laophatthananewspaper: ເປີດແລ້ວ ສູນການຄ້າຄົບວົງຈອນ “ວຽງຈັນເຊັນເຕີ”

ສູນການຄ້າວຽງຈັນເຊັນເຕີ ຕັ້ງຢູ່ເຂດຖະໜົນຄູວຽງ, ຊຶ່ງເປັນຈຸດໃຈກາງຂອງນະ ຄອນຫລວງວຽງຈັນ ໄດ້ເປີດບໍລິ ການຢ່າງເປັນທາງການແລ້ວ ໃນວັນທີ 28 ມີນານີ້, ໂດຍການເຂົ້າຮ່ວມຂອງທ່ານ ສົມສະຫວາດ ເລັ່ງສະຫວັດ ຮອງນາຍົກ ລັດຖະມົນຕີ, ຜູ້ຊີ້ນຳເສດຖະກິດການຜະລິດ ແລະ ຈໍລະຈອນ ແລະ ທ່ານ ກວນ ຮົວປິນ ເອກອັກຄະລັກຖະທູດ ສປ ຈີນ ປະຈຳລາວ, ພ້ອມດ້ວຍຕົວແທນພາກ ສ່ວນກ່ຽວຂ້ອງຕ່າງໆເຂົ້າຮ່ວມເປັນຈຳນວນຫລາຍ.

ຜູ້ຮັບຜິດຊອບສູນການຄ້າແຫ່ງນີ້ໃຫ້ຮູ້ວ່າ: ສູນການຄ້າດັ່ງກ່າວເປັນສູນການຄ້າ ທີ່ໃຫຍ່ໂຕ ແລະ ທັນສະໄໝ, ເຊິ່ງສາມາດຕອບສະໜອງຄວາມຕ້ອງການສິນຄ້າແບບຄົບວົງຈອນ ແລະ ນັບທັງສິນຄ້າຍີ່ຫໍ້ດັງ, ມີຄຸນນະພາບດີລະດັບໂລກເຂົ້າມາຈຳ ໜ່າຍອີກດ້ວຍ, ຊຶ່ງຈະນຳເອົາຄວາມສະດວກສະບາຍໃນການຈັບຈ່າຍໃຊ້ສອຍຂອງຄົນລາວ ແລະ ຊາວຕ່າງຊາດທີ່ເຂົ້າມາ ທ່ອງທ່ຽວ. ພ້ອມນີ້ຍັງມີທະນາຄານແຫ່ງ ສປ ຈີນ ສາຂານະຄອນຫລວງວຽງຈັນ, ໂຮງຮູບເງົາ, ຫ້ອງອາຫານ, ສະຖານທີ່ຫ ລີ້ນສຳລັບເດັກນ້ອຍ ແລະ ອື່ນໆໄວ້ຄອຍບໍລິການທຸກທ່ານທີ່ເຂົ້າມາບໍລິການໃນສູນການຄ້າແຫ່ງນີ້.

ໃນໂອກາດອັນສະຫງ່າລາສີນີ້ ທ່ານຮອງນາຍົກ ໄດ້ມີຄຳເຫັນໃນພິທີວ່າ: ການເປີດສູນການຄ້າ ວຽງຈັນເຊັນເຕີ້ນີ້ ເປັນການປະດັບເອ້ຄວາມທັນສະໄໝ ແລະ ຄວາມສວຍງາມໃຫ້ແກ່ນະຄອນຫລວງວຽງຈັນ, ທັງເປັນຂອງຂວັນອັນໜຶ່ງເພື່ອຄຳນັບຮັບຕ້ອນ 2 ວັນປະຫວັດສາດຂອງລາວເຮົາຄື: ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 60 ປີ ແລະ ວັນສະຖາປະນາ ສປປ ລາວ ຄົບຮອບ 40 ປີ ແລະ ເຊື່ອວ່າສູນການຄ້າແຫ່ງນີ້ ຈະນຳເອົາຄວາມສະດວກສະພາບມາສູ່ຄົນລາວໄດ້ຊົມໃຊ້ສິນຄ້າທີ່ມີຄຸນນະພາບ, ພ້ອມຍັງເປັນການດຶງດູດນັກທ່ອງທ່ຽວຈາກຕ່າງປະເທດມາທ່ອງທ່ຽວລາວເພີ້ມຂຶ້ນ ແລະ ທັງເປັນການເສີມຂະຫຍາຍສາຍພົວພັນລາວ-ຈີນໃຫ້ຍືນນານນຳອີກ.

ທ່ານນາງ ອໍລະໄທ ສັນຕິຄົງຄາ ຜູ້ອຳນວຍການໃຫຍ່ບໍລິສັດ ກຣິດຕິພົງ ກລຸບຈຳກັດ, ຮອງປະທານສະພາບໍລິ ຫານບໍລິ ສັດພັດທະນາເສດຖະກິດສູນການຄ້າຄົບວົງຈອນໜອງຈັນຕອນເໜືອ ກ່າວວ່າ: ນັບແຕ່ເລີ່ມມີການກໍ່ສ້າງ ວຽງຈັນເຊັນເຕີ ໃນປີ 2012 ເປັນຕົ້ນມາ ທັງສອງປະເທດລາວ-ຈີນ ກໍໄດ້ເລິງເຫັນຄວາມສຳຄັນ ໃຫ້ການສະໜັບສະໜູນຢ່າງໃຫຍ່ຫລວງ ສົ່ງຜົນໃຫ້ໂຄງການດັ່ງກ່າວໄດ້ຮັບການປະຕິບັດຢ່າງມີປະສິດທິຜົນ ແລະ ປະສົບຜົນສຳເລັດຢ່າງຈົບງາມ. ພ້ອມກັນນັ້ນ ຫວັງວ່າ ວຽງຈັນເຊັນເຕີ ຈະກາຍເປັນສູນການຄ້າທີ່ນຳໜ້າຂອງລາວໃນອີກບໍ່ດົນ.

ສູນການຄ້າດັ່ງກ່າວ ຕັ້ງຢູ່ບ້ານໜອງຈັນ, ເມືອງສີສັດຕະນາກ, ຊຶ່ງເປັນເຂດສູນການຄ້າສຳຄັນຂອງນະຄອນ ຫລວງວຽງຈັນ, ໃກ້ກັບສະຖານນີລົດເມ, ຕະຫລາດຂົວດິນ. ໂຄງການດັ່ງກ່າວແມ່ນເລີ່ມກໍ່ສ້າງ ໃນຕົ້ນປີ 2012 ໃຊ້ເວລາ 3 ປີ ຈຶ່ງສຳເລັດ, ເຊິ່ງກວມເອົາເນື້ອທີ່ທັງໝົດ 5,3 ເຮັກຕາ, ມີ 4 ຊັ້ນ ແລະ ມີຫ້ອງຂາຍເປັນຈຳນວນຫລາຍໄວ້ໃຫ້ຜູ້ທີ່ສົນໃຈເຂົ້າໄປຈັບຈອງໄດ້.