ລາວ-ອາເມລິກາ ຫາລືວຽກງານຊອກຫາຮ່ອງຮ່ອຍ ແລະ ສິ່ງເສດເຫລືອຂອງທະຫານອາເມລິກາ ທີ່ຫາຍສາບສູນໃນປາງສົງຄາມຢູ່ລາວ

          ກອງປະຊຸມຫາລືດ້ານເຕັກນິກ-ວິຊາການ ລະຫວ່າງ ລາວ-ອາເມລິກາ ກ່ຽວກັບວຽກງານຊອກຫາຮ່ອງຮ່ອຍ ແລະ ສິ່ງເສດເຫລືອຂອງອະດີດທະຫານອາເມລິກາທີ່ຫາຍສາບສູນໃນປາງສົງຄົມຢູ່ ສປປ ລາວ ປະຈຳປີ 2016, ໄດ້ຈັດຂຶ້ນໃນວັນທີ 3 ສິງຫານີ້, ທີ່ລັດຮາວ່າຍ ສະຫະລັດອາເມລິກາ, ຊຶ່ງຄະນະຜູ້ແທນລາວນຳໂດຍທ່ານ ຂັວນຕາ ຜາລີວົງ ຫົວໜ້າກົມເອີຣົບ-ອາເມລິກາ, ກະຊວງການຕ່າງປະເທດ ແລະ ຝ່າຍອາເມລິການນຳໂດຍທ່ານ ພົນຈັດຕະວາ Mark Spindler ຮອງຜູ້ບັນຊາການທະຫານຮ່ວມປະຈຳພາກພື້ນອາຊີ-ປາຊີຟິກ, ຮັບຜິດຊອບວຽກງານການຊອກຫາຮ່ອງຮອຍ ແລະ ສິ່ງເສດເຫລືອຂອງທະຫານອາເມລິກາທີ່ຫາຍສາບສູນໃນປາງສົງຄາມ ແລະ ທ່ານ ດານຽວ ຄລູນ ເອກອັກຄະລັດຖະທູດແຫ່ງ ສະຫະລັດອາເມລິກາປະຈຳ ສປປ ລາວ.

          ໃນກອງປະຊຸມ ທັງສອງຝ່າຍໄດ້ທົບທວນຄືນການປະຕິບັດແຜນການຮ່ວມມືໃນໄລຍະ 1 ປີຜ່ານມາ, ກ່ຽວກັບວຽກງານການສຳຫລວດ, ຂຸດຄົ້ນເພື່ອຊອກຫາຮ່ອງຮອຍ ແລະ ສິ່ງເສດເຫລືອຂອງອະດີດທະຫານອາເມລິກາທີ່ຫາຍສາບສູນໃນປາງສົງຄາມຢູ່ລາວ ຢູ່ແຂວງຫົວພັນ, ຊຽງຂວາງ, ບໍລິຄຳໄຊ, ຄຳມ່ວນ, ສາລະວັນ, ເຊກອງ ແລະ ອັດຕະປື. ພ້ອມທັງໄດ້ປຶກສາຫາລືກັນໃນການວາງແຜນການປະຕິບັດງານຮ່ວມລະອຽດໃນສົກປີຕໍ່ໜ້າ. ຈາກນັ້ນ ສອງຝ່າຍໄດ້ຕົກລົງສືບຕໍ່ເພີ່ມທະວີການຮ່ວມມືໃນການຊອກຫາຂໍ້ມູນຂ່າວສານ, ການສຳຫລວດກ່ອນການຂຸດຄົ້ນ ແລະ ເຫັນດີໃຫ້ມີການຮ່ວມມື 3 ຝ່າຍຄື: ລາວ-ຫວຽດນາມ-ອາເມລິກາ ລະດັບວິຊາການເພື່ອເຮັດໃຫ້ການປະຕິບັດວຽກງານ MIA ໄດ້ມີປະສິດທິຜົນ ແລະ ວ່ອງໄວກ່ວາເກົ່າ, ລວມທັງການຊ່ວຍເຫລືອດ້ານມະ ນຸດສະທຳໃຫ້ແກ່ທ້ອງຖິ່ນເຂດທີ່ມີການປະຕິບັດການສຳຫລວດ ແລະ ຂຸດຄົ້ນ. ໃນໂອກາດນີ້ຝ່າຍລາວໄດ້ຢືນຢັນຄືນບົນຈິດໃຈແນວທາງນະໂຍບາຍທາງດ້ານມະນຸດສະທຳ ແລະ ອີງຕາມເງື່ອນໄຂຄວາມສາ ມາດຕົວຈິງຂອງຕົນ. ສ່ວນຝ່າຍອາເມລິກາ ກໍໄດ້ຕີລາຄາສູງຕໍ່ການຊ່ວຍເຫລືອລັດຖະບານລາວ ກໍຄືອຳນາດການປົກຄອງທ້ອງຖິ່ນຂອງລາວໃນການຮ່ວມມືດ້ານມະນຸດສະທຳດັ່ງກ່າວນີ້, ທີ່ເປັນສ່ວນປະກອບໃຫ້ແກ່ການຂະຫຍາຍການຮ່ວມມືຂອງສອງປະເທດໃນໄລຍະຫລາຍກວ່າ 30 ປີຜ່ານມາ, ພ້ອມທັງໄດ້ຢືນຢັນຈະສືບຕໍ່ໃຫ້ການຊ່ວຍເຫລືອດ້ານມະນຸດສະທຳແກ່ປະຊາຊົນທ້ອງຖິ່ນກໍຄືລັດ ຖະບານລາວ ເພື່ອປະກອບສ່ວນເສີມຂະຫຍາຍການພົວພັນຮ່ວມມືລະຫວ່າງສອງປະເທດລາວ-ອາເມ   ລິກາ ໃຫ້ມີບັນຍາກາດນັບມື້ນັບດີຂຶ້ນ ເພື່ອຜົນປະໂຫຍດຊຶ່ງກັນ ແລະ ກັນ.

          ການຮ່ວມມື, ການສຳຫລວດ ແລະ ຂຸດຄົ້ນເພື່ອຊອກຫາຮ່ອງຮອຍ ແລະ ສິ່ງເສດເຫລືອຂອງອະດີດທະຫານອາເມລິການທີ່ຫາຍສາບສູນໃນປາງສົງຄາມຢູ່ລາວ ໄດ້ດຳເນີນມາແຕ່ປີ 1982 ມາເຖິງປັດຈຸບັນນີ້ເປັນເວລາ 34 ປີແລ້ວ ຊຶ່ງສອງຝ່າຍສາມາດຊອກຫາ, ຂຸດຄົ້ນສິ່ງເສດເຫລືອຂອງອະດີດທະຫານອາເມລິການທີ່ຫາຍສາບສູນໃນປາງສົງຄາມຢູ່ລາວ, ສຳເລັດແລ້ວຈຳນວນ 272 ກໍລະນີ ໃນຈຳນວນ 573 ກໍລະນີ ແລະ ຍັງເຫລືອຈະສືບຕໍ່ຊອກຫາຂຸດຄົ້ນອີກ 301 ກໍລະນີ.