ລາວຈະສືບຕໍ່ສ້າງແຜນງານແຫ່ງຊາດຕ້ານການຄ້າມະນຸດ

            ສປປ ລາວຈະສືບຕໍ່ສ້າງແຜນງານແຫ່ງຊາດວ່າດ້ວຍການສະກັດກັ້ນ ແລະ ຕ້ານການຄ້າມະນຸດໃນໄລຍະແຕ່ປີ 2016-2020 ແລະ ຫາປີ 2025 ແລະ ວິໄສທັດຮອດ 2030, ພາຍຫລັງເຫັນວ່າການຈັດຕັ້ງປະຕິບັດແຜນງານເກົ່າທີ່ສ້າງຂຶ້ນແຕ່ປີ 2013-2015 ໄດ້ຮັບໝາກຜົນດີ.

           ການສ້າງແຜນງານສໍາຄັນດັ່ງກ່າວແມ່ນການຜັນຂະຫຍາຍນະໂຍບາຍ ແລະ ນິຕິກໍາຕ່າງໆ ເປັນຕົ້ນ: ດໍາລັດວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະຊີ້ນໍາລະດັບຊາດຕ້ານການຄ້າມະນຸດ, ຄໍາສັ່ງຂອງນາຍົກລັດຖະມົນຕີວ່າດ້ວຍການເພີ່ມທະວີວຽກງານສະກັດກັ້ນ ແລະ ແກ້ໄຂປາ ກົດການຫຍໍ້ທໍ້ໃນສັງຄົມ, ກົດໝາຍອາຍາ, ກົດໝາຍວ່າດ້ວຍການພັດທະນາ ແລະ ປົກປ້ອງແມ່ຍິງ, ກົດໝາຍວ່າດ້ວຍການປົກປ້ອງສິດ ແລະ ຜົນປະໂຫຍດຂອງເດັກນ້ອຍ ແລະ ອື່ນໆ ໃຫ້ເປັນເຄື່ອງມືສໍາຄັນໃນການຈັດຕັ້ງຜັນຂະຫຍາຍ ແລະ ປັບປຸງກົນໄກການປະສານງານລະຫວ່າງຂັ້ນສູນກາງກັບທ້ອງ ຖິ່ນ, ການຮ່ວມມືກັບ

ອົງການຈັດຕັ້ງສາກົນ, ໂຄສະນາປູກຈິດສໍານຶກກ່ຽວກັບຜົນຮ້າຍຕ່າງໆ, ຜົນກະ ທົບທີ່ເກີດຈາກການຄ້າມະນຸດ ແລະ ການຊ່ວຍເຫລືອທາງການແພດ, ກົດໝາຍ, ການສືກສາ, ຝຶກອົບຮົມວິຊາຊີບ ແລະ ການສ້າງວຽກເຮັດງານທໍາໃຫ້ຜູ້ເຄາະຮ້າຍຈາກການຄ້າມະນຸດ.      

            ແຜນງານນີ້ຈະຊ່ວຍປ້ອງກັນ ແລະ ປົກປ້ອງປະຊາຊົນບັນດາເຜົ່າບໍ່ໃຫ້ຕົກເປັນເຫຍື່ອຂະ ບວນການຄ້າມະນຸດ, ປົກປ້ອງສິດຜົນປະໂຫຍດອັນຊອບທໍາຂອງຜູ້ຖືກເຄາະຮ້າຍ ແລະ ປົກປ້ອງຖານະບົດບາດທາງການເມືອງ ແລະ ກຽດສັກສີຂອງປະເທດອີກດ້ວຍ.

           ທ່ານຮອງນາຍົກລັດຖະມົນຕີ ບຸນທອງ ຈິດມະນີ ໄດ້ກ່າວມີຄໍາເຫັນໃນໂອກາດສະເຫລີມ

ສະຫລອງວັນສາກົນເພື່ອຕ້ານການຄ້າມະນຸດວັນທີ 30 ກໍລະກົດຜ່ານມາວ່າ: ລາວ ເປັນປະເທດໜຶ່ງທີ່ບໍ່ປາສະຈາກໄດ້ບັນຫາການຄ້າມະນຸດ, ສະນັ້ນໃນໄລຍະຜ່ານມາ ພັກ ແລະ ລັດຖະບານຈຶ່ງໄດ້ຖືສໍາຄັນວຽກງານການສະກັດກັ້ນ ແລະ ຕ້ານການຄ້າມະນຸດ, ຊຶ່ງນອກຈາກມີນະໂຍບາຍ, ລະບຽບກົດໝາຍ ແລະ ໃຫ້ສັດຕະຍາບັນສົນທິສັນຍາສາກົນຕ່າງໆແລ້ວ, ພິເສດຍັງມີແຜນງານແຫ່ງຊາດວ່າດ້ວຍການສະກັດກັ້ນ ແລະ ຕ້ານການຄ້າມະນຸດທີ່ເປັນເຄື່ອງມືສໍາຄັນເພື່ອສະກັດກັ້ນ ແລະ ຕ້ານປະກົດການຫຍໍ້ທໍ້ດັ່ງກ່າວໃຫ້ມີຜົນ.