ລັດຖະມົນຕີຊ່ວຍວ່າການກະຊວງຕ່າງປະເທດຈາກ 4 ປະເທດຄື: ລາວ, ຫວຽດນາມ, ໄທ ແລະ ມຽນມາ, ໄດ້ຮ່ວມກັນປຶກສາຫາລື ແລະ
ທົບທວນຄວາມຄືບໜ້າການພັດທະນາແລວເສດຖະກິດຕາເວັນອອກ-ຕາເວັນຕົກ ໃນອະນຸພາກພື້ນແມ່ນ້ຳຂອງ ເພື່ອຊອກຫາທາງແກ້ໄຂບັນຫາຕ່າງໆ ແລະ ກຳນົດທິດທາງການຈັດຕັ້ງປະຕິບັດວຽກສຳຄັນໃນຕໍ່ໜ້າ, ເຊິ່ງໄດ້ໄຂຂຶ້ນໃນວັນທີ 20 ພຶດສະພາຜ່ານມາ, ທີ່ບາງກອກປະເທດໄທ, ຝ່າຍລາວນຳໂດຍທ່ານ
ສະເຫລີມໄຊ
ກົມມະສິດ ລັດຖະມົນຕີຊ່ວຍວ່າການກະຊວງການຕ່າງປະເທດ.
ກອງປະຊຸມຄັ້ງນີ້ ໄດ້ທົບທວນຄວາມຄືບໜ້າ ການພັດທະນາແລວເສດຖະກິດຕາເວັນອອກ-ຕາເວັນຕົກ ໃນອະນຸພາກພື້ນແມ່ນ້ຳຂອງລະຫວ່າງ
ສປປ ລາວ, ມຽນມາ, ໄທ ແລະ ຫວຽດນາມ
ທາງດ້ານການພັດທະນາພື້ນຖານໂຄງລ່າງ ແລະ ດ້ານນິຕິກຳນັບແຕ່ກອງປະຊຸມຄັ້ງທີ 2 ຜ່ານມາ ໃນເດືອນພຶດສະພາ
2013, ທີ່ແຂວງສະຫວັນນະເຂດ ແລະ ໄດ້ປຶກສາຫາລືຫາທາງແກ້ໄຂບັນຫາຕ່າງໆ ແລະ ກຳນົດທິດທາງການຈັດຕັ້ງປະຕິບັດວຽກງານໃນຕໍ່ໜ້າ ເພື່ອສືບຕໍ່ຈັດຕັ້ງປະຕິບັດສັນຍາວ່າດ້ວຍການ
ຂົນສົ່ງຂ້າມແດນ
ອະນຸພາກພື້ນແມ່ນ້ຳຂອງ(GMS CBTA), ກໍຄືບົດບັນທຶກຄວາມເຂົ້າໃຈວ່າດ້ວຍການລິເລີ່ມຈັດຕັ້ງປະຕິບັດສັນຍາດັ່ງກ່າວ
(IICBTA), ລະຫວ່າງລາວ, ໄທ, ຫວຽດນາມ ໃຫ້ປະກົດຜົນເປັນຈິງ ແນໃສ່ຫັນແລວທາງຕາເວັນອອກ-ຕາເວັນຕົກ ໃຫ້ກາຍເປັນແລວເສດຖະກິດຢ່າງເຕັມສ່ວນ ເພື່ອການເຊື່ອມຈອດພາກພື້ນ, ການເຊື່ອມໂຍງເສດຖະກິດ ແລະ ການພັດທະນາເສດຖະກິດ-ສັງຄົມຂອງບັນດາປະເທດສະມາຊິກ
ດ້ວຍການອຳນວຍຄວາມສະດວກດ້ານການຂົນສົ່ງ, ການຄ້າ, ການລົງທຶນ, ການທ່ອງທ່ຽວ ແລະ ການໄປມາຫາສູ່ກັນລະຫວ່າງປະຊາຊົນຕາມແລວທາງດັ່ງກ່າວ.
ກອງປະຊຸມໃຫ້ເຫັນດີເປັນເອກະພາບມອບໃຫ້ປະເທດໄທ ເປັນເຈົ້າພາບຈັດກອງປະຊຸມໜ່ວຍງານສະເພາະກິດລາວ-ໄທ-ຫວຽດນາມ ໃນມໍ່ໆນີ້ ເພື່ອປຶກສາຫາລື ກ່ຽວກັບການຈັດຕັ້ງປະຕິບັດເອກະສານເພີ່ມເຕີມຂອງບົດບັນທຶກຄວາມເຂົ້າໃຈທີ່ກ່າວມາຂ້າງເທິງ, ຊຶ່ງມີແຜນການຈະຂະຫຍາຍແລວຂົນສົ່ງ
EWEC ໄປເຖິງນະຄອນຫລວງວຽງຈັນ, ບາງກອກ, ຮ່າໂນ້ຍ, ທ່າເຮືອແຫລມສະບັງ ແລະ
ທ່າເຮືອຮາຍຟອງ; ການລວມເອົາເສັ້ນທາງເລກ 12 ຂອງ ສປປ
ລາວ ເຂົ້າໃນແລວທາງ EWEC ແລະ
ການກຳນົດແລວຂົນສົ່ງໂດຍສານດ້ວຍລົດເມ ຈາກນະຄອນພະນົມປະເທດໄທ
ຜ່ານເສັ້ນທາງເລກ 12 ຂອງ ສປປ
ລາວ ໄປເຖິງຮ່າຕິງ ຫວຽດນາມ.
ເພື່ອກະກຽມໃຫ້ແກ່ກອງປະຊຸມດັ່ງກ່າວວັນທີ 19 ພຶດສະພາ 2015, ໄດ້ມີກອງປະຊຸມເຈົ້າໜ້າທີ່ອາວຸໂສ
ພາຍໃຕ້ການເປັນປະທານ ຂອງຫົວໜ້າກົມເສດຖະກິດສາກົນ, ກະຊວງການຕ່າງປະເທດແຫ່ງ
ຣາຊະອານາຈັກໄທ, ເຊິ່ງເຈົ້າໜ້າທີ່ອາວຸໂສຂອງ ສປປ
ລາວ ແມ່ນທ່ານ ວິລະສັກ ສົມພົງ
ຮອງຫົວໜ້າກົມເສດຖະກິດ, ກະຊວງການຕ່າງປະເທດເຂົ້າຮ່ວມກອງປະຊຸມດັ່ງກ່າວ.
ໃນຕອນທ້າຍກອງປະຊຸມໄດ້ຮັບຮອງເອົາຖະແຫລງການຮ່ວມຂອງກອງປະຊຸມລັດຖະມົນຕີຊ່ວຍວ່າການກະຊວງການຕ່າງປະເທດ ກ່ຽວກັບການພັດທະນາແລວເສດຖະກິດຕາເວັນອອກ-ຕາເວັນຕົກ
(EWEC) ຄັ້ງທີ 3 ແລະ ສຳລັບກອງປະຊຸມຄັ້ງທີ 4 ເຊິ່ງບັນດາປະເທດສະມາຊິກຈະປະສານງານ ແລະ ປຶກສາຫາລືກັນຕື່ມ
ກ່ຽວກັບວັນເວລາ ແລະ ສະຖານທີ່ຈັດກອງປະຊຸມ.
No comments:
Post a Comment