laophatthananewspaper: ສະຖາບັນການເງິນຈຸລະພາກ ເມືອງ ນາຊາຍທອງ ເປັນສ່ວນປະກອບສຳຄັນໃນການແກ້ໄຂຄວາມທຸກຍາກຂອງປະຊາຊົນ

ກະສິກອນເມືອງນາຊາຍ ທອງ ນະຄອນຫຼວງວຽງຈັນ ແລະ ບາງເຂດຂອງແຂວງ ວຽງຈັນ ໄດ້ພົບທາງເລືອກໃໝ່ໃນການເຂົ້າຫາແຫຼ່ງທຶນການຜະລິດສິນ ຄ້າກະສິກຳ ແລະ ການບໍລິການ ພາຍຫຼັງໄດ້ສ້າງຕັ້ງສະຖາບັນການເງິນຈຸລະພາກທີ່ຮັບເງິນ ຝາກພັດທະນາ ແລະ ບໍລິການເງິນກູ້ຢູ່ເມືອດັ່ງກ່າວ. ຜູ້ອຳນວຍ ການສະຖາບັນການເງິນດັ່ງກ່າວ ຊີ້ໃຫ້ເຫັນວ່າ: ການສະໜອງປັດໄຈທຶນຮອນໃນໄລຍະຜ່ານມາໄດ້ຊ່ວຍເຮັດໃຫ້ຄຸນນະພາບ ແລະ ລະດັບຊີວິດການເປັນຢູ່ຂອງປະ ຊາຊົນດີຂຶ້ນ ພ້ອມກຽມເພີ່ມງົບ ປະມານເຂົ້າໃນກອງທຶນເພື່ອສ້າງເງື່ອນໄຂ ແລະ ການບໍລິການໃໝ່ໃຫ້ຫລາຍກວ່າເກົ່າ.

ທ່ານ ຄຳປະສົງ ມຸນິວົງ ຜູ້ອຳນວຍການສະຖາບັນການເງິນຈຸລະພາກ ເມືອງ ນາຊາຍທອງ ໄດ້ໃຫ້ສຳພາດຕໍ່ນັກຂ່າວລາວພັດທະນາວ່າ: ສະຖາບັນການເງິນຂອງຕົນໄດ້ຮັບການສ້າງຕັ້ງຂຶ້ນໃນປີ 2001 ເຊິ່ງໃນເບື້ອງຕົ້ນເລີມຈາກກອງທຶນສະ ຫະກອນ ໂດຍໄດ້ຮັບການອະນຸ ຍາດສ້າງຕັ້ງຢ່າງເປັນທາງການຈາກທະນາຄານກາງ ແລະ ໄດ້ຮັບໃບທະບຽນເປີດສະຖາບັນການເງິນທີ່ຮັບເງິນຝາກຈາກກະຊວງອຸດສາຫະກຳ ແລະ ການຄ້ານັບແຕ່ເດືອນຕຸລາ 2010 ແນໃສ່ເຮັດໃຫ້ປະຊາຊົນມີທຶນຮອນ ພຽງພໍ ເພື່ອນຳໃຊ້ເຂົ້າໃນການ ປູກຟັງ, ລ້ຽງສັດ, ການຜະລິດ ເຄື່ອງຫັດຖະກຳ ແລະ ການບໍລິ ການຕ່າງໆ.ພ້ອມນັ້ນ ຍັງໄດ້ສະ ໜອງເງິນກູ້ໃຫ້ແກ່ປະຊາຊົນ ເພື່ອນຳໃຊ້ເຂົ້າໃນການ

ດຳເນີນທຸລະກິດ ແລະ ອື່ນໆ ເປັນຕົ້ນແມ່ນການປູກເຂົ້ານາປີ, ນາແຊງ ແລະ ການປູກພືດຊະນິດຕ່າງໆໃນອັດ ຕາດອກເບ້ຍ 5 % ຕໍ່ເດືອນ ແລະ ສາມາດໃຫ້ເງິນກູ້ໄດ້ຕ່ຳສຸດ 10 ລ້ານກີບຂຶ້ນໄປສຳລັບການປູກພືດກະສິກຳ ແລະ 10 % ຂອງທຶນຈົດທະບຽນທັງໝົດສຳລັບທຸ ລະກິດ ແລະ ການບໍລິການຕ່າງໆ.

ຜູ້ອຳນວຍການ ກ່າວວ່າ: ນັບແຕ່ໄດ້ຮັບການສ້າງຕັ້ງສະຖາບັນການເງິນດັ່ງກ່າວເປັນຕົ້ນມາ ກອງທຶນໄດ້ປະກອບສວ່ນເຮັດໃຫ້ຄຸນນະພາບ ແລະ ລະດັບຊີວິດການເປັນຢູ່ຂອງປະຊາຊົນດີຂຶ້ນກວ່າເກົ່າ, ເຮັດໃຫ້ປະຊາຊົນມີທຶນຮອນພຽງພໍເຂົ້າໃນການຜະ ລິດສິນຄ້າ ແລະ ມີລາຍຮັບຈາກການຜະລິດຂອງເຂົາເຈົ້ານັບມື້ ນັບຫຼາຍຂຶ້ນ ແລະ ເຫັນວ່າ ໄດ້ຮັບຄວາມສົນໃຈຈາກປະຊາຊົນເປັນຢ່າງດີ ເຊິ່ງມັນສະແດງອອກຈຳນວນຜູ້ມາໃຊ້ບໍລິການເງິນກູ້ ແລະ ເງິນຝາກນັບມື້ນັບເພີ່ມຂຶ້ນ ເຮັດໃຫ້ສະຖາບັນການເງິນແຫ່ງນີ້ໄດ້ກາຍເປັນສະຖາບັນໜຶ່ງທີ່ໄດ້ຮັບຄວາມເຊື່ອໝັ້ນ ແລະ ໄວ້ເນື້ອເຊື່ອ ໃຈຈາກປະຊາຊົນ.ນອກຈາກໃຫ້ ການບໍລິການເງິນກູ້, ເງິນຝາກມີກຳນົດ ແລະ ເງິນຝາກປະຢັດໃຫ້ແກ່ກະສິກອນແລ້ວ,ທາງສະຖາບັນຍັງໄດ້ເປີດໃຫ້ການບລິການເງິນຝາກປະຢັດສຳລັບນັກຮຽນ ນັບແຕ່ສົກປີ 2013 ນີ້ ໂດຍໄດ້ເລີມທົດລອງເປັນຄັ້ງທຳອິດຢູ່ໂຮງຮຽນມັດທະຍົມປາຍອິໄລ, ການໃຫ້ບໍລິການດັ່ງກ່າວແມ່ນ ແນ່ໃສ່ເຮັດໃຫ້ນັກຮຽນ, ນັກສຶກ ສາຮູ້ວິທີປະຢັດເງິນເພື່ອຮັບໃຊ້ເຂົ້າໃນການຮຽນ ໂດຍນະໂຍ ບາຍດັ່ງກ່າວສາມາດໃຫ້ນັກຮຽນເປີດບັນຊີເງິນຝາກປະຢັດໄດ້ແຕ່ 10 ພັນກີບຂຶ້ນໄປ.

ຕາມທິດທາງແຜນການແລ້ວ,ອະນາຄົດທາງສະຖາບັນ ຈະພະຍາຍາມປັບປຸງຂອດການບໍລິການ, ເພີ່ມງົບປະມານເຂົ້າໃນກອງທຶນ ແລະ ສ້າງສະ ພາບແວດລ້ອມໃໝ່ທີ່ສະດວກຂຶ້ນກວ່າເກົ່າ ແນໃສ່ເຮັດໃຫ້ປະ ຊາຊົນສາມາດເຂົ້າເຖິງການບໍລິ ການ ແລະ ມີເງື່ອນໄຂຄົບຖ້ວນໃນການພັດທະນາຜົນຜະລິດຂອງຕົນ.