laophatthananewspaper: ເສັ້ນທາງທ່າເດື່ອຍ່ານຂົວມິດຕະພາບໄປຫາທ່ານາແລ້ເປ່ເພໜັກສ້າງຄວາມລຳບາກຕໍ່ການສັນຈອນ

ເສັ້ນທາງທ່າເດື່ອນັບແຕ່ເຂດໜ້າທາງເຂົ້າຂົວມິດຕະພາບວຽງຈັນ-ໜອງຄາຍໄປຫາຍ່ານສາງທ່ານາແລ້ງເມືອງຫາດຊາຍຟອງ ນະຄອນຫລວງວຽງຈັນ ມີສະພາບເປ່ເພໜັກອັນໄດ້ສ້າງຄວາມລຳບາກຕໍ່ການສັນຈອນໄປມາຂອງປະຊາຊົນຢູ່ເຂດດັ່ງກ່າວ, ຂະ ນະທີ່ພະແນກໂຍທາທິການ ແລະ ຂົນສົ່ງກໍຮັບຮູ້ບັນຫາການເປ່ເພຂອງເສັ້ນທາງດັ່ງກ່າວແລ້ວ ແລະ ຢູ່ໃນການຄົ້ນຄວ້າເພື່ອຂຶ້ນ ແຜນສ້ອມແປງ.

ເສັ້ນທາງດັ່ງກ່າວນັບວ່າເປັນເສັ້ນທາງສຳຄັນສາຍໜຶ່ງຂອງນະຄອນຫລວງວຽງຈັນເຊິ່ງແຕ່ລະວັນຈະມີພາຫະນະຜ່ານໄປມາເປັນຈຳນວນຫລາຍ ເຊັ່ນ:ລົດຂົນສົ່ງສີນຄ້າຜົນຜະລິດຂອງປະຊາ ຊົນ ທີ່ຂົນສົ່ງເຂົ້າມາຈຳໜ່າຍຢູ່ຕະຫລາດໃນຕົວເມືອງ,ລົດບັນ ທຸກ ເນື່ອງຈາກມີສາງພັກສີນຄ້າ ແລະ ສະຖານີລົດໄຟທ່ານາແລ້ງ, ລົດບໍລິການທ່ອງທ່ຽວ ຍ້ອນມີ ແຫລ່ງທ່ອງທ່ຽວທາງວັດທະນາທຳທີ່ລືຊື່ “ວັດຊຽງຄວນ” ການ ຂົນສົ່ງຫີນຊາຍ ແລະອື່ນໆ.ສະນັ້ນ ຈຶ່ງຖືວ່າເສັ້ນທາງດັ່ງກ່າວແມ່ນເສັ້ນທາງຍຸດທະສາດເສດຖະກິດຂອງນະຄອນຫລວງວຽງຈັນ.ແຕ່ຫລາຍປີຜ່ານມາ ກໍຕົກຢູ່ໃນສະພາບເປ່ເພອັນໄດ້ສ້າງຄວາມຫຍຸ້ງຍາກລຳ ບາກໃຫ້ແກ່ການສັນຈອນໄປມາຕະຫລອດທັງປີຍາມແລ້ງກໍເປັນຂຸມມີຂີ້ຝຸ່ນປິວໄງ່ໄປທົ່ວ,ຍາມຝົນພັດເກີດ ມີນ້ຳຖ້ວມອັ່ງເປັນບໍລິເວນກວ້າງ ແລະ ເປັນຂຸມເລິກອັນໄດ້ສ້າງຄວາມສັບສົນ ແລະ ເປື້ອນຫລາຍສົມຄວນຕໍ່ຜູ້ທຽວທາງເປັນຈຳນວນບໍ່ໜ້ອຍ ແລະ ບໍ່ສາມາດຫລີກເວັ້ນຈາກຄວາມຫຍຸ້ງຍາກລຳບາກດັ່ງກ່າວໄດ້ຍ້ອນບໍ່ມີເສັ້ນທາງອື່ນຜ່ານໄປໄດ້.

ປະຊາຊົນທ່ານໜຶ່ງທີ່ອາໄສຢູ່ໃກ້ເສັ້ນທາງດັ່ງກ່າວເວົ້າສູ່ນັກຂ່າວໜັງສືພິມລາວພັດທະນາຟັງວ່າ:ລົດທີ່ຜ່ານເສັ້ນທາງດັ່ງ ກ່າວ ສ່ວນຫລາຍແມ່ນລົດບັນທຸກໜັກ ທັງພາຍໃນ ແລະ ລົດຈາກປະເທດໃກ້ຄຽງ ຈຶ່ງເຮັດໃຫ້ເສັ້ນ ທາງເປ່ເພໄວຄືດັ່ງທີ່ເປັນຢູ່ໃນປັດຈຸບັນ, ມີຫລາຍເທື່ອທີ່ລົດນັກທ່ອງຈະໄປທ່ຽວຊົມວັດຊຽງຄວນ ແຕ່ມາເຫັນສະພາບເສັ້ນທາງທີ່ເປ່ເພແລ້ວກໍຕ້ອງໄດ້ກັບຄືນ ເຊິ່ງຖ້າບໍ່ໄດ້ຮັບການສ້ອມແປງໂດຍໄວແລ້ວ ມັນບໍ່ພຽງແຕ່ຈະເຮັດໃຫ້ການໄປມາມີຄວາມຫຍຸ້ງຍາກເທົ່ານັ້ນ,ແຕ່ມັນຈະສົ່ງຜົນກະທົບຕໍ່ລາຍຮັບຂອງແຫລ່ງທ່ອງທ່ຽວວັດຊຽງຄວນນຳດ້ວຍ.

ແນວໃດກໍຕາມ ນັກຂ່າວໜັງສືພີມລາວພັດທະນາໄດ້ສອບຖາມທ່ານ ເດດສົງຄາມ ທຳມະວົງ ຫົວ ໜ້າພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນ ກ່ຽວກັບການສ້ອມແປງເສັ້ນທາງດັ່ງກ່າວ ໂດຍທ່ານກ່າວວ່າ: ພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນ ໄດ້ຮັບການລາຍງານກ່ຽວກັບການສະພາບການເປ່ເພຂອງເສັ້ນທາງໃນຈຸດດັ່ງກ່າວແລ້ວ, ເຊິ່ງກໍມີຄວາມເຫັນໃຈ ແລະ ເປັນຫວ່ງທີ່ສຸດຕໍ່ການສັນຈອນໄປມາຂອງປະຊາ ຊົນຢູ່ເຂດດັ່ງກ່າວ,ສ່ວນການແກ້ໄຂນັ້ນແມ່ນຈະຕ້ອງໄດ້ມີການຄົ້ນຄວ້າຢ່າງລະອຽດໃນດ້ານງົບ ປະມານ ເພາະວ່າຈະຕ້ອງໄດ້ນຳໃຊ້ເງິນເປັນຈຳນວນຫລາຍເຂົ້າ ໃນການສ້ອມແປງ.