laophatthananewspaper: ບຸນອອກພັນສາ ແລະ ຊ່ວງເຮືອປີນີ້ຈະຈັດໃຫ້ມີຫຼາຍກິດຈະກຳ

ວັນທີ 23 ຕຸລານີ້ທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫຼວງວຽງຈັນ, ທັງເປັນປະທານຄະນະກຳມະການຈັດງານບຸນອອກພັນສາ ແລະ ຊ່ວງເຮືອປະຈຳປີ 2015 ໄດ້ຖະແຫຼ່ງຕໍ່ສືມວນຊົນວ່າ: ການຈັດງານບຸນອອກພັນສາ ແລະ ຊ່ວງເຮືອປີນີ້ຈະຄົບງັນໃຫຍ່ໃນຄ້ຳຄືນຂອງວັນທີ 25 - 28 ຕຸລານີ້ ແລະ ຈະຈັດໃຫ້ມີຫຼາຍກິດຈະກຳຫຼາຍກວ່າຊຸມປີຜ່ານມາເຊັ່ນ: ງານຕະຫຼາດນັດ ແລະ ວາງສະແດງສິນຄ້າ, ການສະແດງສີລະປະດົນຕີ, ການແຂ່ງ ຂັນກິລາ, ກິດຈະກຳທາງສາສະໜາ ແລະ ຮີດຄອງປະເພນີ້ອື່ນໆທີ່ເຄືຍປະຕິບັດມາໂດຍກຳເອົາເອົາວັດອົງຕື້ເປັນຫຼັກຊຶ່ງມີລາຍລະອຽດດັ່ງນີ້: ເຊົ້າວັນທີ 27 ຊຶ່ງເປັນມື້ 15 ຄ້ຳ(ມື້ອອກພັນສາ) ທຸກໆວັດຢູ່ໃນນະຄອນຫຼວງວຽງຈັນ ແລະ ທົ່ວປະເທດຈະມີການຕັກບາດຖວາຍສັງຂະທານຕາມປະເພນີ້, ຕອນແລງຈະມີການວຽນທຽນ, ລອຍເຮືອໄຟ,ລອຍກະທົງຢູ່ທີ່ທ່າວັດຈັນຕາມປະເພນີ, ສຳລັບການແຂ່ງຂັນຊ່ວງເຮືອປະເພນີແມ່ນຈະຈັດຂື້ນໃນວັນທີ 27 – 28, ຊຶ່ງຈະມີເຮືອເຂົ້າຮ່ວມແຂ່ງຂັນທັງໝົດຫຼາຍວກ່າ 50 ລຳ, ໂດຍແບ່ງເປັນ 4 ປະເພດຄື: ເຮືອປະເພນີຊາຍ ແລະ ຍິງ,

ເຮືອສູດຊາຍ ແລະ ເຮືອກິລາ 12 ສີພາຍ, ພິເສດການແຂ່ງຂັນເຮືອປີີນີ້ຊຶ່ງນອກຈາກເຮືອໃນນະຄອນຫຼວງວຽງຈັນແລ້ວຍັງໄດ້ເຊີນເອົາເຮືອຊ່ວງຈາກແຂວງຕ່າງໆເຂົ້າຮ່ວມເຊັ່ນ: ແຂວງຫຼວງພະບາງ, ວຽງຈັນ ແລະ ໄຊຍະບູລີ, ສ່ວນພາມໄຊ ການເຂ່ງຂັນແມ່ນຈະຍັບຂື້ນໄປເຂດບ້ານສີຖານເໜືອ ແລະ ບ້ານຂຸນຕາ, ເນື່ອງຈາກນ້ຳຂອງເຂດທ່າວັດຈັນນັ້ນບົກແຫ້ງລົງຫຼາຍ, ດັ່ງນັ້ນ ຈຶ່ງຂໍແຈ້ງເຖິງປະຊາຊົນຜູ້ທີ່ຈະເຂົ້າຊົມແມ່ນຈະໄດ້ຈອກລົດຢູ່ຕາມຖະໜົນຫຼວງພະບາງ ແລະ ຢ່າງເຂົ້າມາຕາມທາງຮ່ອມ, ເພື່ອຄວາມເປັນລະບຽບຮຽບຮ້ອຍ.

ປະທານຄະນະກຳມະການຈັດງານບຸນກ່າວວ່າ: ສຳລັບງານບຸນປີນີ້ນຄະນະກຳມະການໄດ້ກຳນົດລາຄາຄ່າຝາກລົດໄວ້ດັ່ງນີ້: ລົດໃຫຍ່ເກັບບໍ່ໃຫ້ເກີນ 15 ພັນກີບ/ຄັນ, ລົດຕຸກໆຈຳໂບ້ 10 ພັນກີບ/ຄັນ, ລົດຈັກ 5 ພັນກີບ/ຄັນ, ລົດຖີບ 2 ພັນກີບ/ ຄັນ, ຄ່າບໍລິການຫ້ອງນ້ຳ 2 ພັນກີບ/ຄັ້ງ, ຖ້າຜູ້ໄດ້ພົບເຫັນການລະເມີດຜ່າຜືນຂໍ້ກຳນົດນີ້ຂໍໃຫ້ແຈ້ງມາຍັງທາງຄະນະກຳມະການເພື່ອດຳເນີນມາດຕະການຕໍ່ຜູ້ລະເມີດ, ດັ່ງນັ້ນຮຽກໃຫ້ທຸກພາກສ່ວນກໍຄືທຸກຄົນທີ່ເຂົ້າຮ່ວມງານບຸນຈົ່ງມີສະຕິປະຕິບັດລະບຽບທີ່ຄະນະກຳມະການຈັດງານບຸນວາງອອກຢ່າງເຂັ້ມງວດ: ເປັນຕົ້ນແມ່ນການນຸ່ງຖືໃຫ້ສຸພາບຮຽບຮ້ອຍ, ການຂັບຂີ່ໃຫ້ມີສະຕິຄ່ອຍໄປຄ່ອຍມາ, ການຈອດລົດຖືກຕ້ອງຕາມຈຸດທີ່ກຳນົດ, ເພື່ອຄວາມເປັນລະບຽບຮຽບຮ້ອຍ, ຮັກສາໄດ້ມູນເຊື້ອວັດທະນະທຳອັນດີງາມຂອງຊາດ, ສາມາດດຶງດູດນັກທ່ອງທ່ຽວພິເສດສຳລັບມວນຊົນຜູ້ທີ່ມາຈາກຕ່າງແຂວງເວລາເຂົ້າທ່ອງຊົມບຸນຕ້ອງເບິ່ງແຍງກັນໃຫ້ດີ ແລະ ຄວນຕິດຊື່ບ້ານຢູ່ໃຫ້ແກ່ເດັກນ້ອຍ ແລະ ຜູ້ເຖົ້າເພື່ອບໍ່ໃຫ້ເກີດການພາດຫຼົງຈາກກັນດັ່ງທີ່ເຄີຍເກີດມາແລ້ວໃນງານບຸນຂອງຫຼາຍປີຜ່ານມາ.