ໃນວັນທີ22
ສິງຫານີ້, ຄະນະພັກ, ອຳນາດການປົກຄອງນະຄອນຫລວງວຽງຈັນ, ໄດ້ຈັດພິທີໂຮມຊຸມນຸມໃຫຍ່ລະນຶກວັນຢຶດອໍານາດ 23 ສິງຫາ(23/8/1975-23/8/2015) ຂຶ້ນທີ່ຫໍປະຊຸມແຫ່ງຊາດ, ໂດຍການໃຫ້ກຽດເຂົ້າຮ່ວມຂອງທ່ານ ທອງສິງ ທໍາມະວົງ ກໍາມະການກົມການເມືອງສູນກາງພັກ, ນາຍົກລັດຖະມົນຕີ, ທ່ານພົນເອກ ສີສະຫວາດ ແກ້ວບຸນພັນ ອະດີດກໍາມະການກົມການເມືອງສູນກາງພັກ, ທ່ານ ດຣ ສິນລະວົງ ຄຸດໄພທູນ ກໍາມະການສູນກາງພັກ, ເຈົ້າຄອງນະຄອນຫລວງວຽງຈັນ ແລະ ພະນັກງານອາວຸໂສບໍານານ, ພ້ອມດ້ວຍມວນຊົນເຂົ້າຮ່ວມເປັນຈຳນວນຫລາຍ.
ໃນໂອກາດດັ່ງກ່າວທ່ານເຈົ້າຄອງນະຄອນຫລວງວຽງຈັນ ໄດ້ກ່າວສູນທອນພົດຕໍ່ງານມິດຕິງໃຫຍ່ດັ່ງກ່າວວ່າ:ການຢຶດອໍານາດ 23 ສິງຫາຢູ່ນະຄອນຫລວງວຽງຈັນແມ່ນເປັນເຫດການການເມືອງທີີ່ມີຄວາມໝາຍສໍາຄັນຍິ່ງຂອງຊາດລາວ, ກໍຄືຊາວນະຄອນຫລວງວຽງຈັນ, ການຢຶດອໍານາດ 23 ສິງຫາຢູ່ນະຄອນວຽງຈັນເປັນການໂມ່ງບາດຄ້ອນ
ມະຫັດສະຈັນເຂົ້າໃສ່ “ກໍາແພງ”ສຸດທ້າຍຂອງອິດທິກໍາລັງຈັກກະພັດຜູ້ຮຸກຮານແລະພວກປະຕິການຂາຍຊາດໃຫ້ມຸ່ນທະລາຍໄປຢ່າງສິ້ນເຊີງ, ເປັນການໄຂເສັ້ນທາງສູ່ໄຊຊະນະອັນສົມບູນຂອງການປະຕິວັດປົດປ່ອຍຊາດ, ປະທິປະໄຕ ແລະ ເປັນພື້ນຖານ, ເປັນອາລຸນວັນໃໝ່ຂອງການສ້າງຕັ້ງລະບອບສາທາລະນະລັດປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975, ທັງແມ່ນໝາກຜົນຂອງການຕໍ່ສູ້ປະຕິວັດອັນຍືດເຍື້ອຍາວນານທີ່ເຕັມໄປດ້ວຍຄວາມທຸກຍາກລໍາບາກ, ພິລະອາດຫານ, ການເສຍສະຫລະຊີວິດ ແລະ ເລືອດເນື້ອຂອງປະຊາຊົນລາວບໍ່ຈັກວ່າເທົ່າໃດ,
ທັງແມ່ນໝາກຜົນຂອງການນໍາໃຊ້ສາມບາດຄ້ອນຍຸດທະສາດບຸກໂຈມຕີສັດຕູ “ແບບບົວບໍ່ຊໍ້ານໍ້າບໍ່ຂຸ່ນ”, ທັງແມ່ນກຽດອັນສູງສຸດຂອງນັກຮັກຊາດ, ຊົນຊັ້ນກໍາມະກອນ, ນັກຮຽນຮູ້ປັນຍາຊົນ ແລະ ຜູ້ອອກແຮງງານຊາວນະຄອນຫລວງວຽງຈັນຜົນສໍາເລັດຂອງວັນຢຶດອໍານາດ 23 ສິງຫາແມ່ນໄຊຊະນະຂອງແນວທາງປະຕິວັດອັນຖືກຕ້ອງ
ແລະ ການນໍາພາອັນສະຫລາດສ່ອງໃສຂອງພັກທີ່ຮູ້ໝູນໃຊ້ລັດທິມາກ-ເລນິນເຂົ້າໃນພຶດຕິກໍາຕົວຈິງຂອງການປະຕິວັດລາວຢ່າງປະດິດສ້າງ; ມັນແມ່ນໄຊຊະນະຂອງກໍາລັງແຮງແຫ່ງຄວາມສາມັກຄີເປັນຈິດໜຶ່ງໃຈດຽວກັນຂອງປວງຊົນທັງຊາດ, ຄວາມເປັນອັນໜຶ່ງອັນດຽວກັນຂອງກອງທັບ ແລະ ປະຊາຊົນລາວບັນດາເຜົ່າ
ແລະ ແມ່ນໄຊຊະນະຂອງຄວາມສາມັກຄີຮ່ວມສໍາພັນສູ້ຮົບລະຫວ່າງປະຊາຊົນລາວ, ຫວຽດນາມ ແລະ ກໍາປູເຈຍທີ່ໄດ້ຄຽງບ່າຄຽງໄຫ່ລກັນຕ້ານສັດຕູໂຕດຽວກັນ,
ພ້ອມທັງໄດ້ຮັບການຊ່ວຍເຫລືອ,
ສະໜັບສະໜູນອັນແຂງແຮງ ແລະ ລ້ຳຄ່າຂອງບັນດາປະເທດສັງຄົມນິຍົມອ້າຍນ້ອງເປັນຕົ້ນແມ່ນ
ສສ ຫວຽດນາມ,
ອະດີດສະຫະພາບໂຊວຽດ, ສປ.ຈີນ ແລະ ຂອງປະຊາຊົນຜູ້ກ້າວໜ້າໃນໂລກ.
No comments:
Post a Comment