ໃນວັນທີ 23 ຕຸລານີ້, ຢູ່ປະຕູໄຊ ນະຄອນຫລວງວຽງຈັນ, ໄດ້ຈັດພິທີສະເຫລີມສະຫລອງວັນສ້າງຕັ້ງອົງການສະຫະປະຊາຊາດ ຄົບຮອບ
70 ປີ
ແລະ ການຮ່ວມມືລະຫວ່າງລັດຖະບານລາວ ແລະ ອົງການສະຫະປະຊາຊາດ ຄົບຮອບ 60 ປີ ໂດຍມີທ່ານ ສະເຫລີມໄຊ ກົມມະສິດ ລັດຖະມົນຕີຊ່ວຍວ່າການກະຊວງການຕ່າງປະເທດ ແລະ ທ່ານນາງ ຄາຣິນາ ອິມໂມເນັນ ຜູ້ປະສານງານອົງການສະຫະປະຊາຊາດ ປະຈຳລາວ ພ້ອມດ້ວຍມວນຊົນ ເປັນຈຳນວນຫລາຍເພື່ອຮ່ວມເປີດໄຟສີຟ້າສ່ອງໃສອານຸສາວະລີດັ່ງກ່າວ ເປັນເວລາ 3 ວັນ, ຊຶ່ງເປັນສັນຍາລັກຂອງອົງການສະຫະປະຊາຊາດ ທີ່ສະແດງເຖິງສະຖຽນລະພາບ ແລະ ຄວາມໄວ້ເນື້ອເຊື່ອໃຈ
ແລະ ສະແດງໃຫ້ເຫັນເຖິງຄຳໝັ້ນສັນຍາໃນການພັດທະນາແບບຍືນຍົງ ດັ່ງກອງປະຊຸມໂຕະມົນລະດັບສູງ ເພື່ອປຶກສາຫາລືກ່ຽວກັບຍຸດທະສາດການພັດທະນາປະເທດ, ທີ່ຈະມີຂຶ້ນໃນທ້າຍເດືອນພະຈິກ 2015ນີ້. ນອກຈາກ ປະຕູໄຊຈະເປັນສີຟ້າແລ້ວ ຍັງມີຕຶກອາຄານ, ຂົວ ແລະ ສະຖານທີ່ສຳຄັນຕ່າງໆ ຫລາຍກວ່າ 150 ແຫ່ງ ໃນ 45 ປະເທດທົ່ວໂລກທີ່ຖືກສ່ອງແສງໃຫ້ເປັນສີຟ້າເໜືອນກັນໃນໂອກາດວັນປະຫວັດສາດສຳຄັນດັ່ງກ່າວ.
ໃນພິທີ ທ່ານລັດຖະມົນຕີຊ່ວຍ ໄດ້ເນັ້ນເຖິງການຮ່ວມມືລະຫວ່າງ ສປປ
ລາວ ແລະ ອົງການສະຫະປະຊາຊາດ, ໂດຍສະເພາະ ການດົງລົງຢູ່ຂອງອົງການສະຫະປະຊາຊາດ ໃນປະເທດຂອງພວກເຮົາ ໄດ້ຊ່ວຍນຳເອົາຜົນສຳເລັດຫລາຍດ້ານມາສູ່ປະຊາຊົນລາວ, ໃນປີ
2014 ມີເດັກນ້ອຍ 98,5% ໄດ້ເຂົ້າຮຽນໃນຊັ້ນປະຖົມ ແລະ ງົບປະມານການໃຊ້ຈ່າຍດ້ານການສຶກສາກໍເພີ່ມຂຶ້ນຢ່າງຫລວງຫລາຍ. ໃນນັ້ນ ສປປ
ລາວ ໄດ້ບັນລຸເປົ້າໝາຍການຫລຸດເຄິ່ງໜຶ່ງຂອງຈຳນວນປະຊາຊົນທີ່ມີລາຍຮັບຕ່ຳກວ່າ 1ໂດລາສະຫະລັດ/ມື້ ໃນປີ
2013 ແລະ ການປະເມີນຊີ້ໃຫ້ເຫັນວ່າອັດຕາຄວາມທຸກຍາກຢູ່ລາວໄດ້ຫລຸດລົງຈາກ 23% ໃນປີ
2013. ນອກຈາກນີ້ ລັດຖະບານລາວ ພ້ອມກັບສະມາຊິກຂອງອົງການສະຫະປະຊາຊາດ ທັງ
192 ປະເທດ ໄດ້ຮ່ວມລົງນາມຮັບຮອງເອົາ 17 ເປົ້າໝາຍຂອງການພັດທະນາແບບ ຍືນຍົງໃນກອງປະຊຸມສະມັດຊາໃຫຍ່ຂອງອົງການສະຫະປະຊາຊາດໃນເດືອນກັນຍາ 2015ນີ້, ທີ່ນິວຢອກ ສະຫະລັດອາເມລິການ, ຊຶ່ງເປົ້າໝາຍດັ່ງກ່າວແມ່ນສົ່ງເສີມສັງຄົມທີ່ສະຫງົບສຸກ ແລະ ຮອບດ້ານ,
ສ້າງວຽກເຮັດງານທຳໃຫ້ດີຂຶ້ນ ແລະ ຕ້ານສິ່ງທ້າທາຍທາງດ້ານສິ່ງແວດລ້ອມ ແລະ ຊ່ວຍຫັນປ່ຽນໂລກເຂົ້າໃນເສັ້ນທາງການພັດທະນາແບບຍືນຍົງໃນປີ
2030.
No comments:
Post a Comment