20 ປີແຫ່ງການເຊື່ອມໂຍງສູ່ຕະຫລາດໂລກຂອງ BIDV

ໃນຄ່ຳວັນທີ 21 ສິງຫາຜ່ານມານີ້, ທະນາຄານລົງທຶນ ແລະ ພັດທະນາຫວຽດນາມ (BIDV), ໄດ້ຈັດງານລ້ຽງສະຫລອງຄົບຮອບ 20 ປີແຫ່ງການເຊື່ອມໂຍງສູ່ຕະຫລາດໂລກຢູ່ໂຮງແຮມລາວພລາຊາ ນະຄອນຫລວງວຽງຈັນ ໂດຍການເຂົ້າຮ່ວມຂອງທ່ານ ດຣ ບຸນປອນ ບຸດຕະນະວົງ ຮອງນາຍົກລັດຖະມົນຕີ, ຜູ້ຊີ້ນຳຂົງເຂດວຽກງາເສດຖະກິດມະຫາພາກ ແລະ ການບໍລິການ, ມີບັນດາລັດຖະມົນຕີວ່າການ, ຊ່ວຍວ່າການ, ເອກອັກຄະລັດຖະທູດຫວຽດນາມປະຈຳລາວ, ມີຄະນະຜູ້ບໍລິຫານແລະ ພະນັກງານທະນາຄານ, ພ້ອມດ້ວຍແຂກເຂົ້າຮ່ວມເປັນຈຳນວນຫລາຍ.

    ຮອງປະທານສະພາບໍລິຫານທະນາຄານດັ່ງກ່າວໄດ້ມີຄຳປາໄສຕໍ່ງານລ້ຽງວ່າ: ທະນາຄານ BIDV ໄດ້ຮັບການສ້າງຕັ້ງຂື້ນເມື່ອປີ 1957 ດ້ອຍຮູບແບບຕອບສະໜອງງົບປະມານຂອງລັດຖະບານ, ຈົນມາຮອດປີ 1995 ຈຶ່ງໄດ້ຫັນມາເຄື່ອນໄຫວຕາມລະບົບທະນາຄານທຸລະກິດ ແລະ ເຫັນວ່າມີບາດກ້າວຂະຫຍາຍຕົວສູງ, ໄລ່ມາຮອດເດືອນພຶດສະ ພາ 2015 ນີ້,

ທະນາຄານດັ່ງກ່າວມີຍອດມູນຄ່າຊັບສີນທັງໝົດເກືອບ 35 ຕື້ໂດລາສະຫະລັດ, ໄດ້ກາຍເປັນໜຶ່ງໃນ 4 ຂອງທະນາຄານທຸລະກິດແຖວໜ້າຂອງຫວຽດນາມ ແລະ 20 ປີຜ່ານມາແຫ່ງການພົວພັນຮ່ວມມືລະຫວ່າງ BIDV ແລະ ທະນາຄານການຄ້າຕ່າງປະເທດລາວມະຫາຊົນ BCEL ໃນປີ 1999 ສອງຝ່າຍໄດ້ຮ່ວມມືສ້າງຕັ້ງທະນາຄານຮ່ວມທຸລະກິດລາວ-ຫວຽດ(Lao-VietBank) ແລະ ນັບແຕ່ນັ້ນມາທະນາຄານດັ່ງກ່າວໄດ້ມີທ່າຂະຫຍາຍຕົວຂຶ້ນເປັນລຳດັບ ແລະ ໄດ້ປະກອບສ່ວນສຳຄັນເຂົ້າໃນການຈັດຕັ້ງປະຕິບັດນະໂຍບາຍການເງິນ-ເງິນຕາ ເພື່ອຕອບສະໜອງໃຫ້ແກ່ຄວາມຕ້ອງການການພັດທະນາເສດຖະກິດ-ສັງຄົມຂອງລາວນັບມື້ເຕີບໃຫຍ່ເຂັ້ມແຂງ, ເຮັດສຳເລັດໜ້າທີ່ການ ເມືອງຂອງຕົນກໍຄືການພົວພັນຮ່ວມມືເສດຖະກິດ-ການຄ້າ ແລະ ການລົງທຶນລະຫວ່າງສອງປະເທດປະສົບຜົນສຳເລັດ ແລະ ນັບມື້ກ້າວເຂົ້າສູ່ລວງເລິກ.

             ໃນໂອກາດນີ້, ຮອງນາຍົກລັດຖະມົນຕີ ດຣ ບຸນປອນ ບຸດຕະນະວົງ ໄດ້ໃຫ້ກຽດຂຶ້ນມີຄຳເຫັນວ່າ: ລາວ-ຫວຽດນາມ ເປັນສອງປະເທດອ້າຍນ້ອງທີ່ມີສາຍພົວພັນມິດຕະພາບອັນເລິກເຊິ່ງ ແລະ ຮ່ວມມືພິເສດຮອບດ້ານ, ດັ່ງນັ້ນໃນໄລຍະຜ່ານມາ, ພັກ ແລະ ລັດຖະບານສອງປະເທດລາວ-ຫວຽດນາມ ຍາມໃດກໍໄດ້ເອົາໃຈໃສ່ຊຸກຍູ້ການພົວພັນຮ່ວມມືລະຫວ່າງສອງປະເທດໃນຫລາຍຂົງເຂດ ແລະ ພິເສດກໍແມ່ນການຮ່ວມມືດ້ານເສດຖະກິດ ແລະ ຕະຫລອດ 20 ປີຂອງການເຄື່ອນໄຫວຮູບແບບທະນາຄານທຸລະກິດຂອງ(BIDV), ໃນນັ້ນ 16 ປີແມ່ນການສ້າງຕັ້ງ ແລະ ເຄື່ອນໄຫວດຳເນີນທຸລະກິດໃນຂົງເຂດການເງິນ-ທະນາຄານຢູ່ລາວ, ຊຶ່ງໄດ້ປະຕິບັດໜ້າທີ່ສຳຄັນທີ່ລັດຖະບານສອງປະເທດລາວ-ຫວຽດນາມມອບໝາຍໃຫ້ບັນລຸຜົນເປັນຢ່າງດີ, ອັນໄດ້ປະກອບສ່ວນຢ່າງຕັ້ງໜ້າໃນພາລະກິດພັດທະນາເສດຖະກິດຂອງລາວ, ໂດຍຜ່ານການຈັດສັນແຫລງເງີນທຶນສຳລັບໂຄງການເສດຖະກິດທີ່ເປັນຈຸດສຸມ, ມີລັກສະນະຍຸດທະສາດ, ບັນດາໂຄງການກໍ່ສ້າງພື້ນຖານໂຄງລ່າງຢູ່ບັນດາແຂວງ ແລະ ທ້ອງຖິ່ນຂອງລາວ, (BIDV) ໄດ້ກາຍເປັນແບບຢ່າງທີ່ພົ້ນເດັນໃນການພົວພັນຮ່ວມມືເສດຖະກິດລະຫວ່າງສອງປະເທດລາວ-ຫວຽດນາມ, ໄປພ້ອມກັການເຄື່ອນໄຫວທຸລະກິດ (BIDV) ໄດ້ເອົາໃຈໃສ່ເຂົ້າຮ່ວມ ແລະ ສະໜັບສະໜູນບັນດາການເຄື່ອນໄຫວກິດຈະກຳເພື່ອສັງຄົມຢູ່ຫລາຍຂົງເຂດທີ່ມີມູນ ຄ່າຫລາຍລ້ານໂດລາສະຫະລັດໃນແຕ່ລະປີ, ອັນເປັນການປະກອບສ່ວນຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີແບບພິເສດລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ໃຫ້ນັບມື້ເຂົ້າສູ່ລວງເລິກ.