ເນື່ອງຈາກຂາດການຄຸ້ມຄອງທີ່ດີໃນການຜະລິດ
ແລະ ຈຳໜ່າຍຢາງພາລາຢູ່ແຂວງຫລວງນ້ຳທາ ຈຶ່ງເກີດມີຊ່ອງຫວ່າງໃຫ້ນັກທຸລະກິດຈຳນວນໜຶ່ງເຄື່ອນໄຫວເກັບຊື້ຢາງພາ
ລາຈາກປະຊາຊົນຢ່າງເສລີ ແລະ ເຮັດໃຫ້ລາຄາຢາງພາລາຕົກຕ່ຳລົງຄືສະເພາະແຕ່ເດືອນມີນາມານີ້ລາຄາຢາງໄດ້ປ່ຽນແປງເຖິງ
3 ເທື່ອ ຄືການສົ່ງ ອອກຈຳໜ່າຍຂອງຜູ້ຜະລິດຢາງຢູ່ບ້ານຫາດຍາວ ເມືອງ ແລະ
ແຂວງຫລວງນ້ຳທາ ຈຳ ນວນ 246 ໂຕນ ໃນງວດທຳອິດມີ 72 ໂຕນ ຂາຍໄດ້ໃນລາຄາກິໂລລະ
8.500 ກີບ, ງວດສອງມີ 78 ໂຕນ ຂາຍໄດ້ກິໂລລະ 9.187 ກີບ ແລະ ມາເຖິງງວດສາມນີ້
ຂາຍໄດ້ກິໂລລະ 8.250 ກີບ ເຊິ່ງຫລຸດຈາກງວດສອງຫລາຍເຖິງ 937 ກີບຕໍ່ກິໂລ ໂດຍຜູ້ເກັບຊື້ອ້າງວ່າລາຄາຢາງຢູ່ຕະຫລາດໂລກຕົກຕ່ຳ,
ເມື່ອປະຊາຊົນຜູ້ຮູ້ເທົ່າບໍ່ເຖິງການກໍຈະຂາຍຢາງອອກຢ່າງຟ້າວຟັ່ງຕາມລຳພັງ
ເພາະເຂົາເຈົ້າຢ້ານວ່າຖ້າບໍ່ຂາຍອອກໄວກໍຍິ່ງຈະເຮັດໃຫ້ລາຄາຕົກຕ່ຳລົງ
ແລະ ກໍຈະບໍ່ມີທຶນໝູນວຽນ ໂດຍສະເພາະຜູ້ມີສິນເຊື່ອນຳທະນາຄານກໍຍິ່ງຢ້ານ
ເພາະຖ້າຢາງບໍ່ໄດ້ຂາຍກໍຈະເຮັດໃຫ້ດອກເບ້ຍເງິນກູ້ເພີ່ມທະວີຂຶ້ນ. ດັ່ງນັ້ນ,
ທ່ານ ພອນໄຊ ຈັນທະສອນ ຫົວໜ້າພະແນກ ອຸດສາຫະກຳການຄ້າແຂວງດັ່ງກ່າວ ຈຶ່ງເຫັນສົມຄວນ
ວ່າ:
ເບື້ອງລັດຕ້ອງໄດ້ຊ່ວຍປະຊາຊົນຜູ້ຜະລິດຢາງພາລາໃນການຄວບຄຸມລາຄາຢາງໃຫ້ຢູ່ໃນເກນປົກ
ກະຕິ ແລະ ປັດຈຸບັນ ທາງແຂວງກໍໄດ້ອອກນິຕິກຳຈຳນວນໜຶ່ງ ເພື່ອເລັ່ງຄຸ້ມຄອງບັນຫາດັ່ງກ່າວໃຫ້ມີປະສິດທິຜົນທີ່ສຸດ.
ທ່ານ ບຸນມີ ລີຈົງກວນ ຮອງ ຫົວໜ້າກຸ່ມສະຫະກອນປູກຢາງ
ພາລາບ້ານຫາດຍາວ ໃຫ້ຮູ້ວ່າ: ບ້ານຫາດຍາວແມ່ນບ້ານໜຶ່ງທີ່ມີຄວາມອາດສາມາດສູງໃນການປູກ
ແລະ ຜະລິດຢາງພາລາ, ໄລ່ມາຮອດປັດຈຸບັນ ບ້ານດັ່ງກ່າວມີເນື້ອທີ່ສວນຢາງພາລາທັງໝົດ
200 ກວ່າເຮັກຕາ ພາຍຫລັງເລີ່ມ ປູກມາແຕ່ປີ 1990, ໃນນັ້ນ ປະ ມານ 37,02% ແມ່ນສາມາດປາດຢາງໄດ້ແລ້ວ
ຄືສົກປີ 2011-2012 ຊາວບ້ານດັ່ງກ່າວມີລາຍຮັບຈາກການຂາຍຜົນຜະລິດຢາງໄດ້ຫລາຍກວ່າ
9,62 ຕື້ກີບ ໂດຍສະເພາະພົນ ລະເມືອງຂອງບ້ານຜູ້ໜຶ່ງມີລາຍຮັບຈາກອຸດສາຫະກຳປູກຢາງດັ່ງກ່າວຫລາຍກວ່າ
6 ລ້ານກີບຕໍ່ປີ ແລະ ສະເພາະ 5 ເດືອນຂອງລະດູການປາດຢາງປີນີ້ ຊາວບ້ານຫາດຍາວສາມາດຂາຍຢາງໄດ້ແລ້ວ
2,12ຕື້ກວ່າກີບ ອັນໄດ້ຊ່ວຍໃຫ້ຊາວບ້ານດັ່ງກ່າວຫລຸດພົ້ນອອກຈາກຄວາມທຸກຍາກໄດ້ຢ່າງສົມບູນ
ແລະ ຖ້າເບື້ອງລັດເຂົ້າມາຊ່ວຍຄຸ້ມຄອງການຜະລິດ ແລະ ຈຳໜ່າຍຢາງຢ່າງມີແຜນການ
ຍິ່ງຈະຊ່ວຍໃຫ້ຊາວສາວສວນຢາງມີລາຍຮັບເພີ່ມຫລາຍຂຶ້ນ.
No comments:
Post a Comment