ທ່ານ ສົມມີ ໄຊຍະລາດ ຫົວໜ້າໜ່ວຍງານການຄຸ້ມຄອງ,
ຍົກຍ້າຍຈັດສັນ ແລະ ຟື້ນຟູອາຊີບຜູ້ໄດ້ຮັບຜົນກະທົບຈາກໂຄງການໄຟຟ້າພະລັງງານຄວາມຮ້ອນ ຫົງສາໃຫ້ຮູ້ວ່າ:
ເພື່ອປະຕິບັດຕາມສັນຍາສຳປະທານຂອງໂຄງການພະລັງງານຄວາມຮ້ອນຫົງສາ ລະຫວ່າງລັດຖະບານ
ລາວ ແລະ ບໍລິສັດໄຟຟ້າຫົງສາຈຳກັດ, ໃນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ
ໂດຍສະເພາະແມ່ນຍົກລະດັບຊີວິດການເປັນຢູ່ຂອງປະຊາຊົນໃນເມືອງຫົງສາ, ແຂວງໄຊຍະບູລີ
ຜູ້ທີໄດ້ຮັບຜົນກະທົບໂດຍກົງນັ້ນ ໃຫ້ຫຼຸດພົ້ນອອກຈາກຄວາມທຸກຍາກ, ມີອາຊີບທີ່ໝັ້ນທ່ຽງ
ແລະ ມີລາຍຮັບເພີ່ມຂຶ້ນ. ພາຍຫຼັງທີ່ໄດ້ສຳປະທານໂຄງການ ຊາວບ້ານຈຳນວນ 450 ຄອບຄົວ
ຈາກ 4 ບ້ານຄື: ບ້ານຈຳປາ, ນາໄມ້ຍົມ, ນາ ໜອງຄຳ, ນາຊາຍຄຳ ແລະ 1 ໜ່ວຍທຳການຜະລິດຂອງບ້ານຫານ
ໄດ້ຖືກຍົກຍ້າຍໄປສູ່ບ້ານຈັດສັນໃໝ່ນາແກ່ນຄຳ. ເຊິ່ງໂຄງການໄດ້ໃຫ້ການເບິ່ງແຍງເອົາໃຈໃສ່ປັບປຸງຊີວິດການເປັນຢູ່ຂອງເຂົາເຈົ້າໂດຍການສົ່ງເສີມອາຊີບຕ່າງໆເຊັ່ນ:
ການພັດທະນາດ້ານເຕັກນິກກະສິກຳ ແລະ ປ່າໄມ້, ອາຊີບນອກການກະສິກຳ ແລະ ອື່ນໆ, ໃນນັ້ນ
ການສົ່ງເສີມການປູກຢາງ ພາລາປະສົມປະສານກັບພືດທາງເລືອກອື່ນ ກໍນອນຢູ່ໃນແຜນງານໜຶ່ງທີ່ທາງລັດຖະບານໄດ້ເນັ້ນໃຫ້ເປັນກິດຈະກຳຫຼັກໃນ
ການສ້າງລາຍຮັບໃຫ້ບັນລຸຕາມເປົ້າໝາຍຂອງໂຄງການ,
ເພາະເຫັນວ່າຢາງພາລາເປັນພືດທີ່ໃຫ້ນ້ຳຢາງທີ່ໃຊ້ເປັນວັດຖຸດິບໃນການສ້າງພະລິດຕະພັນຢາງຊະນິດຕ່າງໆທີ່ມີຄວາມສຳຄັນໃນການດຳລົງຊີວິດຂອງມວນມະນຸດ
ເຊິ່ງເຫັນໄດ້ນັບຕັ້ງແຕ່ຜະລິດຕະພັນເຄື່ອງໃຊ້ຄົວເຮືອນ, ຢາງລົດຍົນ, ຢາງສັງເຄາະ
ແລະ ອື່ນໆ ສະແດງໃຫ້ເຫັນວ່າຊີວິດປະຈຳວັນຂອງຄົນເຮົາມີສ່ວນກ່ຽວຂ້ອງກັບຢາງຕະຫຼອດເວລາ.
ໃນນັ້ນແຕ່ລະຄອບຄົວທີ່ຖືກຍົກຍ້າຍໄປຢູ່ເຂດຈັດສັນໃໝ່ຈະໄດ້ຮັບການຈັດສັນດິນທຳການຜະລິດໃຫ້
1 ຄອບຄົວຕໍ່ 2 ເຮັກຕາ, 1 ເຮັກຕາ ໂຄງການໄດ້ສົ່ງເສີມໃຫ້ຊາວບ້ານປູກຢາງພາລາປະສົມປະສານກັບພືດເສດຖະກິດອື່ນໆ
ແລະ ອີກ 1 ເຮັກຕາແມ່ນສົ່ງເສີມໃຫ້ປູກພືກທາງເລືອກທົ່ວໄປຕາມຄວາມເໝາະສົມ
ແລະ ທ່າແຮງຂອງແຕ່ລະຄອບຄົວ.
ໃນປີຜ່ານມາ ທີມງານຂອງໂຄງການໄດ້ສົມທົບກັບຫ້ອງການທີ່ກ່ຽວຂ້ອງພາກລັດໄດ້ລົງຈັດຕັ້ງ
ກຸ່ມຊາວກະສິກອນ ເພື່ອປູກຢາງພາລາໃຫ້ໄດ້ 450 ເຮັກຕາ, ປັດຈຸບັນນອກຈາກຈະສົ່ງເສີມການປູກຢູ່ໃນເຂດບ້ານຈັດສັນຂອງໂຄງການແລ້ວ
ຍັງມີການສົ່ງເສີມການປູກຢາງພາລາຢ່າງກ້ວາງຂວາງ, ແຕ່ຊາວບ້ານກຸ່ມດັ່ງກ່າວ
ລວມເຖິງພະ ນັກງານກ່ຽວຂ້ອງຍັງຂາດຄວາມຮູ້, ປະສົບການ ແລະ ຄວາມຊຳນານໃນການປູກຢາງພາລາ
ເປັນຕົ້ນແມ່ນການຄັດເລືອກເນື້ອທີ່, ການນຳໃຊ້ແນວພັນ, ເຕັກນິກການປູກ ແລະ
ການບົວລະບັດຮັກສາ, ເຊິ່ງບັນຫາດັ່ງກ່າວເຮັດໃຫ້ເກີດຜົນກະທົບໂດຍກົງ ເຮັດໃຫ້ປະສິດທິພາບຂອງຜົນຜະລິດຢາງຕົກຕໍ່າ
ຫຼື ບໍ່ປະສົບຜົນສຳເລັດເທົ່າທີ່ຄວນ. ສະນັ້ນ, ທາງໂຄງການຈຶ່ງເຫັນໄດ້ຄວາມສຳຄັນ
ແລະ ຄວາມຈຳເປັນທີ່ຈະແກ້ໄຂບັນຫາດັ່ງກ່າວ ເພື່ອຍົກລະດັບຄວາມຮູ້, ຄວາມສາມາດ
ແລະ ຄວາມຊຳນິຊຳນານໃນການປູກ ໃນການຜະລິດຢາງພາຣາຂອງຊາວກະສິກອນໃຫ້ມີປະສິດທິຜົນສູງ
ແລະ ປະສົບຜົນສຳເລັດໃນເປົ້າໝາຍທີ່ວາງໄວ້, ສະນັ້ນ ຈຶ່ງໄດ້ຄົ້ນຄ້ວາຮຽບຮຽງເອົາເອກະສານປື້ມຄູ່ມືການປູກຢາງພາລາຈາກສະບັບຕ່າງໆເປັນຕົ້ນແມ່ນປື້ມຄູ່ມືຈາກສະຖາບັນຄົ້ນຄ້ວາ
ວິທະຍາສາດເຕັກນິກກະສິກຳ ແລະ ປ່າໄມ້, ກອງສົ່ງເສີມກະສິກຳ ແລະ ປ່າໄມ້ແຫ່ງຊາດ,
ຖອດຖອນບົດຮຽນຈາກການປູກຕົວຈິງຂອງຊາວ ບ້ານ ຫາດຍາວ ແຂວງຫຼວງນ້ຳທາ ແລະ ເອກະສານການປູກຢາງພາລາຈາກປະເທດໄທມາໝູນໃຊ້ເພື່ອໃຫ້ເກີດປະສິດທິພາບສູງ.
No comments:
Post a Comment