ກະຊວງພະລັງງານ ແລະ ບໍ່ແຮ່ຈະກວດການເຄື່ອນໄຫວຂອງບໍລິສັດວົງຜາສຸກບໍ່ແຮ່

ຫົວໜ້າກົມບໍ່ແຮ່, ກະຊວງພະລັງງານ ແລະ ບໍ່ແຮ່, ຈະລົງກວດກາ ການເຄື່ອນໄຫວຂອງ ບໍລິສັດ ວົງຜາສຸກ ບໍ່ແຮ່, ຢູ່ເມືອງຊະນະຄາມ ແຂວງວຽງຈັນ ພາຍຫລັງມີປະຊາຊົນໃກ້ຄຽງມີຂໍ້ຂ້ອງໃຈວ່າບໍລິສັດ ດັ່ງກ່າວໄດ້ຮັບອະ ນຸຍາດດຳເນີນການ ສຳຫລວດ ຫລື ຂຸດຄົ້ນແຮ່ກັນແທ້, ເນື່ອງຈາກເຫັນເອົາຕະແກງມາຂຸດເອົາແຮ່ຄຳໂດຍກົງ ແລະ ອາດມີການ ໃຊ້ສານເຄມີ ເຊິ່ງຈະສົ່ງຜົນກະທົບຕໍ່ການດຳລົງຊີວິດຂອງປະຊາຊົນທີ່ອາ​ໄສໃນເຂດໃກ້ຄຽງ.

     ຫົວໜ້າກົມບໍ່ແຮ່ ກ່າວວ່າ: ບໍລິສັດດັ່ງກ່າວ ໄດ້ລົງນາມສັນຍາວ່າ ດ້ວຍການສຳຫລວດແຮ່ຄຳກັບລັດ ຖະບານໃນເດືອນກັນຍາ 2009 ມີເນື້ອທີ່ທັງໝົດ 172 ກິໂລຕາແມັດ, ພາຍຫລັງສຳເລັດການສຳຫລວດບໍລິສັດໄດ້ຄັດເລືອກ ເອົາເນື້ອທີ່ຈຳນວນ 5,78 ກິໂລຕາແມັດ ເຂົ້າສູ່ການສ້າງບົດວິພາກໂຄງການລະອຽດ ແລະ
ເນື້ອທີ່ຈຳນວນ 166,2ກິໂລຕາແມັດແມ່ນບໍລິສັດໄດ້ສະເໜີຂໍສືບຕໍ່ສຶກສາບົດວິພາກເສດຖະກິດ-ເຕັກນິກເບື້ອງຕົ້ນ, ປັດຈຸບັນອາຍຸສັນຍາໝົດແລ້ວ ແລະ ບໍລິສັດໄດ້ສະເໜີຂໍຕໍ່ອາຍຸສັນຍານຳ ລັດຖະບານ, ຊຶ່ງຍັງຢູ່ໃນຂັ້ນຕອນການພິຈາລະນາຂອງຂັ້ນເທິງຢູ່, ສ່ວນກໍລະນີມີປະຊາຊົນສະເໜີ ວ່າບໍລິສັດໄດ້ດຳເນີນການຂຸດຄົ້ນ ແລະ ນຳໃຊ້ຕະແກງຂຸດເອົາແຮ່ຄຳນັ້ນ, ແມ່ນຈະໄດ້ສົມທົບ ກັບພາກສ່ວນກ່ຽວຂ້ອງ ແລະ ທ້ອງຖິ່ນເພື່ອລົງກວດກາເບິ່ງຄວາມເປັນຈິງ.