ລາວຮຽກຮ້ອງປະເທດລຸ່ມນ້ຳຂອງຮ່ວມມືດ້ານສື່ຫລາຍຂຶ້ນ

            ກອງປະຊຸມໂຄງການແລກປ່ຽນການຢ້ຽມຢາມລະຫວ່າງສື່ມວນຊົນ ຈາກປະເທດ ລຸ່ມແມ່ນ້ຳຂອງ ແລະ ສປ ຈີນ ຄັ້ງ ທີ III ມີຂຶ້ນໃນວັນທີ 10 ມິຖຸນາ ຜ່ານມານີ້, ຢູ່ນະຄອນຄຸນມິງ ສປ ຈີນ, ໂດຍການເປັນປະທານຂອງທ່ານ ຈາວ ຈິງສະ ມາຊິກຄະນະປະຈຳພັກແຂວງຢຸນນານ, ເຊິ່ງຄະນະຜູ້ແທນຝ່າຍລາວເຂົ້າຮ່ວມກອງ ປະຊຸມດັ່ງກ່າວນຳໂດຍທ່ານ ສະຫວັນ ຄອນ ຣາຊມົນຕຣີ ລັດຖະມົນຕີຊ່ວຍວ່າ ການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ພ້ອມດ້ວຍຄະ ນະຜູ້ແທນລະດັບສູງຈາກບັນດາປະເທດລຸ່ມແມ່ນ້ຳຂອງເຂົ້າຮ່ວມເປັນຈຳ ນວນຫລາຍ.

ປະທານໄດ້ກ່າວເປີດກອງປະຊຸມວ່າ: ໂຄງການດັ່ງກ່າວມີບົດບາດສຳຄັນຫລາຍໃນການເສີມຂະຫຍາຍການ ຮ່ວມມືລະຫວ່າງບັນດາປະເທດລຸ່ມແມ່ນ້ຳຂອງ ແລະ ສປ ຈີນ ໃຫ້ເຂົ້າສູ່ລວງເລິກ, ເພີ່ມທະວີຄວາມສາມັກຄີມິດຕະ ພາບລະຫວ່າງປະຊາຊົນເວົ້າລວມ, ເວົ້າສະເພາະກໍຄືຂົງເຂດວຽກງານສື່ມວນຊົນໃນ 6 ປະເທດລຸ່ມນ້ຳຂອງພວກເຮົາ,

ໄດ້ມີການຮ່ວມມືແລກປ່ຽນດ້ານຂໍ້ມູນຂ່າວສານ ແລະ ແລກປ່ຽນການຢ້ຽມຢາມຂອງຄະນະຜູ້ແທນເຊິ່ງກັນ ແລະ ກັນດ້ວຍດີຕະຫລອດມາ, ອັນໄດ້ປະກອບສ່ວນສຳຄັນເຂົ້າໃນການສ້າງຄວາມຮັບຮູ້, ຄວາມເຂົ້າໃຈໃນດ້ານການພັດ ທະນາເສດຖະກິດ, ສັງຄົມ, ວັດທະນະທຳ, ຄວາມສາມັກຄີ ແລະ ນຳຜົນປະໂຫຍດຕົວຈິງມາສູ່ປະຊາຊົນໃນເຂດລຸ່ມ ແມ່ນ້ຳຂອງໄດ້ເປັນຢ່າງດີ.

    ໃນໂອກາດນີ້, ລັດຖະມົນຕີຊ່ວຍວ່າການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວລາວກໍໄດ້ມີຄຳເຫັນ ວ່າ: ໃນໄລຍະຜ່ານມາ, ສປປ ລາວ ແລະ ສປ ຈີນ ໄດ້ມີການຮ່ວມມື ແລະ ຊ່ວຍເຫລືອເຊິ່ງກັນ ແລະກັນໃນຫລາຍດ້ານ ແລະ ສຳລັບການຮ່ວມມືໃນຂົງເຂດວຽກງານສື່ມວນຊົນກໍມີຫລາຍອັນພົ້ນເດັ່ນເປັນຕົ້ນ: ໄດ້ມີການລົງນາມບົດບັນທຶກ

ຄວາມເຂົ້າໃຈລະຫວ່າງລາວ ແລະ ຈີນ ເພື່ອສ້າງສະຖານີສົ່ງສັນຍານວິທະຍຸ ແລະ ໂທລະພາບຈີນໃນນະຄອນຫລວງ ວຽງຈັນ. ນອກຈາກນີ້ລັດຖະບານຈີນ ກໍມີຄວາມພະຍາຍາມໃນການສະໜັບສະໜູນຊ່ວຍເຫລືອ, ເສີມສ້າງຄວາມເຂັ້ມ ແຂງໃຫ້ແກ່ວຽກງານສື່ມວນຊົນຂອງລາວດ້ວຍການແລກປ່ຽນຂໍ້ມູນຂ່າວສານ, ແລກປ່ຽນຄະນະຜູ້ແທນທັງໃນລະດັບ ບໍລິຫານ, ວິຊາການ, ສະໜອງອຸປະກອນ-ເຕັກນິກທີ່ທັນສະໄໝເພື່ອຮັບໃຊ້ເຂົ້າໃນການພັດທະນາວຽກງານສື່ມວນ ຊົນລາວ.

 ໃນໂອກາດນີ້, ລັດຖະມົນຕີຊ່ວຍ ສະຫວັນຄອນ ຣາຊມົນຕຣີ ໄດ້ຮຽກຮ້ອງໃຫ້ມີການເສີມຂະຫຍາຍການ ຮ່ວມມືນຳກັນຫລາຍຂຶ້ນກວ່າເກົ່າ, ໂດຍສະເພາະແມ່ນການສ້າງຕັ້ງ ແລະ ເສີມຂະຫຍາຍເຄືອຂ່າຍສະໜອງຂໍ້ມູນຂ່າວ ສານ ແລະ ສື່ມວນຊົນ ເພື່ອເຮັດໃຫ້ປະຊາຊົນໃນພາກພື້ນນີ້ໄດ້ຮັບຮູ້ຂໍ້ມູນຂ່າວສານທີ່ດີ ແລະ ມີປະໂຫຍດຫລາຍກວ່າ ເກົ່າ.