ວັນທີ 8 ກັນຍານີ້,
ກົມການສຶກສານອກໂຮງຮຽນ, ກະຊວງສຶກສາທິການ ແລະ ກິລາ,
ໄດ້ຈັດງານສະເຫລີມສະຫລອງວັນສາກົນແຫ່ງການລົບລ້າງຄວາມບໍ່ຮູ້ໜັງສື ຄົບຮອບ 50 ປີ
(8/9/1965-8/9/2015), ຂຶ້ນທີ່ນະຄອນຫລວງວຽງຈັນ, ໂດຍການໃຫ້ກຽດເຂົ້າຮ່ວມຂອງທ່ານ ລີຕູ້ ບົວປາວ ລັດຖະມົນຕີຊ່ວຍວ່າການກະຊວງສຶກສາທິການ ແລະ ກິລາ,
ມີພະນັກງານກະຊວງສຶກສາເຂົ້າຮ່ວມເປັນຈຳນວນຫລາຍ.
ງານດັ່ງກ່າວຈັດຂຶ້ນ ເພື່ອເປັນການສ້າງຈິດສຳນຶກ ແລະ ປຸກລະດົມໃຫ້ປະຊາຊົນບັນດາເຜົ່າ ແລະ ທຸກພາກ ສ່ວນທີ່ກ່ຽວຂ້ອງເອົາໃຈໃສ່ສະໜັບສະໜູນວຽກງານການສຶກສາກໍຄືການລົບລ້າງຄວາມບໍ່ຮູ້ໜັງສື
ແລະ ບຳລຸງຈົບຊັ້ນປະຖົມໃນຂອບເຂດທົ່ວປະເທດ, ເຊິ່ງງານດັ່ງກ່າວຍັງໄດ້ຈັດກິດຈະກຳຕ່າງໆເຊັ່ນ: ຍ່າງເພື່ອສຸຂະພາບ, ແຂ່ງ
ຂັນກິລາ ແລະ ອື່ນໆດ້ວຍບັນຍາກາດຟົດຟື້ນ.
ທ່ານ ລີຕູ້ ບົວປາວ ລັດຖະມົນຕີຊ່ວຍວ່າການກະຊວງດັ່ງກ່າວ ໄດ້ມີຄຳເຫັນໃນພິທີວ່າ: ປັດຈຸບັນ ໃນໂລກນີ້ ຍັງມີຜູ້ໃຫຍ່ ຈຳນວນ 781 ລ້ານຄົນ
ແລະ ຊາວໜຸ່ມ 126 ລ້ານຄົນ ຍັງກືກໜັງສືຢູ່, ໃນນັ້ນ ຢູ່ສປປ ລາວ ພວກເຮົາ ໄດ້ສຳເລັດການລົບລ້າງຄວາມບໍ່ຮູ້ໜັງສື ແລະ ບຳລຸງຈົບຊັ້ນປະຖົມທົ່ວປະເທດ
ໂດຍພື້ນຖານ, ມັນເປັນຜົນສຳເລັດອັນຍິ່ງໃຫຍ່ ດັ່ງນັ້ນໃນໂອກາດນີ້ ຈຶ່ງຮຽກຮ້ອງມາຍັງໃຫ້ທຸກພາກສ່ວນໃນສັງຄົມ ຈົ່ງສືບຕໍ່ໃຫ້ການຮ່ວມມືໃນການຈັດຕັ້ງປະຕິບັດເປົ້າໝາຍການສຶກສາເພື່ອທຸກຄົນ
ໃຫ້ມີຄຸນນະພາບ ເພື່ອຮັບປະກັນບໍ່ໃຫ້ກຸ່ມຄົນເຫລົ່ານັ້ນ
ມີໂອກາດກັບມາກືກໜັງສືຄືນອີກ,
ສຳລັບຜູ້ທີ່ຮຽນຈົບຊັ້ນປະຖົມບຳລຸງແລ້ວ ກໍໃຫ້ສືບຕໍ່ຮຽນຊັ້ນມັດທະຍົມຕົ້ນ ແລະ ປາຍ, ພ້ອມດຳເນີນການຮຽນວິຊາຊີບຂັ້ນພື້ນຖານໃຫ້ທົ່ວເຖິງ ແລະ ກວ້າງຂວາງ ເພື່ອ ທຸກຄົນໄດ້ມີອາຊີບ
ແລະ ພັດທະນາຄຸນນະພາບຊີວິດ ແລະ ຄອບຄົວຂອງຕົນດີຂຶ້ນເປັນລຳດັບ.
No comments:
Post a Comment