ເຈົ້າໜ້າທີ່ມອດໄຟ
ແຂວງສະຫວັນນະເຂດ ລາຍງານໃຫ້ຮູ້ວ່າ: ໃນຕອນບ່າຍຂອງວັນທີ 19 ມີນານີ້, ໄດ້ເກີດເຫດໄຟໃໝ້ເຮືອນ 1 ຫລັງ ຢູ່ບ້ານໄຊຍະມຸງຄຸນ
ເມືອງໄກສອນ ແຂວງສະຫວັນນະເຂດ ເຊິ່ງເປັນເຮືອນ 2 ຊັ້ນ
ລຸ່ມກໍ່-ເທິງໄມ້. ພາຍຫລັງໄດ້ຮັບແຈ້ງເຈົ້າໜ້າທີ່ກໍຮີບນຳລົດນ້ຳຈຳນວນ 3 ຄັນ ແລະ ເຈົ້າໜ້າທີ 18 ຄົນ ລົງຈຸດເກີດເຫດ ເພື່ອສຸມເຂົ້າສະກັດກັນໄຟບໍ່ໃຫ້ລຸກລາມໄປຫາເຮືອນໃກ້ຄຽງ, ໂດຍໃຊ້ເວລາປະມານ 1 ຊົ່ວໂມງ ຈຶ່ງສາມາດຄວບຄຸມໄຟໄວ້ໄດ້. ຜ່ານການລົງພິສູດຫລັກຖານສະຖານທີ່ເກີດເຫດຂອງເຈົ້າໜ້າທີ່ຮູ້ວ່າ: ສາເຫດຂອງການເກີດເຫດອັກຄີໄພຄັ້ງນີ້ ແມ່ນມາຈາກໄຟຟ້າລັດວົງຈອນຍ້ອນວ່າເຮືອນຫລັງດັ່ງກ່າວເປັນເຮືອນທີ່ປຸກສ້າງມານານແລ້ວ ແລະ ສາຍໄຟທີ່ນຳໃຊ້ກໍເກົ່າ,
ຈຶ່ງເຮັດໃຫ້ເກີດໄຟຊ໋ອດໄດ້ງ່າຍ
ແລະ ລຸກລາມໄປທົ່ວເຮືອນຢ່າງໄວວາ
ຄາດວ່າຈະມີມູນຄ່າເສຍຫາຍ ຫລາຍກວ່າ 200 ລ້ານກີບ, ໃນນີ້
ປະກອບມີເຮືອນ 1 ຫລັງ, ລົດຈັກ 3 ຄັນ, ເງິນກີບ 7 ລ້ານກີບ, ເງິນໄທ 2 ແສນບາດ, ຄຳໜັກ 1 ບາດ ແລະ
ເຄື່ອງໃຊ້ພາຍໃນເຮືອນໄດ້ຮັບຄວາມເສຍຫາຍໝົດ, ແຕ່ຍັງໂຊກດີບໍ່ມີຄົນໄດ້ຮັບບາດເຈັບ ຫລື ເສຍຊີວິດ.
No comments:
Post a Comment