ກອງປະຊຸມເຈົ້າໜ້າທີ່ອາວຸໂສໄດ້ກະກຽມຫລາຍບັນຫາໃຫ້ແກ່ກອງປະຊຸມສຸດຍອດອາຊຽນ

          ກອງປະຊຸມເຈົ້າໜ້າທີ່ອາວຸໂສອາຊຽນໄດ້ໄຂຂຶ້ນຢ່າງເປັນທາງການໃນວັນທີ 5 ກັນຍານີ້, ທີ່ຫໍປະຊຸມແຫ່ງຊາດ, ໂດຍການເປັນປະທານຂອງທ່ານ ອາລຸນແກ້ວ ກິດຕິຄຸນ ລັດຖະມົນຕີປະຈຳສຳນັກ ງານນາຍົກລັດຖະມົນຕີ, ຫົວໜ້າເຈົ້າໜ້າທີ່ອາວຸໂສອາຊຽນ ຂອງລາວ, ໂດຍມີບັນດາຫົວໜ້າເຈົ້າໜ້າທີ່ອາວຸໂສຈາກປະເທດສະມາຊິກອາຊຽນ, ຮອງເລຂາທິການໃຫຍ່ອາຊຽນ ຜູ້ຮັບຜິດຊອບເສົາຄ້ຳການເມືອງ-ຄວາມໝັ້ນຄົງອາຊຽນເຂົ້າຮ່ວມນຳດ້ວຍ.

          ກອງປະຊຸມ ໄດ້ສຸມໃສ່ກະກຽມເນື້ອໃນສຳຄັນຕ່າງໆໃຫ້ແກ່ກອງປະຊຸມສຸດຍອດອາຊຽນ ແລະ ກອງປະຊຸມສຳຄັນອື່ນໆທີ່ຈະຈັດຂຶ້ນໃນວັນທີ 6-8 ກັນຍານີ້, ທີ່ນະຄອນຫລວງວຽງຈັນເຊັ່ນ: ການກະກຽມໃຫ້ແກ່ການລົງນາມຮັບເອົາຊີລີ, ອີຢິບ ແລະ ມາຣົກ ເຂົ້າເປັນພາຄີຂອງສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້, ກອງປະຊຸມສະພາປະຊາຄົມການເມືອງ-ຄວາມໝັ້ນຄົງອາຊຽນ

ຄັ້ງທີ 14, ກອງປະຊຸມສະພາປະສານງານອາຊຽນຄັ້ງທີ 18, ກອງປະຊຸມສຸດຍອດອາ ຊຽນຄັ້ງທີ 28, 29, ການພົບປະລະຫວ່າງຜູ້ນຳອາຊຽນກັບຜູູ້ຕາງໜ້າສະມັດຊາລັດຖະສະພາລະ ຫວ່າງຊາດອາຊຽນ, ຊາວໜຸ່ມອາຊຽນ ແລະ ສະພາທີ່ປຶກສາທຸລະກິດອາຊຽນ, ກອງປະຊຸມສຸດຍອດອາຊຽນ-ອົດສະຕາລີ ທຸກໆ 2 ປີຄັ້ງທີ 1, ກອງປະຊຸມສຸດຍອດອາຊຽນ-ຈີນຄັ້ງທີ 19 ເພື່ອສະເຫລີມ ສະຫລອງສາຍພົວພັນອາຊຽນ-ຈີນ ຄົບຮອບ 25 ປີ, ກອງປະຊຸມສຸດຍອດອາຊຽນ-ສ.ເກົາຫລີ ຄັ້ງທີ 18, ກອງປະຊຸມສຸດຍອດອາຊຽນ-ອົງການ ສປຊ ຄັ້ງທີ 8, ກອງປະຊຸມສຸດຍອດອາຊຽນ-ອິນເດຍ ຄັ້ງທີ 14, ກອງປະຊຸມສຸດຍອດອາຊຽນບວກສາມຄັ້ງທີ 19 ແລະ ກອງປະຊຸມສຸດຍອດອາຊີຕາເວັນອອກຄັ້ງທີ 11. ພິເສດ ບັນດາເຈົ້າໜ້າທີ່ອາວຸໂສ ໄດ້ຜ່ານແຜນການເຄື່ອນໄຫວ, ຫົວຂໍ້ການປຶກສາຫາລື ແລະ ບັນດາເອກກະສານທີ່ຈະເປັນຜົນຂອງກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແລະ ບັນດາກອງປະຊຸມສຸດຍອດທີ່ກ່ຽວຂ້ອງອື່ນໆອີກດ້ວຍ.