laophatthananewspaper: ລາວສະຫລອງຄົບຮອບ 1 ປີການເປັນສະມາຊິກອົງການການຄ້າໂລກ.

ໃນຕອນບ່າຍຂອງວັນທີ 5 ກຸມພານີ້, ຢູ່ກະຊວງອຸດສາຫະກຳ ແລະ ການຄ້າ, ໄດ້ຈັດໃຫ້ມີພິທີສະເຫລີມສະຫລອງຄົບ ຮອບ 1 ປີ ທີ່ ສປປ ລາວ, ໄດ້ເຂົ້າເປັນສະມາຊິກຂອງອົງການການຄ້າໂລກຢ່າງເປັນທາງການ 2/2/ 2013-2/2/2014 ແລະ ມີການປະດັບຫລຽນໄຊແຮງງານຊັ້ນ I ໃຫ້ບຸກຄົນຈຳນວນ 10 ທ່ານ ແລະ 8 ກົມກອງ, ຫລຽນໄຊແຮງງານຊັ້ນ II ໃຫ້ບຸກຄົນ 37 ທ່ານ ແລະ 14 ກົມກອງ, ຫລຽນໄຊແຮງງານຊັ້ນ III ໃຫ້ບຸກຄົນ 29 ທ່ານ ແລະ 25 ກົມກອງ, ຫລຽນ ກາແຮງງານ 76 ທ່ານ, ໃບຍ້ອງ ຍໍລັດຖະບານ 51 ທ່ານ ແລະ ໃບຍ້ອງຍໍກະຊວງອຸດສາຫະກຳ- ການຄ້າຈຳນວນ 24 ທ່ານ ທີ່ມີຜົນງານດີເດັ່ນໃນການປະກອບ ສ່ວນຢ່າງຫ້າວຫັນທັງສະຕິປັນຍາໃນການເຈລະຈາໃຫ້ ສປປ ລາວ ໄດ້ເຂົ້າເປັນສະມາຊິກອົງການການຄ້າໂລກໃນຄັ້ງນີ້. ໂດຍເປັນກຽດເຂົ້າຮ່ວມ ແລະ ປະດັບຫລຽນ ຂອງທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະ ມົນຕີວ່າການກະຊວງການຕ່າງປະເທດ ທັງເປັນປະທານຄະນະກຳມະການປະສານງານລະດັບຊາດ ວ່າດ້ວຍການເຊື່ອມໂຍງ ເສດຖະກິດກັບສາກົນ.

ທ່ານ ດຣ ນາມ ວິຍະເກດ ລັດຖະມົນຕີວ່າການກະຊວງ ອຸດສາຫະກຳ ແລະ ການຄ້າ ຮອງປະທານຄະນະກຳມະການປະສານງານລະດັບຊາດ ວ່າດ້ວຍການເຊື່ອມໂຍງເສດຖະກິດກັບສາກົນຊີ້ແຈງໂດຍຫຍໍ້ວ່າ: ໂດຍປະຕິບັດນະໂຍບາຍການ ເຊື່ອມໂຍງເສດຖະກິດກັບສາກົນຂອງພັກ ແລະ ລັດຖະບານ ສປປ ລາວ ໄດ້ຍື່ນຄຳຮ້ອງຂໍເຂົ້າເປັນສະມາຊິກຂອງອົງການການຄ້າໂລກໃນກາງປີ 1997 ແລະ ໄດ້ກາຍເປັນສະມາຊິກທີ 158 ຢ່າງເປັນທາງການໃນວັນທີ 2 ກຸມພາ 2013. ການສະເຫລີມສະຫລອງຄົບ ຮອບ 1 ປີ ທີ່ສປປ ລາວໄດ້ເຂົ້າເປັນສະມາຊິກຂອງອົງການການຄ້າໂລກ ນອກຈາກການສະແດງຄວາມຮູ້ບຸນຄຸນບຸກຄົນ ພ້ອມຍ້ອງຍໍຊົມເຊີຍບຸກຄົນ ແລະ ກົມກອງ ທີ່ຜົນງານປະກອບສ່ວນໃນວຽກງານດັ່ງກ່າວແລ້ວ ຍັງເປັນການສະແດງເຖິງຜົນສຳເລັດໃນຄວາມພະຍາຍາມກະກຽມຂອງ ສປປ ລາວຕະຫລອດໄລຍະ 15 ປີ. ຊຶ່ງ ສປປ ລາວ ໄດ້ທົບທວນ, ສ້າງ ແລະ ປັບປຸງນິຕິກຳທີ່ຕິດພັນກັບການຄ້າໃຫ້ສອດຄ່ອງກັບຫລັກການ ກໍຄື ສັນຍາຂອງ ອຄລ ຫລາຍກ່ວາ 90 ສະບັບ ຊຶ່ງໄດ້ຮັບການຕີລາຄາສູງຈາກບັນດາສະມາຊິກອົງການການຄ້າໂລກ ແລະ ບັນດາອົງການຈັດຕັ້ງສາກົນ ແມ່ນເພື່ອສ້າງສິ່ງແວດລ້ອມທີ່ດີໃຫ້ແກ່ການດຳເນີນທຸ ລະກິດທີ່ດີ ແລະ ສ້າງຄວາມເຊື່ອໝັ້ນໃຫ້ແກ່ນັກລົງທຶນຕ່າງປະເທດ ເຊິ່ງເປັນຕົວສະແດງລະ ຄອນທີສຳຄັນໃນການຫັນປ່ຽນປະເທດເຮົາໃຫ້ກາຍເປັນປະເທດອຸດສາຫະກຳ ແລະ ທັນສະໄໝ ໂດຍຜ່ານການລົງທຶນໂດຍກົງຈາກຕ່າງປະເທດ ແລະ ໂຄງການຖ່າຍທອດເຕັກໂນໂລຊີທີ່ກ້າວໜ້າ.

ທ່ານດຣ ນາມ ວິຍະເກດ ກ່າວຕື່ມອີກວ່າ: ພາຍຫລັງທ່ີ ສປປ ລາວ ໄດ້ເຂົ້າເປັນສະມາຊິກ ອຄລ ຢ່າງເປັນທາງການ, ສປປ ລາວ ກໍໄດ້ສຶບຕໍ່ຈັດຕັ້ງປະຕິບັດພັນທະ ແລະ ແຜນການຕ່າງໆ ເຊິ່ງກວມເອົາວຽກງານຫລາຍດ້ານທີ່ກ່ຽວຂ້ອງກັບຫລາຍກະຊວງ ແລະ ຂະແໜງການ ເຊິ່ງໄດ້ສ້າງແຜນດຳເນີນງານຢ່າງລະອຽດໃນການຈັດຕັ້ງປະຕິບັດພັນທະສັນຍາໃຫ້ສຳເລັດຕາມກຳນົດເວລາ. ທັງນີ້ໂດຍອີງຕາມບົດຮຽນຂອງ ສສ ຫວຽດນາມ ແລະ ສປ ຈີນ ເຫັນວ່າຜົນປະໂຫຍດຫລັງເຂົ້າເປັນສະມາຊິກ ແມ່ນຂຶ້ນກັບການກະກຽມຄວາມພ້ອມໃນການຈັດຕັ້ງພັນທະສັນຍາຂອງຕົນ. ສິ່ງທີ່ຄວນເອົາໃຈໃສ່ ແມ່ນການປັບປຸງນິຕິກຳ, ການສ້າງພະນັກງານ, ການປັບປຸງການຈັດຕັ້ງ, ການສ້າງຄວາມຮູ້ ແລະ ຄວາມເຂົ້າໃຈໃຫ້ແກ່ພາກທຸລະກິດ ເພື່ອໃຫ້ສາມາດສ້າງຜົນປະໂຫຍດສູງສຸດຈາກການເຊື່ອມໂຍງກັບສາກົນ ຕາມແນວທາງປ່ຽນແປງໃໝ່ຂອງພັກ ແລະ ລັດຖະບານ.