ສະເຫລີມສະຫລອງຄົບຮອບ 16 ປີວັນສ້າງຕັ້ງທະນາຄານຮ່ວມທຸລະກິດລາວ-ຫວຽດ ແລະ 7 ປີປະກັນໄພລາວ-ຫວຽດ

    ພິທີສະເຫລີມສະຫລອງວັນສ້າງຕັ້ງທະນາຄານຮ່ວມທຸລະກິດລາວ-ຫວຽດ (LVB)ຄົບຮອບ 16 ປີ( 22 ມິຖຸນາ 1999 - 22 ມິຖຸນາ 2015) ແລະ ວັນສ້າງຕັ້ງບໍລິສັດຮ່ວມທຸລະກິດປະກັນໄພລາວ-ຫວຽດ(LVI)ຄົບຮອບ 7 ປີ(21 ມິຖຸນາ 2008-21 ມິຖຸນາ 2015), ໄດ້ຈັດຂຶ້ນໃນວັນຄ່ຳຄືນຂອງວັນທີ 18 ມິຖຸນານີ້ ຢູ່ໂຮງແຮມດອນຈັນ ພາເລດ ນະ ຄອນຫລວງວຽງຈັນ ໂດຍການໃຫ້ກຽດເຂົ້າຮ່ວມຂອງທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ຜູ້ຊີ້ນຳວຽກງານການຜະລິດ ແລະ ຈໍລະຈອນ, ມີບັນດາລັດຖະມົນຕີ, ທ່ານເອກອັກຄະລັດຖະທູດຫວຽດນາມປະຈຳລາວ, ຄະນະອຳນວຍການ ແລະ ພະນັກງານ, ພ້ອມດ້ວຍນັກທຸລະກິດລາວ-ຫວຽດນາມ ແລະ ລູກຄ້າເຂົ້າຮ່ວມຢ່າງຫລວງ ຫລາຍ.

    ອຳນວຍການທະນາຄານດັ່ງກ່າວໄດ້ຂຶ້ນມີຄຳເຫັນຕໍ່ພິທີວ່າ: ທະນາຄານຮ່ວມທຸລະກິດລາວ-ຫວຽດ(Lao-Viet Bank), ໄດ້ສ້າງຕັ້ງຂຶ້ນບົນພື້ນຖານການຮ່ວມມືລະຫວ່າງທະນາຄານຮຸ້ນສ່ວນລົງທຶນ ແລະ ພັດທະນາຫວຽດນາມ (BIDV) ແລະ ທະນາຄານການຄ້າຕ່າງປະເທດລາວມະຫາຊົນ (BCEL)

ຕະຫລອດການເຄື່ອນໄຫວຂອງທະນາຄານໃນໄລຍະຜ່ານມາແມ່ນມີບາດກ້າວເຕີບໃຫຍ່ຂະຫຍາຍໂຕຢ່າງແຂງແຮງ ແລະ ມີປະສິດທິຜົນຢູ່ໃນອັນດັບແຖວໜ້າຂອງຕະຫລາດການເງິນໃນລາວ ແລະ ກາຍເປັນຕົວແບບທີ່ດີເລີດໃນການຮ່ວມມືດ້ານເສດຖະກິດລະຫວ່າງສອງປະເທດ, ໂດຍສະເພາະແມ່ນເປັນຂົວຕໍ່ຊຳລະສະສາງລະຫວ່າງສະກຸນເງິນກີບລາວ ແລະ ເງິນດົງຫວຽດນາມ, ສົ່ງເສີມຊ່ວຍເຫລືອບັນດາວິສາຫະກິດຫວຽດນາມທີ່ເຄື່ອນໄຫວຢູ່ລາວ, ທັງເປັນເຈົ້າການຜັນຂະຫຍາຍເນື້ອໃນຈິດໃຈຂອງລັດຖະບານສອງປະເທດໃນການຊຸກຍູ້ສາຍພົວພັນການຄ້າ ແລະ ການລົງທຶນລະຫວ່າງສອງປະເທດລາວ ແລະ ຫວຽດນາມດ້ວຍດີຕະ ຫລອດມາ, ອັນໄດ້ປະກອບສ່ວນຢ່າງຕັ້ງໜ້າເຂົ້າໃນການເສີມສ້າງ ສາຍພົວພັນມິດຕະພາບແບບພິເສດຂອງສອງປະເທດລາວ-ຫວຽດນາມໃຫ້ນັບມື້ແໜ້ນແຟ້ນຍິ່ງໆຂຶ້ນ.

    ໃນຕະຫລອດ 16 ປີຜ່ານມາ, ມີຈຳນວນການໂອນເງິນລະຫວ່າງສອງປະເທດຜ່ານທະນາຄານບັນລຸຫລາຍກວ່າ 2 ຕື້ໂດລາສະຫະລັດ, ອັດຕາການແລກປ່ຽນເງິນກີບ ແລະ ເງິນດົງບັນລຸ 12 ພັນຕື້ດົງ, ມາຮອດປັດຈຸບັນມີຍອດຊັບສີນບັນລຸເກືອບ 800 ລ້ານໂດລາສະຫະລັດ, ການຂະຫຍາຍໂຕສະເລ່ຍ 30% ຕໍ່ປີ, ລະດົມທຶນບັນລຸ 700 ລ້ານໂດລາສະຫະ ລັດ, ຍອດສິນເຊື່ອມີປະມານ 610 ລ້ານໂດລາສະຫະລັດ ແລະ ພາຍຫລັງສຳເລັດການເຊື່ອມໂຍງລະບົ(Banknetvn) ຂອງຫວຽດນາມກັບລະບົບ(B-connex)ຂອງລາວ, ລູກຄ້າຫລາຍກວ່າ 30 ລ້ານຄົນຂອງ 28 ທະນາຄານຢູ່ຫວຽດ ນາມກໍສາມາດຖອນເງິນສົດຢູ່ບັນດາຕູ້ເອທີເອັມ (ATM) ຢູ່ລາວໄດ້ຢ່າງສະດວກສະບາຍ ແລະ ຈາກຜົນສຳເລັດດັ່ງກ່າວເຮັດໃຫ້ທະນາຄານລາວ-ຫວຽດໄດ້ຮັບລາງວັນຈາກວາລະສານອາຊຽນແບັງຄິງແອນຟາຍແນນປີ 2014(Asean Banking and Finance 2014) ໃນຫົວຂໍ້ “ຫົວຄິດປະດິດສ້າງຢ່າງມີປະສິດທິຜົນບົນພື້ນຖານຄໍແບັງຄິງ (Core banking) ດີທີ່ສຸດໃນປີ 2013”, ປີ 2015 ໃນຫົວຂໍ້ “ເຕັກໂນໂລຊີ ແລະ ການເຄື່ອນໄຫວທະນາຄານພາຍໃນລາວຂອງປີ 2014”.

    ສຳລັບບໍລິສັດຮ່ວມທຸລະກິດປະກັນໄພລາວ-ຫວຽດ, ມາຮອດປັດຈຸບັນແມ່ນເປັນອັນດັບສອງໃນຕະຫລາດປະກັນໄພ, ມີສຳນັກງານໃຫຍ່ຕັ້ງຢູ່ນະຄອນຫລວງວຽງຈັນ, ມີຫ້ອງການສາຂາປະຈຳຢູ່ 12 ແຂວງໃນທົ່ວປະເທດ, ມີ 180 ຈຸດບໍລິການ ແລະ 200 ສາຂາບໍລິການຍ່ອຍ, ການເຕີບໂຕຂອງທຸລະກິດໃນປີ 2014 ແມ່ນມີລາຍຮັບບັນລຸ 12 ລ້ານໂດລາສະຫະລັດ,ກວມ 25% ຂອງອັດຕາສ່ວນຕະຫລາດປະກັນໄພຢູ່ລາວ ແລະ ເປັນໜຶ່ງ 10 ອັນດັບຕະຫລາດປະກັນໄພຢູ່ຫວຽດນາມ, ເຊິ່ງທັງໝົດນີ້ແມ່ນຂີດໝາຍອັນລ້ຳຄ່າເພື່ອພ້ອມກັນກ້າວໄປເປັນໜຶ່ງໃນບັນດາທະນາຄານ ແລະ ການປະກັນໄພທີ່ເຂັ້ມແຂງ, ທັນສະໄໝຢູ່ລາວ, ເພື່ອໃຫ້ສົມເປັນຕົວແບບຂອງຄວາມສາມັກຄີ, ຮ່ວມມືຢ່າງໂປ່ງໃສ ແລະ ຊື່ສັດລະຫວ່າງສອງພັກ ແລະ ລັດ ແລະ ປະຊາຊົນສອງຊາດລາວ-ຫວຽດນາມ.