laophatthananewspaper: ອົງການໄອຍະການຈະຖືການປັບປຸງບຸກຄະລາກອນເປັນຫລັກ

ໃນສະພາບຄວາມເປັນຈິງຂອງການປະຕິບັດວຽກງານຕິດຕາມກວດກາໃນຂົງເຂດອົງການໄອຍະການປະ ຊາຊົນທີ່ຜ່ານມາເຫັນວ່າຍັງພົບຄວາມຫຍຸ້ງຍາກທາງດ້ານບຸກຄະລາກອນ ຄືໃນສົກປີ 2015-2016 ທາງອົງການຍັງຈະສືບຕໍ່ສຸມໃສ່ສ້າງບຸກຄະລາກອນໃຫ້ມີຄວາມສາມາດ ແລະ ສ້າງຄວາມເຊື່ອຖືໃຫ້ແກ່ສັງຄົມໄດ້ຫລາຍຂຶ້ນໃນການເພີ່ມທະວີຕິດຕາມກວດກາການດຳເນີນຄະດີຂອງອົງການສືບສວນ-ສອບສວນ ເປັນຕົ້ນການເຂົ້າຮ່ວມສືບສວນ-ສອບສວນ ແລະ ການເກັບກຳຂໍ້ມູນຫລັກຖານຮ່ວມກັບເຈົ້າໜ້າທີ່ກ່ຽວຂ້ອງແຕ່ຫົວທີ ແລະ ເຂົ້າຮ່ວມການດຳເນີນຄະດີຂອງສານ ກ່ຽວກັບຄະດີແພ່ງຢູ່ຂັ້ນຕົ້ນຕາມກົດໝາຍທີ່ກຳນົດໄວ້.

ຜູ້ລາຍງານຂ່າວໃຫ້ຮູ້ວ່າ: ຕໍ່ກັບສະພາບຄວາມເປັນຈິງຂອງກົງຈັກການຈັດຕັ້ງຂອງຕົນ ເຊິ່ງຍັງບໍ່ສາມາດຕອບສະໜອງໜ້າທີ່ການເມືອງໃນໄລຍະໃໝ່ໄດ້ ຍ້ອນວ່າໂຄງປະກອບກົງຈັກການຈັດຕັ້ງບໍ່ຄ່ອງຕົວ, ບໍ່ຄົບຊຸດ, ຖັນແຖວພະນັກງານວິຊາການບໍ່ທັນພຽງພໍດ້ານຈຳນວນ ແລະ ຄວາມຮູ້ຄວາມສາມາດດ້ານວິຊາການຍັງຈຳກັດ, ສ່ວນຫລາຍຍັງໜຸ່ມນ້ອຍບໍ່ທັນມີບົດຮຽນ ແລະ ປະສົບການ. ດັ່ງນັ້ນ ໃນຕໍ່ໜ້ານີ້ຕ້ອງຫັນໄປຕາມທິດນຳ 3 ສ້າງ ແລະ ຕາມລັດຖະທຳມະນູນ

ສະບັບປັບປຸງ ກໍຄືກົດໝາຍວ່າດ້ວຍອົງການໄອຍະການປະຊາຊົນ ມາດຕາ 18 ໄດ້ລະບຸໄວ້ວ່າ: ອົງການໄອຍະການປະຊາຊົນເຂດສ້າງຕັ້ງຂຶ້ນ ໂດຍເອົາເມືອງໃດໜຶ່ງ ຫລື ຫລາຍເມືອງມາໂຮມເຂົ້າກັນເປັນເຂດໜຶ່ງ, ແຕ່ປັດຈຸບັນເງື່ອນໄຂບາງດ້ານບໍ່ທັນພ້ອມ ເປັນຕົ້ນດ້ານບຸກຄະລາກອນ, ພື້ນຖານໂຄງລ່າງ, ງົບປະມານ ແລະ ອື່ນໆ ເຊິ່ງໃນສົກປີ 2015-2016 ຈະລົງສົມທົບກັບຄະນະພັກ-ອົງການປົກຄອງທ້ອງຖິ່ນ ແລະ ສານປະຊາຊົນສູງສຸດ ເພື່ອລົງເກັບກຳ ແລະ ສຶກສາຄວາມເປັນໄປໄດ້. ພ້ອມນັ້ນ ກໍຈະສ້າງຕັ້ງອົງການໄອຍະການປະຊາຊົນເມືອງ ຫລື ເຂດຕື່ມ ແລະ ພ້ອມນັ້ນ ກໍເພີ່ມຈຳນວນພະນັກງານໃຫ້ຂັ້ນທ້ອງຖິ່ນຢ່າງສົມເຫດສົມຜົນ ເພື່ອຕອບສະໜອງຄວາມຮຽກຮ້ອງຕ້ອງການໜ້າທີ່ການເມືອງໃນໄລຍະໃໝ່, ບຳລຸງຍົກລະດັບຄວາມສາມາດດ້ານວິຊາການ, ຄຸນທາດການເມືອງ, ຄຸນສົມບັດສິນທຳປະຕິວັດ ດ້ວຍການສຶກສາອົບຮົມວຽກງານການເມືອງແນວຄິດຢ່າງເປັນປົກກະຕິດ້ວຍຫລາຍວິທີເຊັ່ນ: ການເຝິກອົບຮົມ, ການສຳມະນາ, ການຮ່ຳຮຽນເຊື່ອມຊຶມເອກະສານການເມືອງຕ່າງໆຂອງພັກ-ລັດໃນແຕ່ລະໄລຍະ, ສົມທົບກັບຄະນະພັກ-ອົງການປົກຄອງທ້ອງຖິ່ນກວດກາຢ່າງເຄັ່ງຄັດຕໍ່ພະນັກງານໄອຍະການທີ່ລະເມີດກົດໝາຍ ໂດຍຖືເອົາການປະເມີນຜົນລັດຖະກອນຂອງອົງການໄອຍະການປະຊາຊົນທົ່ວປະເທດໃນແຕ່ລະປີຕາມຂໍ້ແຂ່ງຂັນ 3 ມີ 4 ຮັບປະກັນ ຄືມີການເມືອງ-ແນວຄິດດີ, ມີການພັດທະນາດີ, ມີຄວາມສາມັກຄີ ແລະ ຮັບປະກັນຄວາມຖືກຕ້ອງຕາມກົດໝາຍ, ຮັບປະກັນຄວາມໂປ່ງໃສ, ຮັບປະກັນຄວາມຍຸຕິທຳ, ຮັບປະກັນກຳນົດເວລາ ແນໃສ່ຊອກໃຫ້ເຫັນບຸກຄົນທີ່ພົ້ນເດັ່ນໃນຂະບວນການວຽກງານຕົວຈິງ ເພື່ອຍ້ອງຍໍຊົມເຊີຍ ແລະ ບຳລຸງກໍ່ສ້າງຢ່າງຖືກທິດ, ພ້ອມນັ້ນ ກໍຊອກໃຫ້ເຫັນຜູ້ທີ່ລະເມີດລະບຽບວິໄນ, ລະບຽບລັດຖະກອນ ແລະ ລະບຽບຂອງພັກ ເພື່ອສຶກສາອົບຮົມກ່າວເຕືອນ, ປະຕິບັດວິໄນ ແລະ ປົດປ່ອຍອອກຈາກລັດຖະກອນຕາມສະຖານໜັກ ຫລື ເບົາ.