laophatthananewspaper: ແຂວງໄຊຍະບູລີ ສາມາດເກັບລາຍຮັບເຂົ້າງົບປະມານລື່ນຄາດໝາຍ

ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ໄດ້ລາຍງານຕໍ່ກອງປະຊຸມເປີດກ້ວາງລັດຖະບານ ທີ່ໄຂຂຶ້ນໃນລະຫວ່າງວັນທີ 23-25 ກັນຍານີ້, ໃນນະຄອນຫລວງວຽງຈັນ ວ່າ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນສົກປີ 2014-2015, ແຂວງຕົນໄດ້ສຸມໃສ່ຫັນລົງກໍ່ສ້າງຮາກຖານການເມືອງຢູ່ຊົນນະບົດ, ແກ້ໄຂຄວາມທຸກຍາກ ແລະ ຈັດສັນອາຊີບຄົງທີ່ໃຫ້ປະຊາຊົນ, ຕິດພັນກັບການຈັດຕັ້ງປະຕິບັດທິດນຳສາມສ້າງຢ່າງເປັນຂະບວນ. ໃນໄລຍະ 1 ປີຜ່ານມາ, ທົ່ວແຂວງແມ່ນມີຄວາມສະຫງົບ, ປອດໄພ, ສັງຄົມມີຄວາມເປັນລະບຽບຮຽບຮ້ອຍ ເຖິງວ່າບາງໄລຍະໄດ້ພົບກັບຄວາມຫຍຸ້ງຍາກທາງດ້ານງົບປະມານ ແລະ ການເງິນ, ແຕ່ຄະນະພັກ, ອຳນາດການປົກຄອງທຸກຂັ້ນໄດ້ເອົາໃຈໃສ່ປຸກລະດົມ ແລະ ຊຸກຍູ້ການຜະລິດເປັນສິນຄ້າຂອງປະຊາຊົນ, ບັນດາຫົວໜ່ວຍທຸລະກິດຕ່າງໆຢ່າງຈິງຈັງ, ຈຶ່ງເຮັດໃຫ້ເສດຖະກິດຂະຫຍາຍຕົວຕໍ່ເນື່ອງໃນລະດັບ 9,3%, ລວມຍອດຜະລິດຕະພັນພາຍໃນບັນລຸໄດ້ 7.295 ຕື້ກີບ, ສະເລ່ຍໃສ່ຫົວຄົນໜຶ່ງໄດ້ 19 ລ້ານກວ່າກີບ ຫລື ເທົ່າກັບ 2.413 ໂດລາສະຫະລັດ. ໃນນັ້ນ ຂະແໜງກະສິກຳ ເພີ້ມຂຶ້ນ 4,5%, ກວມເອົາ 33,5%, ອຸດສາຫະກຳ ເພີ່ມຂຶ້ນ 13%, ກວມເອົາ 33,2%, ການບໍລິການ ເພີ່ມຂຶ້ນ 13% ກວມເອົາ 3% ຂອງລວມຍອດຜະລິດຕະພັນພາຍໃນ.

ມາຮອດປັດຈຸບັນ ແຂວງໄຊຍະບູລີ ສາມາດເກັບລາຍຮັບເຂົ້າງົບປະມານລວມທັງພູດສູນກາງ ແລະ ທ້ອງຖິ່ນໄດ້ທັງໝົດ 418 ຕື້ກວ່າກີບ ເທົ່າກັບ 118,16% ຂອງແຜນການ ແລະ ເທົ່າກັບ 115,75% ຂອງແຜນດັດແກ້ທ້າຍປີ, ທຽບໃສ່ປີຜ່ານມາປະຕິບັດໄດ້ລື່ນ 46,06%, ປະຕິບັດລາຍຈ່າຍໄດ້ 420 ຕື້ກວ່າກີບ ເທົ່າກັບ 87,97% ຂອງແຜນປີ, ທຽບໃສ່ປີຜ່ານມາຫລຸດລົງ 3,1%. ພ້ອມນີ້ ການສົ່ງອອກສິນຄ້າໄດ້ທັງໝົດ 59 ລ້ານກວ່າໂດລາສະຫະລັດ ເທົ່າກັບ 100,73% ຂອງແຜນການປີ, ທຽບໃສ່ປີຜ່ານມາເຫັນວ່າລື່ນຄາດໝາຍ 15,82%. ການນຳເຂົ້າສິນຄ້າຂອງແຂວງໄດ້ທັງໝົດ 19 ລ້ານກວ່າໂດລາສະຫະລັດ ເທົ່າກັບ 47,36% ຂອງແຜນການປີ, ທຽບໃສ່ປີຜ່ານມາຫລຸດລົງ 52,63%, ເຊິ່ງສັງເກດເຫັນວ່າ ໃນສົກປີ 2014-2015 ຜ່ານມາ, ແຂວງໄຊຍະບູລີເກີນດຸນດ້ານການຄ້າ 39,31 ລ້ານໂດລາສະຫະລັດ.

ຄຽງຄູ່ກັບຜົນງານທີ່ກ່າວມາຂ້າງເທິງນັ້ນ ຍັງມີຈຸດອ່ອນ ແລະ ຂໍ້ຄົງຄ້າງບາງດ້ານທີ່ຈະຕ້ອງປັບປຸງແກ້ໄຂເປັນຕົ້ນ ສືບຕໍ່ສຶກສາອົບຮົມການເມືອງແນວຄິດ, ຄວາມຮັບຜິດຊອບຕໍ່ວຽກງານໃຫ້ສູງຂຶ້ນ, ຮີບຮ້ອນແກ້ໄຂປະກົດການຫຍໍ້ທໍ້ໃນສັງຄົມໃຫ້ທັນສະພາບ, ອຳນາດການປົກຄອງແຂວງ, ເມືອງ ແລະ ບ້ານ ຄວນເປັນເຈົ້າການໃນການແກ້ໄຂບັນຫາຕ່າງໆທີ່ເກີດຂຶ້ນຢ່າງຕັ້ງໜ້າ, ສູ້ຊົນຍາດແຍ່ງເອົາການລົງທຶນຈາກຕ່າງປະເທດໃຫ້ຫລາຍຂຶ້ນ, ເລັ່ງໃສ່ການປະຕິບັດຄາດໝາຍສະຫະສະວັດດ້ານການພັດທະນາ ໂດຍສະເພາະການສຶກສາ ໃຫ້ບັນລຸໂດຍໄວ ແລະ ເຂັ້ມງວດການຄຸ້ມຄອງລັດ, ເສດຖະກິດ, ສັງຄົມໃຫ້ສູງຂຶ້ນ.

ທ່ານເຈົ້າແຂວງໄຊຍະບູລີ ກ່າວວ່າ: ໃນສົກປີຕໍ່ໜ້າ ແຂວງໄຊຍະບູລີຈະໄດ້ສືບຕໍ່ຜັນຂະຫຍາຍໝາກຜົນທີ່ຍາດມາໄດ້ໃນໄລຍະຜ່ານມາ ໄປພ້ອມໆກັບການຍົກສູງຄຸນນະພາບການພັດທະນາຊົນນະບົດ ແລະ ແກ້ໄຂຄວາມທຸກຍາກ, ຈັດສັນພູມລຳເນົາ ແລະ ອາຊີບຄົງທີ່ໄປພ້ອມກັບການສົ່ງເສີມການຜະລິດເປັນສິນຄ້າໃນເຂດຊົນນະບົດ, ຫລຸດຜ່ອນການແຕກໂຕນກັນລະຫວ່າງຊົນນະບົດ ແລະ ຕົວເມືອງ, ສ້າງຄວາມຍຸຕິທຳໃນສັງຄົມ, ເອົາໃຈໃສ່ພັດທະນາຊັບພະຍາກອນມະນຸດ, ການສ້າງຄວາມຈະເລີນທາງດ້ານວັດຖຸ ແລະ ຄວາມສີວິໄລທາງດ້ານຈິດໃຈ, ສ້າງພະນັກງານຮາກຖານໃຫ້ມີຄຸນນະພາບ ເພື່ອປະກອບສ່ວນເຂົ້າໃນການພັດທະນາເສດຖະກິດຂອງຊາດໃຫ້ເຂັ້ມແຂງ, ສືບຕໍ່ປັບປຸງກົນໄກການຄຸ້ມຄອງບໍລິຫານລັດໃນທຸກຂັ້ນເພື່ອຍົກສູງຄວາມສັກສິດ ແລະ ປະສິດທິຜົນຂອງການຄຸ້ມຄອງເສດຖະກິດ, ພ້ອມທັງຕ້ານ ແລະ ສະກັດກັ້ນໜໍ່ແໜງປາກົດການຫຍໍ້ທໍ້ຕ່າງທີ່ຈະເກີດຂຶ້ນໃນສັງຄົມ, ຕ້ານການສໍ້ລາດບັງຫລວງ, ການຫລີ້ນກິນຟູມເຟືອຍ ແລະ ເພີ່ມທະວີການປະຢັດມັດທະຍັດຢ່າງເຂັ້ມງວດ ແລະ ສ້າງປະຖົມປັດໃຈຮອບດ້ານເພື່ອຮັບປະກັນໃຫ້ແກ່ການເຊື່ອມໂຍງທາງດ້ານຄົມມະນາຄົມຂົນສົ່ງ, ການຄ້າ ແລະ ການທ່ອງທ່ຽວ ໂດຍການສ້າງພື້ນຖານໂຄງລ່າງເສດຖະກິດໃຫ້ຄົບຊຸດ. ນອກຈາກນີ້ ກໍຕ້ອງປັບປຸງກົນໄກອານຸຍາດການລົງທຶນໃຫ້ວ່ອງໄວເພື່ອດຶງດູດນັກລົງທຶນເຂົ້າມາພັດທະນາໃນທຸກຂົງເຂດອີກດ້ວຍ.