ກອງປະຊຸມສຸດຍອດອາຊຽນຄັ້ງທີ 28, 29 ໄຂຂຶ້ນຢ່າງເປັນທາງການໃນມື້ນີ້

            ກອງປະຊຸມສຸດຍອດອາຊຽນຄັ້ງທີ 28,29 ແລະ ກອງປະຊຸມທີ່ກ່ຽວຂ້ອງອື່ນໆ, ໄດ້ໄຂຂຶ້ນຢ່າງເປັນທາງການໃນວັນທີ 6-8 ກັນຍານີ້, ທີ່ສູນປະຊຸມແຫ່ງຊາດ, ນະຄອນຫລວງວຽງຈັນ. ໂດຍພະນະທ່ານ ບຸນຍັງ ວໍລະຈິດ, ປະທານປະເທດແຫ່ງ ສ ປປ ລາວ ຈະໃຫ້ກຽດກ່າວສູນທອນພົດເປີດກອງປະຊຸມສໍາຄັນດັ່ງກ່າວ.

             ສໍາລັບກອງປະຊຸມສຸດຍອດອາຊຽນຄັ້ງທີ 28 ຈະປຶກສາຫາລືກ່ຽວກັບການຮັດແໜ້ນປະຊາຄົມອາຊຽນ ກໍຄືການຜັນຂະຫຍາຍວິໄສທັດອາຊຽນ 2025 ແລະ ທິດທາງຕ່າງໆໃນຕໍ່ໜ້າ ແລະ ສ່ວນກອງປະຊຸມສຸດຍອດອາຊຽນຄັ້ງທີ 29 ຈະປຶກສາຫາລື ກ່ຽວກັບການຮ່ວມມືອາຊຽນກັບພາຍນອກ ແລະ ແລກປ່ຽນຄວາມຄິດຄວາມເຫັນ ກ່ຽວກັບບັນຫາພາກພື້ນ ແລະ ສາກົນ

ທີ່ມີຄວາມເປັນຫ່ວງ ແລະ ສົນໃຈຮ່ວມກັນ. ສ່ວນກອງປະຊຸມສຸດຍອດອາຊຽນກັບຄູ່ເຈລະຈາຈະໄດ້ທົບທວນການຮ່ວມມືໃນໄລຍະຜ່ານມາ ແລະ ປຶກສາຫາລືທິດທາງການຮ່ວມມືໃນຕໍ່ຫນ້າ ແລະ ແລກປ່ຽນຄວາມຄິດເຫັນກ່ຽວກັບບັນຫາພາກພື້ນ ແລະ ສາກົນ. ກອງປະຊຸມສຸດຍອດອາຊຽນບວກສາມ (ສປ ຈີນ, ຍີ່ປຸ່ນ ແລະ ສ.ເກົາຫລີ) ຄັ້ງທີ 19 ແລະ ກອງປະຊຸມສຸດຍອດອາຊີຕາເວັນອອກ ຄັ້ງທີ 11 ປະກອບມີປະມຸກລັດ, ຫົວໜ້າລັດຖະບານ ແລະ ຜູ້ນໍາຈາກ 18 ປະເທດເຂົ້າຮ່ວມ (10 ປະເທດອາຊຽນ, ຈີນ, ຍີ່ປຸ່ນ, ສ.ເກົາຫລີ, ລັດເຊຍ, ອົດສະຕາລີ, ນິວຊີແລນ, ອິນເດຍ ແລະ ສະຫະລັດອາເມລິກາ) ຈະໄດ້ທົບທວນການຮ່ວມມືໃນໄລຍະຜ່ານມາ ແລະ ກຳນົດທິດທາງການຮ່ວມມືໃນຕໍ່ຫນ້າ ແລະ ແລກປ່ຽນຄວາມຄິດ ຄວາມເຫັນ ກ່ຽວກັບ ບັນຫາພາກພື້ນ ແລະ ສາກົນ.  

             ນອກຈາກນີ້, ຍັງມີກອງປະຊຸມປີ່ນອ້ອມສໍາຄັນຕ່າງໆຄື: ກອງປະຊຸມສຸຍອດອາຊຽນ-ຈີນຄັ້ງທີ 19 ເພື່ອສະເຫລີມສະຫລອງການພົວພັນຄົບຮອບ 25 ປີ, ກອງປະຊຸມສຸດຍອດອາຊຽນ-ຍີ່ປຸ່ນຄັ້ງທີ 19, ກອງປະຊຸມສຸດຍອດອາຊຽນ-ສ ເກົາຫລີຄັ້ງທີ 18, ກອງປະຊຸມສຸດຍອດອາຊຽນບວກສາມຄັ້ງທີ 19, ກອງປະຊຸມສຸດຍອດອາຊຽນ-ອົດສະຕຣາລີຄັ້ງທຳອິດ, ກອງປະຊຸມສຸດຍອດອາ ຊຽນ-ສະຫະປະຊາຊາດຄັ້ງທີ 8, ກອງປະຊຸມສຸດຍອດອາຊຽນ-ອິນເດຍຄັ້ງທີ 14, ກອງປະຊຸມສຸດຍອດອາຊຽນ-ສະຫະລັດອາເມລິກາຄັ້ງທີ 4 ແລະ ກອງປະຊຸມສຸດຍອດອາຊີຕາເວັນອອກຄັ້ງທີ 11. ພ້ອມນີ້, ຍັງມີກອງປະຊຸມສຸດຍອດແມ່ນ້ຳຂອງ-ຍີ່ປຸ່ນຄັ້ງທີ 8 ອີກດ້ວຍ.