເງື່ອນໄຂຊຸກຍູ້ສົ່ງເສີມໃຫ້ບັນດາວິສາຫະກິດຂະໜາດນ້ອຍ ແລະ ກາງມີການຂະຫຍາຍຕົວຢ່າງເຂັ້ມແຂງ ແລະ ຍືນຍົງ, ໂດຍສະເພາະເສີມຂະຫຍາຍຂະແໜງປຸງແຕ່ງກະສິກໍາ ແລະ ການທ່ອງທ່ຽວໃຫ້ມີການຂະຫຍາຍຕົວກວ້າງ ຂວາງທັງຈາກການລົງທຶນຂອງພາກລັດ ແລະ ເອກະຊົນ, ສະໜອງການບໍລິການດ້ານການເງິນ, ນິຕິກໍາ, ລະບຽບການ ເພື່ອສ້າງຜູ້ປະກອບການໃຫ້ມີຄວາມພ້ອມທາງດ້ານເຕັກນິກວິຊາການສາມາດແຂ່ງຂັນຢູ່ຕະຫລາດພາຍໃນ ແລະ ສາກົນໄດ້, ປະຕິບັດນະໂຍບາຍພັດທະນາເສດຖະກິດຫລາຍພາກ ສ່ວນໃຫ້ເຂັ້ມແຂງ ທັງສາມາດຊ່ວຍໜູນເຊິ່ງກັນ ແລະ ກັນ, ຍົກປະສິດທິພາບຂອງລັດວິສາຫະກິດໃຫ້ຄວາມເຂັ້ມແຂງເພື່ອເປັນພື້ນຖານໃຫ້ແກ່ພາກສ່ວນເສດຖະກິດອື່ນໆ, ຂະນະດຽວກັນວິສາຫະກິດໃດບໍ່ມີປະສິດທິຜົນກໍຕ້ອງໃຫ້ຢຸດເຊົາ ຫລື ຫັນປ່ຽນຮູບແບບການດໍາເນີນທຸລະກິດ ເພື່ອໃຫ້ພາກເອກະຊົນກໍຄືທຸກພາກສ່ວນສັງຄົມມີຄວາມເປັນເຈົ້າການຕັ້ງໜ້າບຸກບືນດໍາເນີນທຸລະກິດຂອງຕົນມີຄວາມເຕີບໃຫຍ່ຢ່າງແຂງແຮງ, ແຕ່ລະທ້ອງຖິ່ນເອົາໃຈໃສ່ຄົ້ນຄວ້າ ແລະ ກໍານົດທ່າແຮງຕົ້ນຕໍຂອງຕົນ ເພື່ອນໍາໃຊ້ເຂົ້າໃນການປັບປຸງພື້ນຖານເສດຖະກິດໃຫ້ເຂັ້ມແຂງ, ມີຄຸນະພາບ ແລະ ຍືນຍົງ, ເລັ່ງລັດດໍາເນີນໂຄງການຂະໜາດໃຫຍ່ດ້ານພະລັງງານ, ທາງລົດໄຟ, ທາງດ່ວນ, ສະໜາມບິນ, ລະບົບຂົນສົ່ງຄ່ຽນຖ່າຍສີນຄ້າ ແລະ ອື່ນໆ ໃຫ້ເພື່ອອໍານວຍຄວາມສະດວກໃຫ້ແກ່ການຫັນເປັນອຸດສະຫະກໍາ ແລະ ທັນສະໄໝເທື່ອລະກ້າວ. ສ່ວນກົນໄກການຈັດຕັ້ງປະຕິບັດແມ່ນລັດຖະບານຈະອອກດໍາລັດຈັດຕັ້ງປະຕິບັດ ແລະ ມອບໃຫ້ກະຊວງແຜນການ ແລະ ການລົງທຶນ ອອກບົດແນະນໍາຈັດຕັ້ງປະຕິບັດດ້ານວິຊາການ ແລະ ທັງເປັນໃຈກາງປະສານງານລະຫວ່າງບັນດາຂະແໜງການຂັ້ນສູນກາງ ແລະ ທ້ອງຖິ່ນເພື່ອຜັນຂະຫຍາຍແຜນພັດທະນາໃຫ້ເປັນອັນລະອຽດ ແລະ ມີປະສິດທິຜົນສູງ, ຂະນະດຽວກັນບັນດາລັດຖະ ມົນຕີ, ເຈົ້າແຂວງ-ເຈົ້າຄອງ ຕ້ອງຍົກສູງຄວາມຮັບພິຊອບຢ່າງຈະແຈ້ງ ໂດຍນໍາໃຊ້ກົນໄກການຄຸ້ມຄອງຕາມທິດ 3 ສ້າງແຕ່ສູນກາງຮອດທ້ອງຖິ່ນເພື່ອໃຫ້ມີຄວາມສະດວກ ແລະ ສາມາດຈັດຕັ້ງປະຕິ ບັດຢ່າງມີຜົນສໍາເລັດ ແລະ ອັນສໍາຄັນແມ່ນຕ້ອງເພີ່ມທະວີການໂຄສະນາເຜີຍແຜ່ມະຕິກອງປະຊຸມໃຫຍ່ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII (2016-2020) ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ໃຫ້ພະນັກງານລັດຖະກອນ, ທະຫານ, ຕໍາຫລວດ, ປະຊາຊົນບັນດາເຜົ່າ, ນັກຮຽນ-ນັກສຶກສາ, ຜູ້ປະກອບການຫົວໜ່ວຍທຸລະກິດຕ່າງໆ ກໍາແໜ້ນເຊື່ອມຊືມ ແລະ ຜັນຂະຫຍາຍໃຫ້ປະກົດຜົນເປັນຈິງ.

           ກະຊວງດັ່ງກ່າວໃຫ້ຮູ້ວ່າ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VII ( 2011-2015) ເຫັນວ່າເສດຖະກິດຂອງປະເທດເຮົາໄດ້ມີການເຕີບໃຫຍ່ຢ່າງຕໍ່ເນື່ອງ ແລະ ໝັ້ນທ່ຽງ, ສັງຄົມມີຄວາມສະຫງົບປອດໄພໂດຍພື້ນຖານ, ຊຶ່ງສະແດງອອກຄື: ປະຊາຊົນມີວຽກເຮັດງານທໍາເພີ່ມຂຶ້ນ, ຊີວິດການເປັນຢູ່ນັບມື້ດີຂຶ້ນ, ອັດຕາເງິນເຟີ້ຢູ່ໃນລະດັບຕໍ່າ, ການຜະລິດຂອງຂະແໜງກະສິກໍາ, ອຸດສະຫະກໍາ ແລະ ບໍລິການ ໄດ້ເພີ່ມຂຶ້ນໃນລະດັບໜ້າພໍໃຈ, ການສົ່ງອອກ-ນໍາເຂົ້າສິນຄ້າ, ການລົງທຶນຂອງພາກລັດ ແລະ ເອກະຊົນເພີ່ມຂຶ້ນ, ອັດຕາຄວາມທຸກຍາກໄດ້ຫລຸດລົງເປັນລໍາດັບ ແລະ ໄດ້ຖືກຈັດເປັນປະເທດທີ່ມີການພັດທະນາມະນຸດລະດັບປານກາງ ແລະ ຢູ່ໃນອັນດັບທີ 139 ໃນຈໍານວນ 187 ປະເທດໃນໂລກ.