ໃນໄລຍະດຳເນີນກອງປະຊຸມສະໄໝສາມັນເທື່ອທີ
8 ຂອງສະພາແຫ່ງຊາດຊຸດ ທີ VII ລະຫວ່າງທ້າຍ ເດືອນ ທັນວາ 2014 ຜ່ານມາ ໄດ້ ມີປະຊາຊົນ
ບ້ານ ປາກມາດ ເມືອງແມດ ແຂວງ ວຽງຈັນ ສະເໜີໃຫ້ຂັ້ນເທິງລົງກວດກາການນຳໃຊ້
ເຄື່ອງ ມືລ່າສັດ ແລະ ຫາປາ ທີ່ຜິດກົດໝາຍ ເຊັ່ນ: ປືນ, ເຄື່ອງໄຟຟ້າຊອດປາທີ່ມີຢ່າງແພ່ຫຼາຍຢູ່ບໍລິເວນເມືອງດັ່ງກ່າວ.
ຕໍ່ກັບບັນຫານີ້ ທ່ານ ສີທອນ ພິພັກຂະວົງ ຮອງກົມລ້ຽສັດ ແລະ ການປະມົງ ກະຊວງກະສິກຳ
ແລະ ປ່າໄມ້ ໄດ້ຊີ້ແຈງວ່າ: ກົມລ້ຽງສັດ ແລະ ການປະ ມົງໄດ້ປະສານໄປຫາພະນັກງານເມືອງ
ທີ່ກ່ຽວຂ້ອງລົງຕິດຕາມ ກວດກາ ເບິ່ງຕົວຈິງ ເຫັນວ່າເຄື່ອງອຸປະກອນດັ່ງກ່າວ,
ມີການວາງຂາຍແທ້ ຢ່າງເປີດເຜີຍ ໂດຍບໍ່ຄິດຢ້ານກົວຕໍ່ລະບຽບກົດໝາຍບ້ານ ເມືອງ
ແລະ ມີການນຳໃຊ້ຫຼາຍຢູ່ເຂດດັ່ງກ່າວນີ້
ສະແດງໃຫ້ເຫັນວ່າ ພະນັກງານລັດ ແລະ ອຳນາດການ ປົກຄອງທ້ອງຖິ່ນ ຍັງບໍ່
ທັນໄດ້ເອົາໃຈໃສ່ໃນການໂຄສະນາເຜີຍແຜ່ເຖິງຜົນຮ້າຍຂອງອຸປະກອນລ່າສັດ ແລະ
ເຄື່ອງມືຫາປາເຫຼົ່ານີ້ ແລະ ບໍ່ເປັນເຈົ້າການນຳພາປະຊາຊົນ
ຈັດຕັ້ງປະຕິບັດລະບຽບກົດໝາຍວ່າດ້ວຍການປະມົງທີ່ໄດ້ລະບຸໄວ້ຄື:
ຫ້າມບຸກຄົນ, ການ ຈັດຕັ້ງພາຍໃນ ແລະ ຕ່າງປະເທດຢູ່ໃນປະເທດລາວ ນຳໃຊ້ທາດເບື່ອ,
ອາວຸດ, ລະເບີດ, ເຄື່ອງໄຟຟ້າ, ເຄື່ອງແສງ, ແສງທຽມ ຫຼື ສິ່ງອື່ນໆ ເພື່ອຫາປາໃນນ້ຳຢ່າງເດັດຂາດ.
ທ່ານ
ຍັງໄດ້ເນັ້ນອີກວ່າ ໃນແຕ່ລະປີ ຂອງວັນປ່ອຍປາແຫ່ງຊາດ ກະຊວງກະສິກຳ ແລະ ປ່າໄມ້
ກໍໄດ້ອອກແຈ້ງການຫ້າມນຳໃຊ້ອຸປະກອນຫາປາແບບດັບສູນ. ເຊິ່ງບັນຫານີ້ເຫັນວ່າເປັນບັນຫາລວມ
ແລະ ໃຫຍ່ ຢູ່ໃນຂອບເຂດທົ່ວປະເທດເຊິ່ງຈະຕ້ອງໄດຮ່ວມກັນແກ້ໄຂ. ປັດຈຸບັນ
ກະຊວງກະສິກຳ ແລະ ປ່າໄມ້ກຳລັງປັບປຸງເຈົ້າໜ້າທີ່ກ່ວດກາການປະມົງ ຢູ່ຂັ້ນເມືອງ
ແລະ ສ້າງຕາໜ່າງ ຢູ່ຂັ້ນບ້ານ, ພ້ອມນັ້ນ
ກໍຈະໄດ້ປະສານງານກັບຂະແໜງການທີ່ກ່ຽວຂ້ອງ ເພື່ອສ້າງນິຕິກຳສະເພາະ, ຫ້າມນຳອາວຸດຊອດປາ
ແລະ ອຸປະກອນຫາປາແບບດັບສູນຕ່າງໆເຂົ້າມາປະເທດ. ຜ່ານມາບໍ່ທັນມີການປັບໄໝຕໍ່ຜູ້ກະທຳຜິດ
ມີພຽງສຶກສາອົບຮົມ, ແນະນຳ ໃຫ້ເຂົາເຈົ້າບໍ່ໃຫ້ປະຕິບັດຄືທີ່ເຄີຍເຮັດຜ່ານມາ
ແລະ ຕໍ່ໄປຈະມີການດຳເນີນມາດຕະການຢ່າງເດັດຂາດຕໍ່ຜູ້ລະເມີດເພື່ອເຂັດຫຼາບ.
No comments:
Post a Comment