ກອງປະຊຸມລັດຖະບານສະໄໝສາມັນ
ປະຈຳເດືອນ ສິງຫາ 2015 ໄດ້ມີຂຶ້ນ
ໃນວັນທີ 25 ສິງຫານີ້ ໂດຍການເປັນປະທານຂອງ ທ່ານ ທອງສິງ ທໍາມະວົງ ນາຍົກລັດຖະມົນຕີ,
ມີບັນດາທ່ານຮອງນາຍົກລັດຖະ ມົນຕີ ແລະ ສະມາຊິກລັດຖະບານ
ເຂົ້າຮ່ວມ. ໂດຍໄດ້ ຮັບຮອງ ບົດລາຍງານກ່ຽວກັບ ຜົນຂອງການຈັດຕັ້ງກອງປະຊຸມແລກປ່ຽນບົ ດຮຽນ ດ້ານການພັດທະນາສັງຄົມ ແລະ ຫຼຸດຜ່ອນຄວາມທຸກຍາກ ອາຊຽນ+ຈີນ ຄັ້ງທີ 9 ທີ່ນະຄອນຫຼວງວຽງຈັນ ພາຍໃຕ້ຫົວຂໍ້ “ນະວະຕະກໍາ
ດ້ານການເງິນເພື່ອແກ້ໄຂຄວາມທຸກຍາກ” ຕໍ່ຜົນສໍາເລັດດັ່ງກ່າວ. ກອງປະຊຸມຄັ້ງນີ້
ໄດ້ມີທິດຊີ້ນໍາໃຫ້ພາກສ່ວນກ່ຽວຂ້ອງ ແລະ ຂະແໜງການຕ່າງໆ
ເອົາໃຈໃສ່ຄົ້ນຄວ້າ ໃຫ້ເລິກເຊິ່ງ, ລະອຽດເພື່ອເຮັດໃຫ້ປະຊາຊົນທີ່ທຸກຍາກ
ໄດ້ເຂົ້າເຖິງແຫຼ່ງທຶນຕົວຈິງໃຫ້ຫຼາຍຂຶ້ນ ພ້ອມທັງ ກໍານົດລະບຽບການລວມ
ທີ່ຊັດເຈນ, ຈະແຈ້ງ ເພື່ອຄວາມເປັນເອກະພາບ ໃນການຄຸ້ມຄອງ ແລະ ນໍາໃຊ້ກອງທຶນຕ່າງໆ
ໃຫ້ມີປະສິດທິຜົນ ໂດຍຕິດພັນກັບທະນາຄານ ທີ່ປ່ອຍສິນເຊື່ອ. ພ້ອມດຽວນັ້ນ,
ໃຫ້ສືບຕໍ່ຍາດແຍ່ງການຊ່ວຍເຫຼືອຈາກອົງການ ຈັດຕັ້ງຕ່າງໆ ທັງພາຍໃນ ແລະ ຕ່າງປະເທດ
ໃຫ້ຫຼາຍຂຶ້ນ; ຕໍ່ການກະກຽມຄວາມພ້ອມ ເປັນເຈົ້າພາບຈັດກອງປະຊຸມລັດຖະມົນຕີ
ພັດທະນາຊົນນະບົດ ແລະ ລຶບລ້າງຄວາມທຸກຍາກອາຊຽນ ຄັ້ງທີ 9
ກອງ
ປະຊຸມໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງ ແລະ ຂະແໜງການຕ່າງໆ ເອົາໃຈໃສ່ກະກຽມ,
ປະສານສົມທົບ ແລະ ແບ່ງຄວາມຮັບຜິດຊອບຢ່າງຈະແຈ້ງ
ເພື່ອໃຫ້ມີຜົນສໍາເລັດ ແລະ ດໍາເນີນໄປດ້ວຍບັນຍາກາດດີ
ທັງຮັບປະກັນໃຫ້ໄດ້ຄວາມສະຫງົບ, ປອດໄພ ແລະ ມີຄວາມເປັນລະບຽບຮຽບຮ້ອຍ. ນອກນັ້ນ,
ກອງປະຊຸມ ຍັງເຫັນດີໂຄງການເລືອກຕົວແບບຮ່ວມມືລາວ-ຈີນ ຈໍານວນ 2 ບ້ານ ຄື: ບ້ານ ຊໍ້,
ເມືອງສັງທອງ, ນະຄອນຫຼວງວຽງຈັນ ແລະ ບ້ານ ຊຽງລ້ອມ, ເມືອງ ແລະ ແຂວງຫຼວງພະບາງ. ສໍາລັບການຄັດເລືອກຕົວແທນປະຊາຊົນ
ສປປ ລາວ ໄປຮັບລາງວັນອາຊຽນ ທີ່ມາເລເຊຍ
ໃນເດືອນພະຈິກ 2015 ກອງປະຊຸມໄດ້ເນັ້ນໜັກ ຄັດເລືອກໄດ້ຕົວແບບ ທີ່ມີຄວາມຍືນຍົງ ແລະ
ສາມາດຖອດຖອນບົດຮຽນ ໃຫ້ບັນດາຕົວແບບອື່ນໃນວົງກວ້າງ.
1. ຕໍ່ຮ່າງກົດໝາຍ ວ່າດ້ວຍການຕ້ານການຄ້າມະນຸດ. ກອງປະຊຸມເຫັນດີຮັບຮອງທາງດ້ານຫຼັກການ ແລະ
ໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງເອົາໃຈໃສ່ປັບປຸງ ຕາມການປະກອບຄໍາເຫັນຂອງສະມາຊິກລັດຖະ
ບານ ເປັນຕົ້ນ: ການກໍານົດບັນດາຄໍາສັບ, ບາງມາດຕາ ຕ້ອງມີຄວາມຈະແຈ້ງ,
ຖືກຕ້ອງ, ຊັດເຈນ ແລະ ຮັດກຸມ ເພື່ອບໍ່ໃຫ້ເກີດຊ່ອງຫວ່າງໃນເວລານໍາໃຊ້.
ສໍາຄັນແມ່ນຕ້ອງໃຫ້ສອດຄ່ອງກັບກົດໝາຍ ຫຼື ສົນທິສັນຍາຂອງສາກົນ ທີ່ ສປປ ລາວ
ເປັນພາຄີ.
2. ກອງປະຊຸມ
ໄດ້ປະກອບຄໍາຄິດຄໍາເຫັນດ້ວຍຄວາມຮັບຜິດຊອບສູງ ແລະ ຮັບຮອງຕໍ່ຮ່າງດໍາລັດ
ວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ
ແຜນງົບປະມານແຫ່ງລັດ ສົກປີ 2015-2016 ຕໍ່ບັນຫາດັ່ງກ່າວ ກອງປະຊຸມ
ໄດ້ຊີ້ນໍາໃຫ້ພາກສ່ວນກ່ຽວຂ້ອງ ນໍາໄປປັບປຸງຕື່ມ ຕາມການປະກອບຄໍາເຫັນ ຂອງສະມາຊິກລັດຖະບານ
ເປັນຕົ້ນ: ເອົາໃຈໃສ່ຄຸ້ມຄອງການລົງທຶນຂອງລັດ ເພື່ອໃຫ້ມີປະສິດທິຜົນ, ຄຸ້ມຄອງ,
ກວດກາລາຍຮັບ-ລາຍຈ່າຍ ໃຫ້ເຂັ້ມງວດ ທັງເອົາໃຈໃສ່ແກ້ໄຂໜີ້ສິນໃຫ້ຫຼຸດລົງ ແລະ
ບໍ່ໃຫ້ສ້າງໜີ້ ໃໝ່ ຫຼື ໂຄງການນອກແຜນ, ພ້ອມນັ້ນ ໃຫ້ເອົາໃຈໃສ່
ເກັບລາຍຮັບເຂົ້າງົບປະມານ ຜ່ານລະບົບທັນສະໄໝ ໃຫ້ນັບມື້ນັບເພີ່ມຂຶ້ນ
ອັນນີ້ເພື່ອຫຼີກລ້ຽງບັນຫາຫຍໍ້ທໍ້ ໃນຖັນແຖວພະນັກງານ ແລະ ໃຫ້ງົບປະມານບໍ່ໃຫ້ຮົ່ວໄຫຼ.
ໃນຕອນທ້າຍກອງປະຊຸມ ທ່ານນາຍົກລັດຖະມົນຕີ ໄດ້ຊີ້ນໍາໃຫ້ສະມາຊິກລັດຖະບານ
ນໍາເອົາເນື້ອໃນຈິດໃຈທີ່ໄດ້ຕົກລົງເປັນເອກະພາບ ໃນກອງປະຊຸມຄັ້ງນີ້
ລວມທັງ ບັນດາວຽກງານທີ່ເປັນຈຸດສຸມໃນເດືອນກັນຍາ2015 ໄປຈັດຕັ້ງຜັນຂະຫຍາຍ
ແລະ ຈັດຕັ້ງປະຕິບັດດ້ວຍຄວາມຮັບຜິດຊອບສູງ ດັ່ງນີ້:
1).ໃນທ້າຍປີ 2015 ນີ້ ຈະມີຫຼາຍກິດຈະກຳທີ່ສຳຄັນ ເປັນຕົ້ນແມ່ນ ເພື່ອກະກຽມໃຫ້ແກ່ການສະເຫຼີມສະຫຼອງວັນສະຖາ
ປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 40 ປີ ສະນັ້ນຈະມີການກະກຽມສວນສະໜາມ, ການວາງສະແດງສິນຄ້າ, , ການປະດັບປະດາຕົວເມືອງ ແລະ ການສ້າງຂະບວນການ ໃນວຽກງານດ້ານຕ່າງໆ ເພື່ອຂ່ຳນັບຮັບຕ້ອນວັນສຳຄັນດັ່ງກ່າວ. ຊຶ່ງນອກຈາກນັ້ນ, ກໍຍັງມີກອງປະຊຸມໃຫຍ່ຂອງບັນດາກະຊວງ, ແຂວງພາກສ່ວນກ່ຽວຂ້ອງ ຕ້ອງກະກຽມໃຫ້ດີ
ຊຶ່ງບັນຫາດັ່ງກ່າວນີ້ພວກຄົນບໍ່ດີກໍມີແຜນມ້າງເພທຳລາຍ, ຈະເຮັດດ້ວຍທາງກົງ ຫຼື ທາງອ້ອມກໍຕາມ
ຖ້າຫາກມັນເກີດແນ່ນອນກໍ່ມີອັນເສັຽຫາຍ. ສະນັ້ນ, ຈຶ່ງສະເໜີໃຫ້ເອົາໃຈໃສ່ລົງເລິກຊີ້ນຳຕື່ມກ່ຽວກັບ ວຽກງານປ້ອງກັນຊາດ-ປ້ອງກັນຄວາມສະຫງົບ ຕ້ອງເຮັດໃຫ້ດີກວ່າເກົ່າ
ເພື່ອຮັບປະກັນບໍ່ໃຫ້ເຫດການບໍ່ດີເກີດຂຶ້ນ; ເອົາໃຈໃສ່ສຶກສາອົບຮົມການເມືອງແນວຄິດ,
ມີຄວາມຮັບຜິດຊອບ, ການປະຕິບັດລະບຽບວິໃນ, ຂອງພະນັກງານ, ທະຫານ, ຕຳຫຼວດ ແລະ ປະຊາຊົນເຮົາຕໍ່ວຽກງານດັ່ງກ່າວ,
ພ້ອມນັ້ນ ຕ້ອງມີມາດຕະການຕອບໂຕ້ຢ່າງທັນການ ຕໍ່ກຸ່ມຄົນບໍ່ດີທີ່ໂຄສະນາໃສ່ຮ້າຍປ້າຍສີ ການນຳພັກ-ລັດເຮົາ ແລະ ບັນຫາອື່ນໆ ໂດຍມີການຊີ້ແຈງໃຫ້ປະຊາຊົນໄດ້ຮັບຮູ້ ແລະ
ເຂົ້າໃຈຢ່າງຖືກຕ້ອງ.
- ສໍາລັບການມອບ-ຮັບໜ້າທີ່ການນໍາ ຢູ່ຂັ້ນສູນກາງ ແລະ
ທ້ອງຖິ່ນ ພາຍຫຼັງທີ່ສະພາແຫ່ງຊາດໄດ້ຮັບຮອງແລ້ວນັ້ນ
ແມ່ນໃຫ້ຮີບຮ້ອນຈັດຕັ້ງປະຕິບັດໂດຍໄວ ເພື່ອບໍ່ໃຫ້ເກີດຊ່ອງວ່າງ.
2). ເອົາໃຈໃສ່ຈັດເກັບລາຍຮັບເຂົ້າງົບປະມານ
ໂດຍມີມາດຕະການ ແລະ ຈຸດສຸມໃນການຈັດເກັບລາຍຮັບ ເພື່ອໃຫ້ບັນລຸໄດ້ຕາມລະດັບຄາດໝາຍ.
2).ໃຫ້ກະຊວງອຸດສາຫະກຳ ແລະ ການຄ້າ, ກະຊວງການຕ່າງປະເທດ ແລະ ພາກສ່ວນກ່ຽວຂ້ອງ
ອື່ນໆສືບຕໍ່ເອົາໃຈໃສ່ກະກຽມຄວາມພ້ອມດ້ານຕ່າງໆ ໃນການເຂົ້າເປັນສະມາຊິກປະຊາຄົມເສດຖະກິດອາຊຽນໃນທ້າຍປີນີ້, ເພາະວ່າເວລາກໍຍັງບໍ່ພໍເທົ່າໃດເດືອນຂ້າງໜ້ານີ້. ພ້ອມນັ້ນ ແມ່ນສືບຕໍ່ກະກຽມການເຄື່ອນໄຫວຕ່າງປະເທດຂອງການນຳພັກ-ລັດເຮົາ ຕາມແຜນການ ກໍ່ຄື ການຕ້ອນຮັບການມາຢ້ຽມຢາມ ແລະ ເຮັດວຽກຂອງແຂກຕ່າງປະເທດຢູ່ ສປປ ລາວ.
3).ໃຫ້ກະຊວງກະສິກຳ ແລະ ປ່າໄມ້ ສືບຕໍ່ແກ້ໄຂບັນຫາຕັກແຕນ
ແລະ ໜູຂີ ທີ່ລະບາດຢູ່ບາງແຂວງ, ຊຶ່ງຜ່ານມາກໍເຮັດໄດ້ດີແລ້ວ ແຕ່ສະເໜີໃຫ້ເອົາໃຈໃສ່ຕື່ມ.
- ສະເໜີກະຊວງສາທາລະນະສຸກສືບຕໍ່ຕິດຕາມເຝົ້າລະວັງ ແລະ ແກ້ໄຂພະຍາດຕິດຕໍ່ຕ່າງໆທີ່ເກີດຂຶ້ນໃນລະດູການເພື່ອບໍ່ໃຫ້ພະຍາດດັ່ງກ່າວແຜ່ລະບາດ ແລະ ສ້າງຜົນກະທົບຕໍ່ການດຳລົງຊີວິດຂອງປະຊາຊົນ, ພົນລະເມືອງ ເປັນຕົ້ນພະຍາດໄຂ້ຍຸງລາຍ, ຄໍຕີບ, ໄຂ້ທໍລະພິດ ແລະ ອື່ນໆ ໃຫ້ເອົາໃຈໃສ່ແກ້ໄຂຢ່າງມີແຜນການຄັກແນ່.
- ສະເໜີໃຫ້ບັນດາກະຊວງໂດຍສະເພາະກະຊວງໂຍທາທິການ
ແລະ ຂົນສົ່ງກວດກາ ແລະ ແກ້ໄຂບັນຫາເສັ້ນ ທາງທີ່ຈໍາເປັນທີ່ເປ່ເພເສັຽຫາຍໃນຊ່ວງລະດູຝົນຕ້ອງໄດ້ສ້ອມແປງກ່ອນ
ເພື່ອໃຫ້ສາມາດນຳໃຊ້ໄດ້ເປັນປົກກະຕິ. ພ້ອມກັນນັ້ນກໍໃຫ້ກະຊວງຊັບພະຍາກອນທຳມະຊາດ
ແລະ ສິ່ງແວດລ້ອມຕິດຕາມເບິ່ງກ່ຽວກັບສະພາບດິນຟ້າອາກາດເຫັນວ່າຊ່ວງນີ້ບໍ່ມີຝົນແຕ່ໃນເດືອນກັນຍາອາດຈະມີຝົນທ້າຍລະດູ. ສະນັ້ນ, ຕ້ອງເອົາໃຈໃສ່ແຈ້ງເຕືອນໃຫ້ປະຊາຊົນຮັບຮູ້ເປັນປົກກະຕິ ແລະ ມີແຜນກະກຽມຕ້ານແລ້ງຕ້ານຖ້ວມຕື່ມ.
No comments:
Post a Comment