ງານວາງສະແດງຮູບພາບ 70 ປີ ຂອງວຽກງານການຕ່າງປະເທດແຫ່ງ ສສ ຫວຽດນາມ ໄດ້ຈັດຂຶ້ນໃນວັນທີ 24 ສິງຫານີ້ ທີ່ນະຄອນຫລວງວຽງຈັນ ໂດຍສະຖານເອກອັກຄະລັດຖະທູດ ສສ ຫວຽດນາມ ຮ່ວມກັບສູນກາວັດທະນະທຳຫວຽດນາມປະຈຳລາວ ເປັນຜູ້ຈັດຂຶ້ນ ເຊິ່ງມີທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ສປປ ລາວ ແລະ ທ່ານ ຫງວຽນ ແມ໋ງ ຮຸ່ງ ເອກອັກຄະລັດຖະທູດ ສສຫວຽດນາມປະຈຳລາວ ພ້ອມທູຕານຸທູດບັນດາປະເທດອາຊຽນປະຈຳລາວ, ຜູ້ຕາງໜ້າກະຊວງຂະແໜງການຕ່າງໆຂອງລາວ ແລະ ຊາວຫວຽດນາມຜູ້ທຳມາຫາກິນຢູ່ລາວເຂົ້າຮ່ວມເປັນຈຳນວນຫລາຍ.
ຮູບພາບທີ່ນຳມາວາງສະແດງດັ່ງກ່າວມີຈຳນວນ 60 ຮູບດ້ວຍກັນທີ່ເປັນເອກະສານບົ່ງບອກເຖິງການເຄື່ອນໄຫວ ແລະ ພັດທະນາວຽກງານການພົວພັນຕ່າງປະເທດຫວຽດນາມຕະຫລອດໄລຍະ 2 ສະໄໝຂອງ 70 ປີຜ່ານມາ (28/
8/1945 -
28/8/2015) ຄືໄລຍະທີ I ແມ່ນໄລຍະຕໍ່ສູ້ປົດປ່ອຍຊາດ ແລະ ປະກາດເອກະລາດປອງດອງຊາດ (1945-1975) ແລະ ໄລຍະທີ II ແມ່ນໄລຍະຈັດຕັ້ງປະຕິບັດແນວທາງການຕ່າງປະເທດເອກະລາດ, ກຸ້ມຕົນເອງ, ສັນຕິພາບ, ການຮ່ວມມື ແລະ ພັດທະນາ, ຮ່ວມມືແບບຫລາຍຝ່າຍ ແລະ ຫລາຍທິດຂອງການພົວພັນ, ເປັນເຈົ້າການຕັ້ງໜ້າເຊື່ອມໂຍງເຂົ້າກັບສາກົນ.
ທ່ານຮອງນາຍົກລັດຖະມົນຕີ ໄດ້ມີຄຳເຫັນໃນພິທີວ່າ: 70 ປີຜ່ານມາ, ຂະແໜງການຕ່າງປະເທດຫວຽດນາມໄດ້ປະກອບສ່ວນຢ່າງໃຫຍ່ຫລວງເຂົ້າໃນພາລະກິດຕໍ່ສູ້ປົດປ່ອຍຊາດ ເພື່ອຄວາມອິດສະຫລະພາບຂອງປະຊາຊົນຫວຽດນາມໃນກ່ອນໜ້ານີ້ ກໍຄືພາລະກິດປ່ຽນແປງໃໝ່, ການເຊື່ອມໂຍງ ແລະ ປົກປັກຮັກສາປະເທດຊາດໃນປັດຈຸບັນ ແລະ ໄດ້ປະກອບສ່ວນສຳຄັນໃນການຍົກສູງຖານະບົດບາດຂອງຫວຽດນາມໃນເວທີສາກົນ.
ທ່ານຮອງນາຍົກ ກ່າວວ່າ: ຕະຫລອດໄລຍະ 70 ປີຜ່ານມາ, ບໍ່ພຽງແຕ່ໄລຍະຕໍ່ສູ້ປົດປ່ອຍຊາດໃນເມື່ອກ່ອນເທົ່ານັ້ນ ເຊິ່ງນັບທັງໄລຍະປະຕິບັດພາລະກິດປົກປັກຮັກສາ ແລະ ສ້າງສາພັດທະນາປະເທດຊາດປັດຈຸບັນ, ຂະແໜງການຕ່າງປະເທດ ລາວ-ຫວຽດນາມ ຍາມໃດກໍໄດ້ພົວພັນຮ່ວມມືແລກປ່ຽນບົດຮຽນເຊິ່ງກັນ ແລະ ກັນຕະຫລອດມາໃນການພົບປະເຈລະຈາດ້ານການຕ່າງປະເທດຢ່າງມີປະສິດທິຜົນ ແລະ ສາມາດຍາດໄດ້ໄຊຊະນະທີ່ໜ້າພາກພູມໃຈ ແລະ ໃນໂອກາດນີ້, ຕາງໜ້າພັກ, ລັດຖະບານ, ຮອງນາຍົກລັດຖະມົນຕີ ທອງລຸນ ສີສຸລິດ ກໍໄດ້ສະແດງຄວາມຂອບອົກຂອບໃຈຢ່າງເລິກເຊິ່ງຕໍ່ພັກ, ລັດຖະບານ ແລະ ປະຊາຊົນຫວຽດນາມ ກໍຄືກະຊວງການຕ່າງປະເທດຫວຽດນາມ ເຊິ່ງຍາມໃດກໍໃຫ້ການສະໜັບສະໜູນ, ຮ່ວມມືຊ່ວຍເຫລືອອັນປະເສີດ ແລະ ລ້ຳຄ່າຢ່າງທັນການຕະຫລອດມານັ້ນ.
No comments:
Post a Comment