ໃນວັນທີ
23 ມັງກອນ ນີ້, ທີ່ມະຫາວິທະຍາໄລແຫ່ງຊາດ ທ່ານ ຈ໋ອງ ອຸ່ຍ ຮົ່ວ ປະທານສະພາແຫ່ງຊາດ
ສ ເກົາຫຼີ ໄດ້ເປັນກຽດປະຖະກະຖາ ກ່ຽວກັບການສ້າງຕັ້ງສາຍພົວພັນການທູດ ລາວ-ສ ເກົາຫຼີ
ຄົບຮອບ 20 ປີ (25/10/1995-25/10/2015) ໂດຍມີທ່ານ ສຈໃດຣ ສຸກກົງແສງ ໄຊຍະເລີດ
ອະທິການບໍດີມະຫາວິທະຍາໄລແຫ່ງຊາດ, ທ່ານ ລີຕູ່ ບົວປາວ ລັດຖະມົນຕີຊ່ວຍວ່າການກະຊວງສຶກສາທິການ
ແລະ ກິລາ, ມີບັນດາ ປະທານ ກຳມາທິການຕ່າງປະເທດສະພາແຫ່ງຊາດ, ພ້ອມດ້ວຍຄູ-ອາຈານ
ແລະ ນັກສຶກສາເຂົ້າຮ່ວມ.
ທ່ານ
ຈ໋ອງ ອຸ່ຍ ຮົ່ວ ກ່າວວ່າ: ໃນໄລຍະ 20 ປີ ຜ່ານມາ ສອງປະເທດ ສ.ເກົາຫຼີ-ລາວ ທີ່ໄດ້ມີການສ້າງສາຍພົວພັນການທູດນຳກັນໃນປີ
1995 ເຊິ່ງໄດ້ມີການຮ່ວມມືໃນຫຼາຍດ້ານເປັນຕົ້ນ: ການຄ້າ, ການລົງທືນ, ວັດທະນະທຳ,
ການທ່ອງທ່ຽວ ແລະ ອື່ນໆ. ສ່ວນການຮ່ວມມືສອງຝ່າຍ ແລະ ການລົງທືນຢູ່ ສປປ ລາວຂອງ
ສ.ເກົາຫຼີກໍມີການເພີ່ມຂຶ້ນຢ່າງຕໍ່ເນື່ອງຄື: ມູນຄ່າການລົງທືນຂອງ ສ ເກົາຫຼີ
ມາຮອດປັດຈຸບັນມີປະມານ 756 ລ້ານໂດລາສະຫະລັດ, ກວມເອົາ 291 ໂຄງການຈັດຢູ່ໃນອັນດັບ
4 ຂອງການລົງທືນຕ່າງປະເທດທັງໝົດ ຢູ່ ສປປ ລາວ. ໃນໄລຍະ 5 ປີຜ່ານມານີ້ ການລົງທືນ
ສ ເກົາຫຼີ ມີທັງໝົດ 270 ກ່ວາ ລ້ານໂດລາສະຫະລັດ, ກວມເອົາ 46 ໂຄງການ.ໃນນີ້ການລົງທືນໃນຂະແໜງການພະລັງງານ
ໄຟຟ້າ
212 ລ້ານໂດລາສະຫະລັດ, ບໍ່ແຮ່ 12 ລ້ານໂດລາສະຫະລັດ. ພ້ອມນີ້ການຊ່ວຍເຫຼືອລ້າ
(PDA) ມີປະມານ 30-40 ລ້ານໂດລາສະຫະລັດ ຢູ່ໃນອັນດັບ 3 ຂອງບັນດາການຊ່ວຍເຫຼືອລ້າຢູ່
ສປປ ລາວ ເພື່ອປະຕິດຕາມໂຄງການຕ່າງໆໃຫ້ມີປະສິດທິພາບ. ໃນນັ້ນໂຄງການໄດ້ສຸມໃສ່ຂະແໜງການສຶກສາ,
ການພັດທະນາສີມືແຮງງານ, ພັດທະນາຊົນນະບົດ ແລະ ດ້ານວຽກງານສາທາລະນະສຸກ. ໃນນັ້ນມີການຊ່ວຍເຫຼືອທາງດ້ານເຕັກນິກ,
ວິຊາການ, ການສົ່ງອາສາສະໝັກ ແລະ ຜູ້ຊ່ຽວຊານທີ່ປຶກສາໂຄງການຈຳນວນໜຶ່ງເພື່ອແກ້ໄຂຄວາມທຸກຍາກຂອງປະຊາຊົນໃນເຂດຫ່າງໄກສອກຫຼີກຕື່ມອີກ.
ສຳຫຼັບມູນຄ່າການຄ້າທັງໝົດມີ 199 ລ້ານໂດລາສະຫະລັດໃນປີ 2013 ເພີ່ມຂຶ້ນ
13,06% ທຽບໃສ່ປີ 2012 ໃນນັ້ນນຳເຂົ້າຈາກ
ສ ເກົາຫຼີ 187 ລ້ານໂດລາສະຫະລັດ ແລະ ສົ່ງອອກໄປ ສ ເກົາຫຼີ 12 ລ້ານ ໂດລາສະຫະລັດ, ຈຳນວນນັກທ່ອງທ່ຽວຈາກ
ສ ເກົາຫຼີ ໃນໄລຍະຜ່ານມາ ແມ່ນມີລັກສະນະເພີ່ມຂຶ້ນສະເພາະແຕ່ 3 ເດືອນ ຕົ້ນປີ
2014 ມີ 35 ພັນກ່ວາຄົນ. ປັດຈຸບັນມີພົນລະເມືອງ ສ.ເກົາຫຼີທີ່ກຳລັງອາໄສຢູ່
ສປປ ລາວ ປະມານ 1.500 ຄົນ. 
No comments:
Post a Comment