laophatthananewspaper: ລາວຈະເປັນເຈົ້າພາບຈັດກອງປະຊຸມລັດຖະມົນຕີອາຊຽນທາງດ້ານວິທະຍາສາດ ແລະ ເຕັກໂນໂລຊີອາຊຽນ

ວັນທີ 5 ຕຸລານີ້, ທ່ານ ບັນດິດ ບໍ່ວຽງຄຳ ວົງດາລາ ລັດຖະມົນຕີວ່າການກະຊວງວິທຍາສາດ ແລະ ເຕັກໂນໂລຊີໄດ້ຖະແຫຼ່ງຂ່າວຕໍ່ສື່ມວນຊົນວ່າ: ໃນເດືອນພະຈິກນີ້ລາວໄດ້ຮັບກຽດເປັນເຈົ້າພາບຈັດກອງປະຊຸມລັດຖະມົນຕີອາຊຽນທາງດ້ານວິທະ ຍາສາດ ແລະ ເຕັກໂນໂລຊີ ຄັ້ງທີ່ 16 ແລະ ກອງປະຊຸມຄະນະກຳມະການຮ່ວມມືອາຊຽນທາງດ້ານວິທະຍາສາດ ແລະ ເຕັກໂນໂລຊີຄັ້ງທີ 70 ຂຶ້ນທີ່ນະຄອນຫຼວງວຽງຈັນ, ທ່ານລັດຖະມົນຕີກ່າວວ່າ: ຄະນະກຳມະການອາຊຽນທາງດ້ານວິທະຍາສາດ ແລະ ເຕັກໂນໂລຊີໄດ້ຮັບການສ້າງຕັ້ງຂື້ນໃນປີ 1978 ແລະ ນັບຈາກນັ້ນມາບັນດາປະເທດສະມາຊຶກອາຊຽນກໍໄດ້ຜັດປ່ຽນກັນຈັດກອງປະຊຸມດັ່ງກ່າວຂຶ້ນໃນແຕ່ລະປີຕາມຮອບວຽນ, ເພື່ອທົບທວນການປະຕິບັດເປົ້າໝາຍການຮ່ວມມືທາງດ້ານວິທະຍາສາດ ແລະ ເຕັກໂນໂລຊີຂອງບັນດາປະເທດອາຊຽນໃຫ້ສອດຄ່ອງກັບການພັດ ທະນາເສດຖະກິດ-ສັງຄົມຂອງແຕ່ລະໄລຍະ ແລະ ສຳ ລັບການເປັນເຈົ້າພາບກອງປະຊຸມດັ່ງກ່າວຂອງ ສປປ ລາວ ໃນຄັ້ງນີ້ຈະປະກອບດ້ວຍກອງປະຊຸມຢູ່ໃນ 3 ລະດັບຄື: (1) ກອງປະຊຸມໃນລະດັບອານຸກຳມະການ,

ຊຶ່ງລວມມີກອງປະຊຸມຄະນະທີ່ປຶກສາທາງດ້ານແຜນປະຕິບັດງານວຽກງານອາຊຽນທາງດ້ານວິທະຍາສາດ ແລະ ເຕັກໂນໂລຊີ ແລະ ກອງປະຊຸມຄະນະທີ່ປຶກສາທາງດ້ານກອງທືນວິທະຍາສາດ. (2) ແມ່ນກອງປະຊຸມເຈົ້າໜ້າທີ່ອາວຸໂສ, ຊຶ່ງປະກອບມີກອງປະຊຸມຄະນະກຳມະການທາງດ້ານວິທະຍາສາດ ແລະ ເຕັກໂນໂລຊີຂອງບັນດາປະເທດອາຊຽນຄັ້ງທີ 70 , (3) ກອງປະຊຸມລະດັບລັດຖະມົນຕີວິທະຍາສາດ ແລະ ເຕັກໂນໂລຊີອາຊຽນຄັ້ງທີ 16, ຊຶ່ງຄາດວ່າໄລຍະຈັດກອງປະຊຸມດັ່ງກ່າວຍັງຈະມີກອງປະຊຸມສຳມະນາໃນຫົວຂໍ້ທີ່ກ່ຽວຂ້ອງຕ່າງໆ ແລະ ບັນດາລັດຖະມົນຕີວິທະຍາສາດອາຊຽນຈະໄດ້ປຶກສາຫາລືຫຼາຍບັນຫາທີ່ສຳຄັນເພື່ອຊຸກຍູ້ສົ່ງເສີມການຮ່ວມມື ແລະ ການພັດທະນາວິທະຍາສາດ ແລະ ເຕັກໂນໂລຊີ ແລະ ນະວັດຕະກຳຂອງບັນດາປະເທດອາຊຽນ, ຊຶ່ງລວມເຖິງການຮ່າງແຜນພັດທະນາທາງດ້ານດັ່ງກ່າວຂອງບັນດາປະເທດອາຊຽນໃນໄລຍະປີ 2016 - 2025, ພ້ອມກັນນັ້ນກໍຈະໄດ້ປຶກສາຫາລືຫຼາຍບັນຫາ ແລະ ສິ່ງທ້າທາຍຫຼາຍຢ່າງໃນຂົງເຂດການພັດທະຍາວຽກງານດັ່ງກ່າວຂອງອາຊຽນອີກດ້ວຍ.

ລັດຖະມົນຕີກ່າວວ່າ: ກອງປະຊຸມດັ່ງກ່າກໍເພື່ອໃຫ້ສອດຄ່ອງກັບວິໄສທັດທາງດ້ານວິທະຍາສາດຂອງອາຊຽນໃນປີ 2020 ຊຶ່ງຜູ້ນຳອາຊຽນໄດ້ຮັບຮອງເອົາໃນປີ 1997 ນັ້ນແມ່ນການລວມຕົວກັນຂອງບັນດາປະຊາຊາດອາຊີອາຄະເນໃຫ້ດຳລົງຊີວິດຢູ່ໃນສັນຕິພາບ, ສະຖຽນລະພາບ ແລະ ຄວາມຈະເລີນ, ສະນັ້ນການຮ່ວມມືກັນທາງດ້ານວິທະຍາສາດ ແລະ ເຕັກໂນໂລຊີແມ່ນແນ່ໃສ່ໃຫ້ບັນດາປະເທດອາຊຽນມີຄວາມເຂັ້ມແຂງ ແລະ ສາມາດແຂ່ງຂັ້ນທາງດ້ານວິທະຍາສາດ ແລະ ເຕັກໂນໂລຊີໃຫ້ມີຄວາມກ້າວໜ້າ, ມີຊັບພະຍາກອນມະນຸດທີ່ມີຄວາມຮູ້ຄວາມສາມາດໃນດ້ານນີ້ໃນລະດັບສູງ ແລະ ມີເຄືອຂ່າຍການພົວພັນລະ ຫວ່າງສະຖາບັນຕ່າງໆທາງດ້ານການຂະຫຍາຍຕົວຂອງວິທະຍາສາດ ແລະ ເຕັກໂນໂລຊີທີ່ເຂັ້ມແຂງ. ເພື່ອບັນລຸວິໄສທັດອາຊຽນໃນປີ 2020 ນັ້ນ, ຜູ້ນຳຂອງບັນດາປະເທດອາຊຽນໄດ້ກຳນົດທິດທາງ ແລະ ມາດຕະການຫຼາຍຢ່າງໃນການສົ່ງເສີມວິທະຍາສາດ ແລະ ເຕັກໂນໂລຊີ, ໂດຍສະເພາະແມ່ນການພັດທະນາພື້ນຖານໂຄງລ່າງທາງດ້ານເຕັກໂນໂລຊີຂໍ້ມູນຂ່າວສານ, ການຄົ້ນຄ້ວາ, ການພັດທະນາຊັບພະຍາກອນມະນຸດ ແລະ ອື່ນໆ, ຕະຫຼາດຮອດການຄຸ້ມຄອງວິທະຍາສາດ ແລະ ເຕັກໂນໂລຊີໃນອະນາຄົດອີກດ້ວຍ.