ລາວ-ກູເວດຍົກເວັ້ນວີຊາທາງການທູດ ແລະ ລັດຖະການ

   ພິທີລົງນາມຍົກເວັ້ນວີຊາຜູ້ຖືໜັງສືຜ່ານແດນທາງການທູດ ແລະ ລັດຖະການລະ ຫວ່າງ ສ ປປ ລາວ ແລະ ລັດກູເວດ ມີຂຶ້ນໃນວັນທີ 10 ມິຖຸນານີ້ຢູ່ນະຄອນ ຫລວງວຽງຈັນລະຫວ່າງທ່ານສະເຫລີມໄຊ ກົມມະສິດ ລັດຖະມົນຕີຊ່ວຍວ່າ ການກະຊວງການຕ່າງປະເທດລາວ ແລະ ທ່ານ ນາບິນ ອາລ ດາຄິວ ເອກອັກ ຄະລັດຖະທູດແຫ່ງລັດກູເວດປະຈຳລາວ, ສັນຍາດັ່ງກ່າວລະບຸວ່າ: ນັບແຕ່ນີ້ເປັນຕົ້ນ ໄປລັດຖະ ບານສອງປະເທດໄດ້ປະກາດຍົກເວັ້ນວີຊາໃຫ້ຜູ້ທີ່ຖືໜັງສືຜ່ານ ແດນ ທາງການທູດ ແລະ ລັດຖະການເພື່ອເດີນທາງເຂົ້າ-ອອກ ແລະ ພັກເຊົາໃນດິນແດນປະເທດຄູ່ສັນຍາໃນ ກຳນົດ ບໍ່ເກີນ 30 ວັນ, ກໍລະນີໄປປະຈໍາການຢູ່ສະຖານທູດ ຫລື ສະຖານກົງສູນຕ້ອງແຈ້ງໃຫ້ຄູ່ສັນຍາຮັບຊາບລ່ວງໜ້າ 30 ວັນກ່ອນການ ເດີນທາງ, ເຊິ່ງການຍົກເວັ້ນວີຊາຄັ້ງນີ້ຈະອຳນວຍຄວາມສະດວກໃຫ້ແກ່ສອງຝ່າຍໃນການເດີນທາງຢ້ຽມ ຢາມ ແລະ

ເຂົ້າຮ່ວມກອງປະຊຸມຕ່າງໆ, ທັງເປັນການຮັດແໜ້ນສາຍພົວພັນມິດຕະພາບ ແລະ ການຮ່ວມມືຮອບດ້ານ ລະຫວ່າງ ສປປ ລາວ ແລະ ລັດກູເວດໃຫ້ແໜ້ນແຟ້ນຍິ່ງໆຂຶ້ນ.

     ສຳລັບ ສປປ ລາວ ແລະ ລັດກູເວດ, ໄດ້ສ້າງຕັ້ງສາຍພົວພັນການທູດນຳກັນໃນວັນທີ 14 ກໍລະກົດ 2008 ຕະ ຫລອດ ໄລຍະຜ່ານມາການພົວພັນຮ່ວມມືສອງຝ່າຍໄດ້ມີບາດກ້າວຂະຫຍາຍຕົວຢ່າງຕໍ່ເນື່ອງ, ການນຳຂັ້ນສູງຂອງສອງ ປະເທດໄດ້ ມີການແລກປ່ຽນການຢ້ຽມຢາມເຊິ່ງກັນ ແລະ ກັນຢ່າງປົກກະຕິ, ທັງໄດ້ໃຫ້ການຊ່ວຍເຫລືອ ແລະ ສະ ໜັບສະໜູນເຊິ່ງກັນ ແລະ ກັນໃນເວທີພາກພື້ນ ແລະ ສາກົນ.ປັດຈຸບັນລາວ ແລະ ກູເວດ ໄດ້ລົງນາມເອກະສານ

ຮ່ວມມືກັນຈຳນວນ 14 ສະບັບ, ເຊິ່ງເປັນພື້ນຖານສຳຄັນໃຫ້ແກ່ການພົວພັນຮ່ວມມືລະຫວ່າງສອງປະເທດໂດຍ ສະເພາະການຮ່ວມມືທາງດ້ານເສດຖະກິດ, ການຄ້າ-ການລົງທຶນ, ກະສິກຳ, ການທ່ອງທ່ຽວ ແລະ ອື່ນໆ.

ນອກນີ້ ລັດຖະບານກູເວດຍັງໄດ້ສະໜອງເງິນກູ້ດອກເບ້ຍຕ່ຳເພື່ອນຳໃຊ້ເຂົ້າໃນການພັດທະນາເສດຖະກິດ-ສັງຄົມຂອງລາວໃຫ້ເຂັ້ມແຂງ.