ວັນທີ
16 ຕຸລານີ້, ກະຊວງກະສິກຳ
ແລະ ປ່າໄມ້ຮ່ວມກັບອົງການອາຫານ
ແລະ ການກະເສດປະຈຳລາວ ແລະ ນະຄອນຫຼວງວຽງຈັນຈັດພິທີສະເຫຼີມສະຫຼອງວັນອາຫານໂລກ 16 ຕຸລາ ຄົບຮອບ 35 ປີ ແລະ ວັນສ້າງຕັ້ງອົງການອາຫານ ແລະ ການກະເສດຄົບຮອບ 70 ປີຂຶ້ນທີ່ນະຄອນຫຼວງວຽງຈັນ, ໂດຍການໃຫ້ກຽດເຂົ້າຮ່ວມຂອງທ່ານ ຮອງນາຍົກລັດ ຖະມົນຕີ ສົມສະຫວາດ ເລັ່ງສະຫວັດ ເພື່ອປູກຈິດສຳນຶກໃຫ້ປວງຊົນໃນໂລກໄດ້ຮັບຮູ້ເຖິງຄວາມສຳຄັນຂອງດິນຕໍ່ກັບການຄ້ຳປະກັນສະບຽງອາຫານແບບຍືນຍົງ, ທັງເປັນການຊຸກຍູ້ສົ່ງເສີມບົດບາດຂອງຄອບຄົວຊາວນາ ແລະ ກະສິກຳຂະໜາດນ້ອຍ, ແນ່ໃສ່ຄ້ຳປະກັນສະບຽງອາຫານ ແລະ ໂພຊະນາການໄດ້ ແລະ ພ້ອມທັງເປັນການປັບປຸງຊີວິດການເປັນຢູ່ ແລະ ການຄຸ້ມຄອງຊັບພະຍາກອນທຳມະຊາດ, ປົກປ້ອງສະພາບແວດລ້ອມ ແລະ ການພັດທະນາແບບຍືນຍົງ, ການສະເຫຼີມສະຫຼອງວັນດັ່ງກ່າວປີນີ້ມີຫົວຂ້ໍວ່າ: ການປົກປ້ອງສັງຄົມ ແລະ ການກະສິກຳ, ການທັບມ້າງວົງຈອນຄວາມທຸກຍາກຢູ່ເຂດຊົນນະບົດ.
ຜູ້ຕາງໜ້າອົງການອາຫານ ແລະ ການກະເສດປະຈຳລາວໄດ້ມີຄຳປາໃສໃນພິທີວ່າ: ຜ່ານການດຳເນີນງານ 70 ປີຂອງອົງການອາຫານ ແລະ ການກະເສດ, ສາມາດເຫັນໄດ້ຄວາມຄືບໜ້າທາງດ້ານການພັດທະນາໃນຂົງເຂດກະສິກຳຢູ່ຫຼາຍປະເທດທົ່ວໂລກ ແລະ ມີ
70 ປະເທດໃນຈຳນວນທັງໝົດ 129 ປະເທດ, ແມ່ນສາມາດບັນລຸເປົ້າໝາຍທີ່ 1 ແຫ່ງການພັດທະນາສະຫັດສະຫວັດ, ໂດຍສະເພາະແມ່ນສາມາດຫຼຸດຜ່ອນອັດຕາຄວາມອຶດຫິວລົງໄດ້ກວ່າເຄິ່ງໜຶ່ງນັບແຕ່ປີ 2000 ເປັນຕົ້ນມາ
ແລະ ສປປ ລາວ
ກໍເປັນປະເທດໜຶ່ງທີ່ສາມາດບັນລຸໄດ້ຄາດໝາຍດັ່ງກ່າວ ແລະ
ເຮັດໃຫ້ ລາວໄດ້ຮັບລາງວັນຍ້ອນຍໍວ່າເປັນປະເທດທີ່ບັນລຸເປົ້າໝາຍສະຫັດສະຫວັດແຫ່ງການພັດທະນາທີ່ດີເດັ່ນໃນເດືອນມິຖຸນາ 2015 ນີ້, ຊຶ່ງໝາຍເຖິງລາວສາມາດຫຼຸດອັດຕາສ່ວນຄວາມທຸກຍາກແຫ່ງຊາດໄດ້ກວ່າເຄິ່ງໜຶ່ງ ແລະ ໄວກວ່າກຳນົດ 2 ປີ, ແຕ່ເຖິງຢ່າງໃດກໍຕາມນອກຈາກບັນຫາຄວາມທຸກຍາກແລ້ວລັດຖະມບານ ສປປ ລາວ, ຍັງຈະຕ້ອງໄດ້ຄຳນຶງເຖິງຄວາມສຳຄັນຂອງບັນຫາອື່ນໆອີກທີ່ຍັງລໍ້ຖ້າການແກ້ໄຂ ແລະ ບັນຫາຕ່າງດັ່ງກ່າວໄດ້ຖືກຈັດເຂົ້າເປັນບູລິມະສິດສຳຄັນໃນແຜນພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 8 ແລະ ຍ້ອນຄວາມເປັນຫ່ວງເປັນໄຍຕໍ່ປະຊາຊົນລາວບັນດາເຜົ່າ, ລັດຖະບານລາວຈຶ່ງມີຄວາມຄິດລິເລີ່ມໂຄງການລືບລ້າງຄວາມອິດຫິວແຫ່ງຊາດ ຂຶ້ນໃນເດືອນພຶດສະພາ 2015 ນີ້, ຊຶ່ງໂຄງການດັ່ງກ່າວຈະສາມາດກຳນົດໄດ້ບັນດາຕົວຊີ້ວັດອັນສຳຄັນຂອງການພັດທະນາແບບຍືນຍົງ.
ຜູ້ຕ່າງໜ້າອົງການອາຫານ ແລະ ການກະເສດກ່າວວ່າ: ການສະເຫຼີມສະຫຼອງວັນອາຫານໂລກ 16 ຕຸລາໃນປີນີ້ຈັດຂື້ນພາຍໃຕ້ຄຳຂັວນທີ່ວ່າ: ການປົກປ້ອງສັງຄົມ, ຖືວ່າເປັນສ່ວນສຳຄັນອັນໜຶ່ງທີ່ນອນຢູ່ໃນເປົ້າໝາຍການນຳພາປະຊາຊົນໃຫ້ຫຼຸດພົ້ນອອກຈາກຄວາມທຸກຍາກໃນປີ
2030, ສຳລັບສະຫະປະຊາຊາດແລ້ວໄດ້ນິຍາມກ່ຽວກັບຄຳຂັວນດັ່ງກ່າວວ່າ:
ການປ້ອງກັນ, ການຄຸ້ມຄອງ ແລະ ການຂ້າມຜ່ານສາຖານະການທີ່ສົ່ງຜົນກະທົບທາງດ້ານລົບຕໍ່ຄວາມຢູ່ດີກິນດີຂອງປະຊາຊົນ, ໂດຍທົ່ວໄປແລ້ວແມ່ນການປົກປ້ອງທາງສັງຄົມຍັງກວມເອົາຮອດນະໂຍບາຍສາທາລະນະ ແລະ ບັນດາແຜນງານທີ່ແນ່ໃສ່ຫຼຸດຜ່ອນຄວາມທຸກຍາກ ແລະ ຄວາມສ່ຽງຕໍ່ໄພພິບັດາຂອງປະຊາຊົນອີກດ້ວຍ.
No comments:
Post a Comment