ນະຄອນຫລວງວຽງຈັນ ອາທິດຜ່ານມາ ມີອຸປະຕິເຫດເກີດຂຶ້ນເປັນຈຳນວນຫລາຍ
ເຈົ້າໜ້າທີ່ ນະຄອນຫລວງວຽງຈັນ ໃຫ້ຮູ້ວ່າ: ໃນຕອນດຶກຂອງວັນທີ 12 ຕຸລາຜ່ານມາ, ໄດ້ເກີດອຸປະຕິເຫດລົດຈັກຕຳກັນຢ່າງຮຸນແຮງ, ຢູ່ເຂດບ້ານສົມສະຫງ່າ, ເມືອງໄຊເສດຖາ ເຮັດໃຫ້ທ້າວ ສຸກສະຫວັນ ອາຍຸ 34 ປີ, ກຳມະກອນ ຢູ່ບ້ານນາຄວາຍ ເມືອງໄຊເສດຖາ ເສຍຊີວິດຄາທີ່ ແລະ ໃນຕອນບ່າຍຂອງວັນທີ 17, ຢູ່ເຂດບ້ານໄຊສະຫວ່າງ ເມືອງໄຊທານີ, ໄດ້ເກີດມີອຸປະຕິເຫດລົດຮຸນໄດຕຳກັບລົດຈັກຢ່າງແຮງ, ເຮັດໃຫ້ນາງ ເອັງ ອາຍຸ 18 ປີ, ກຳມະກອນ ຢູ່ບ້ານໂພນຕ້ອງ ເມືອງຈັນທະບູລີ ເສຍຊີວິດ. ເຈົ້າໜ້າທີ່ ໃຫ້ຮູ້ອີກວ່າ: ນັບແຕ່ວັນທີ 12-18 ຕຸລາຜ່ານມາ, ທົ່ວນະຄອນຫລວງວຽງຈັນ ມີອຸປະຕິເຫດເກີດຂຶ້ນ 18 ກໍລະນີ, ມີພາຫະນະເປ່ເພສົມຄວນ 22 ຄັນ, ມີຜູ້ໄດ້ຮັບບາດເຈັບສາຫັດ 4 ຄົນ ແລະ ເສຍຊີວິດ 2 ຄົນ, ທຽບໃສ່ອາທິດກ່ອນ ເຫັນວ່າອຸປະຕິເຫດເກີດຂຶ້ນຫລາຍ, ແຕ່ກໍລະນີຜູ້ເສຍຊີວິດຫລຸດລົງ. ດັ່ງນັ້ນ ຈຶ່ງຮຽກຮ້ອງໃຫ້ນັກຂັບຂີ່ທຸກຄົນຈົ່ງມີສະຕິໃນການໃຊ້ລົດໃຊ້ຖະໜົນ, ປະຕິບັດກົດລະບຽບຈະລາຈອນໃຫ້ເຂັ້ມງວດ ເພື່ອສາມາດຫລີກເວັ້ນອຸປະຕິເຫດທີ່ຈະຕາມມາ, ໂດຍສະເພາະກໍເປັນໄລຍະທີ່ຈະມີວັນບຸນວັນງານຕ່າງໆ ເກີດຂຶ້ນຫລາຍ, ສົ່ງຫລີກເວັ້ນການດື່ມສິ່ງມືນເມົາອັນເປັນສາເຫດຕົ້ນຕໍທີ່ມາໃຫ້ເກີດອຸປະຕິເຫດ.
No comments:
Post a Comment