ກອງປະຊຸມໃຫຍ່ຄັ້ງທີ III ອົງຄະນະພັກກະຊວງການຕ່າງປະເທດ ໄດ້ປິດລົງດ້ວຍຜົນສຳເລັດຢ່າງສະຫງ່າງາມ ພາຍຫລັງດຳເນີນມາເປັນເວລາ 1 ວັນເຄິ່ງ, ໂດຍການໃຫ້ກຽດເຂົ້າຮ່ວມຂອງສະຫາຍ ຈູມມາລີ ໄຊຍະສອນ ເລຂາທິ ການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ,
ສະຫາຍ ທອງລຸນ ສີສຸລິດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ພ້ອມດ້ວຍສະມາ ຊິກພັກພາຍໃນກະຊວງດັ່ງກ່າວເຂົ້າຮ່ວມຢ່າງພ້ອມພຽງ.
ກອງປະຊຸມ ໄດ້ພ້ອມກັນຕີລາຄາຢ່າງເລິກເຊິ່ງຮອບດ້ານ ແລະ ຮັບຮູ້ເປັນເອກກະພາບຢ່າງສົມບູນຕໍ່ການເຄື່ອນໄຫວຊີ້ນຳ-ນຳພາຂອງອົງຄະນະພັກກະຊວງຂອງຕົນຕະຫລອດໄລຍະ 5 ປີຜ່ານມາ, ເຫັນໄດ້ຈຸດດີ ເພື່ອສືບຕໍ່ເສີມຂະຫຍາຍ ແລະ ຈຸດອ່ອນຂໍ້ຄົງຄ້າງທີ່ຈະໄດ້ປັບປຸງແກ້ໄຂ, ຖອດຖອນບົດຮຽນທີ່ເປັນຜົນປະໂຫຍດ ໃຫ້ແກ່ການເຄື່ອນໄຫວນຳພາຂອງຄະນະພັກຕໍ່ໄປ ພ້ອມນີ້ກອງປະຊຸມຍັງໄດ້ ເປັນເອກກະພາບຮັບຮອງເອົາທິດທາງ
ແຜນການ ແລະ ຄາດໝາຍສູ້ຊົນ ໃນ 5 ປີຕໍ່ໜ້າ (2016-2020) ແລະ
ໄດ້ປ່ອນບັດຄັດເລືອກເອົາຄະນະບໍລິຫານງານພັກຊຸດໃໝ່ ຈຳນວນ 15 ສະຫາຍ, ຍິງ 3 ສະຫາຍ, ຈາກຜູ້ສະໝັກເລືອກຕັ້ງ 19 ສະຫາຍ ແລະ ໄດ້ເປັນເອກກະພາບກັນເລືອກເອົາ ສະຫາຍ
ສະເຫລີມໄຊ ກົມມະສິດ ເປັນເລຂາຄະນະພັກ, ສະຫາຍ ແສງເພັດ ຮຸ່ງບຸນຍວງ ເປັນຮອງເລຂາຄະນະພັກ, ສະຫາຍ ນາງຄຳເພົາ ເອີນທະວັນ ເປັນປະທານກວດກາພັກ, ສະຫາຍ ນາງ ວຽງສະຫວັນ ສີປະເສີດ ແລະ ສະຫາຍ ສົງການ
ຫລວງມຸນິນທອນ ເປັນຮອງປະທານກວດກາພັກ, ພ້ອມນີ້ ກອງປະຊຸມ ຍັງໄດ້ປ່ອນບັດເອົາຜູ້ແທນເຂົ້າຮ່ວມກອງປະຊຸມໃຫຍ່ຄັ້ງທີ
X ຂອງພັກ ຈຳນວນ 5 ສະຫາຍ ແລະ ສຳຮອງ
2 ສະຫາຍ.
ໃນໂອກາດອັນສະຫງ່າລາສີນີ້, ສະຫາຍ ເລຂາທິການໃຫຍ່
ຈູມມາລີ ໄຊຍະສອນ, ໄດ້ໃຫ້ກຽດໂອລົ້ມ ແລະ ໃຫ້ທິດເຍືອງທາງ, ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນຳ-ນຳພາຂອງຄະນະພັກຊຸດເກົ່າ ແລະ ໄດ້ພ້ອມກັນຈັດຕັ້ງປະຕິບັດໜ້າທີ່ການເມືອງກໍຄືການປະຕິບັດໜ້າທີ່ການທູດຂອງຕົນ ໄດ້ຮັບຜົນສຳເລັດ ຕະຫລອດໄລຍະ
5 ປີ ຜ່ານມາ,
ຄຽງຄູ່ກັນ ສະຫາຍເລຂາທິການໃຫຍ່
ຍັງໄດ້ໃຫ້ທິດຊີ້ນຳຄະນະພັກຊຸດໃໝ່ ຈົ່ງອອກແຮງແຂງຂັນ ແລະ ເອົາໃຈໃສ່ດ້ວຍຄວາມຮັບຜິດຊອບ ເພື່ອເສີມຂະຫຍາຍຜົນສຳເລັດ ແລະ ແກ້ໄຂບັນດາຂໍ້ຄົງຄ້າງຕ່າງໆໃນຜ່ານມາ ເພື່ອເຮັດໃຫ້ການຊີ້ນຳໆພາໃນຕໍ່ໜ້າດີຂຶ້ນກວ່າເກົ່າ, ພ້ອມທັງຈັດຕັ້ງປະຕິບັດບັນດາທິດທາງ ແລະ ແຜນການທີ່ວາງອອກໃຫ້ມີຜົນສຳເລັດສູງ, ເອົາໃຈໃສ່ເຊີດຊູພາລະບົດບາດ ແລະ ຄວາມສາມາດໃນການເຄື່ອນໄຫວວຽກງານວິຊາສະເພາະຂອງຂະແໜງການຕ່າງປະເທດໃຫ້ສູງຂຶ້ນ ໂດຍຍຶດໝັ້ນໃນແນວທາງນະໂຍບາຍການຕ່າງປະເທດຂອງພັກໄປຄຽງຄູ່ກັບການປັບປຸງໃຫ້ສອດຄ່ອງກັບສະພາບແຕ່ລະໄລຍະ, ເພີ່ມທະວີວຽກງານການຄົ້ນ ຄ້ວາ-ວິໄຈສະພາບການສາກົນ ແລະ ວາງແຜນຍຸດທະສາດ ເພື່ອເປັນເສນາທິການດ້ານການຕ່າງປະເທດໃຫ້ພັກ-ລັດ ຢ່າງມີປະສິດທິຜົນ, ເປັນເຈົ້າການໃນການເຄື່ອນໄຫວການຕ່າງປະເທດໃຫ້ລວມສູນ, ເປັນເອກກະພາບ ແລະ ຜ່ານປະຕູດຽວ ສົມທົບກັບວຽກງານປ້ອງກັນຊາດ-ປ້ອງກັນຄວາມສະຫງົບ ຢ່າງກົມກຽວ, ເພີ່ມທະວີການເຄື່ອນໄຫວການທູດດ້ານເສດຖະກິດຕາມທິດສັງຄົມນິຍົມ, ແນໃສ່ເສີມຂະຫຍາຍພາລະບົດບາດ ແລະ ອິດທິພົນຂອງພັກ ແລະ ລັດເຮົາໃຫ້ສູງເດັ່ນຂຶ້ນ ໃນພາກພື້ນ ແລະ ສາກົນຢ່າງບໍ່ຢຸດຢັ້ງ, ສືບຕໍ່ຂົນຂວາຍຍາດແຍ່ງການຊ່ວຍເຫລືອຈາກຕ່າງປະເທດຕ່າງໆ, ອົງການຈັດຕັ້ງ ແລະ ສະຖາບັນການເງິນສາກົນ, ສືບຕໍ່ພົວພັນກັບຄົນເຊື້ອຊາດລາວຢູ່ຕ່າງປະເທດ ເພື່ອອ່ວຍໜ້າມາສະໜັບສະໜູນພາລະກິດປົກປັກຮັກສາ ແລະ ພັດທະນາປະເທດຊາດ, ເພີ່ມທະວີການນຳໃຊ້ເຕັກໂນໂລຍີ ຂໍ້ມູນຂ່າວສານເຂົ້າຮັບໃຊ້ວຽກງານຕ່າງປະເທດ ເພື່ອເຜີຍແຜ່ໂຄສະນາແນວທາງນະໂຍບາຍຂອງພັກ ແລະ ຜົນສຳເລັດໃນການພັດທະນາລາວເຮົາ ເພື່ອກະກຽມການເຂົ້າເປັນປະຊາຄົມເສດຖະກິດອາຊຽນໃນທ້າຍປີ 2015 ແລະ ກຽມພ້ອມເປັນປະທານອາຊຽນ ໃນປີ
2016 ໃຫ້ປະສົບຜົນສຳເລັດຢ່າງຈົບງາມ.
No comments:
Post a Comment