ບັນດາວິຊາການຂອງກະຊວງຖະແຫລງຂ່າວ, ວັດທະນະທຳ
ແລະ ທ່ອງທ່ຽວ, ໄດ້ເຂົ້າຮ່ວມກອງປະຊຸມເພື່ອຜ່ານຮ່າງກົດໝາຍວ່າດ້ວຍມໍລະດົກແຫ່ງຊາດສະບັບປັບປຸງ
ໃນວັນທີ 28 ພະຈິກນີ້, ຢູ່ຫໍວັດທະນະທຳແຫ່ງຊາດ ພາຍໃຕ້ການເປັນປະທານຂອງທ່ານ ສຈ.ດຣ ບ່ໍແສງຄຳ
ວົງດາລາ ລັດຖະມົນຕີວ່າການກະຊວງຖະແຫລງຂ່າວ,ວັດທະນະທຳ ແລະ ທ່ອງທ່ຽວ .
ທ່ານລັດຖະມົນຕີວ່າການກະຊວງຖະແຫລງຂ່າວ,
ວັດທະນະທຳ ແລະ ທ່ອງທ່ຽວ ກ່າວວ່າ: ກອງປະຊຸມຄັ້ງນີ້ ເພື່ອ ປັບປຸງຮ່າງກົດໝາຍມໍລະດົກແຫ່ງຊາດ
ໃຫ້ສອດຄ່ອງກັບສະພາບການພັດທະນາເສດຖະກິດ-ສັງຄົມ ໃນປະຈຸບັນທີ່ມີການເຕີບໃຫຍ່ຂະຫຍາຍຕົວຂຶ້ນໄປເລື້ອຍໆ,ຮ່າງກົດໝາຍດັ່ງກ່າວປະກອບມີ
12 ພາກ 92 ມາດຕາ ໂດຍໄດ້ປັບປຸງ 54 ມາດຕາ ແລະ ເພີ່ມໃໝ່ 21 ມາດຕາ ໃນນັ້ນປັບປຸງຫລາຍກວ່າໝູ່ແມ່ນພາກທີ
4 ໝວດທີ 1 ການຄຸ້ມຄອງມໍລະດົກແຫ່ງຊາດທາງດ້ານວັດທະນະທຳ ແລະ ປະຫວັດສາດ, ປັບປຸງ
12 ມາດຕາ ແລະ ເພີ່ມໃໝ່ຫລາຍກວ່າໝູ່ແມ່ນພາກທີ 10 ການແກ້ໄຂຂໍ້ຂັດແຍ່ງ ເພີ່ມ
6 ມາດຕາ.
ຮ່າງກົດໝາຍສະບັບປັບປຸງນີ້, ໄດ້ກຳນົດຫລັກການ,
ລະບຽບການ ແລະ ມາດຕະການກ່ຽວກັບການຄຸ້ມຄອງ, ນຳໃຊ້, ປົກປັກຮັກສາ, ອານຸລັກ, ບູລະນະ,
ປະຕິສັງຂອນມໍຣະດົກແຫ່ງຊາດ ເພື່ອຮັກສາໄວ້ຄຸນຄ່າຂອງມໍລະດົກແຫ່ງຊາດທາງດ້ານວັດທະນະທຳ,
ປະຫວັດສາດ ແລະ ທຳມະຊາດ ແນໃສ່ສຶກສາອົບຮົມພົນລະເມືອງໃຫ້ມີນ້ຳໃຈຮັກຊາດ,
ຮັກມູນເຊື້ອອັນດີງາມຂອງຊາດທັງເປັນປັດໄຈຄ້ຳປະກັນການຍືນຍົງຄົງຕົວຂອງຊາດລາວຕະຫລອດໄປ.
No comments:
Post a Comment