laophatthananewspaper: ຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ສຳເລັດການຢ້ຽມຢາມເຮັດວຽກທີ່ລາຊະອານາຈັກກຳປູເຈຍ

ໂດຍໄດ້ຮັບການມອບໝາຍຈາກກົມການເມືອງໃຫ້ຕາງໜ້າສູນກາງພັກ ແລະ ລັດຖະບານແຫ່ງ ສປປ ລາວ, ທ່ານ ສົມສະຫວາດ ເລັ່ງສະຫວັດ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ, ໄດ້ພາຄະນະຜູ້ແທນຂັ້ນສູງຂອງລາວ ເດີນທາງໄປຢ້ຽມຢາມ ແລະ ເຮັດວຽກຢູ່ລາຊະອານາຈັກກຳປູເຈຍໃນລະຫວ່າງວັນທີ 4-7 ຕຸລາ 2015. ຈຸດປະສົງຕົ້ນຕໍຂອງການໄປຢ້ຽມຢາມເຮັດວຽກໃນຄັ້ງນີ້, ແມ່ນເພື່ອແຈ້ງໃຫ້ລັດຖະບານລາຊະອານາຈັກກຳປູເຈຍຊາບກ່ຽວກັບແຜນການພັດທະນາໂຄງການໄຟຟ້ານ້ຳຕົກດອນສະໂຮງທີ່ແຂວງຈຳປາສັກ, ເຊິ່ງເປັນໂຄງການໜຶ່ງທີ່ມີຄວາມສຳຄັນໃນແຜນພັດທະນາພະລັງງານໄຟຟ້າຂອງລາວ ແລະ ໃນໄລຍະຢ້ຽມຢາມກຳປູເຈຍຄັ້ງນີ້, ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດໄດ້ເຂົ້າຢ້ຽມຄຳນັບສົມເດັດ ຮຸນເຊນ ນາຍົກລັດຖະມົນຕີກໍາປູເຈຍ, ໄດ້ພົບປະເຮັດວຽກກັບທ່ານ ຮໍ ນໍາຮົງ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດ ແລະ ການຮ່ວມມືສາກົນແຫ່ງລາຊາອະນາຈັກກຳປູເຈຍ, ພ້ອມກັນນັ້ນກໍໄດ້ຮັບການຮັບຕ້ອນຈາກທ່ານ ຊົກ ອັນ ຮອງນາຍົກລັດຖະ ມົນຕີກຳປູເຈຍ. ໃນໂອກາດດັ່ງກ່າວ ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ໄດ້ສະແດງຄວາມປິຕິຍິນດີ ແລະ ຄວາມຂອບໃຈຢ່າງຈິງໃຈຕໍ່ການນຳ ແລະ ເຈົ້າຫນ້າທີ່ຂັ້ນສູງຂອງກຳປູເຈຍ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ອຳນວຍຄວາມສະດວກທຸກ

ປະການແກ່ການມາຢ້ຽມຢາມເຮັດວຽກໃນຄັ້ງນີ້ ໂດຍໄດ້ສະແດງຄວາມມຸ້ງມາດປາດຖະໜາຂອງພັກ-ລັດລາວ ໃນການສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີຖານບ້ານໃກ້ເຮືອນຄຽງລະຫວ່າງປະຊາຊົນສອງຊາດລາວ-ກຳປູເຈຍ ໃຫ້ນັບມື້ນັບຂະຫຍາຍຕົວຂຶ້ນຢ່າງບໍ່ຢຸດຢັ້ງ.

ນອກຈາກນັ້ນ, ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ໄດ້ແຈ້ງໃຫ້ການນຳຂອງກຳປູເຈຍຊາບໂດຍສັງເຂບກ່ຽວກັບສະພາບເສດຖະກິດ-ສັງຄົມ ແລະ ການເມືອງຂອງລາວໃນປັດຈຸບັນກໍຄືການກຽມພ້ອມຂອງລາວ ເພື່ອກ້າວເຂົ້າສູ່ການເປັນປະຊາຄົມເສດຖະກິດອາຊຽນໃນທ້າຍປີ 2015 ນີ້ ແລະ ການເປັນປະທານອາຊຽນຂອງລາວໃນປີ 2016. ໃນໂອກາດນີ້, ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ໄດ້ຊີ້ແຈ້ງໃຫ້ຝ່າຍກຳປູເຈຍຊາບວ່າ: ເພື່ອສ້າງທຶນຮອນໃຫ້ແກ່ການພັດທະນາປະເທດ ແລະ ນຳເອົາປະເທດຊາດຫລຸດພົ້ນອອກຈາກສະຖານະພາບປະເທດດ້ອຍພັດທະນາ, ທັງມີພື້ນຖານວັດຖຸເຕັກນິກກ້າວຂຶ້ນໄປສູ່ຄວາມຈະເລີນວັດທະນານັ້ນ, ພັກ ແລະ ລັດຖະ ບານລາວໄດ້ມີນະໂຍບາຍເສີມຂະຫຍາຍທ່າແຮງດ້ານຊັບພະຍາກອນນ້ຳດ້ວຍການສ້າງເຂື່ອນໄຟຟ້າທັງຢູ່ໃນສາຂາແມ່ນ້ຳຂອງ ແລະ ໃນລຳນ້ຳຂອງ, ໂດຍການສົ່ງເສີມການລົງທຶນຈາກພາຍໃນ ແລະ ຕ່າງປະເທດດ້ວຍຮູບການຕ່າງໆພັກ ແລະ ລັດຖະບານ ໄດ້ກຳນົດຢ່າງຈະແຈ້ງວ່ານະໂຍບາຍພະລັງງານແຫ່ງຊາດຂອງ ສປປ ລາວ ແມ່ນຢຶດຖືເອົາການພັດທະນາໄຟຟ້າແບບຍືນຍົງ, ປອດໄພ,ໜັ້ນຄົງເປັນຫລັກ, ດ້ວຍການວ່າຈ້າງຜູ້ຊ່ຽວຊານລະດັບສາກົນເພື່ອດຳເນີນການສຶກສາສຳຫລວດຂໍ້ມູນດ້ານນ້ຳ ແລະ ດ້ານອື່ນໆຢ່າງຮອບຄອບ, ຖືກຫລັກວິທະຍາສາດ, ຮັບປະກັນບໍ່ໃຫ້ສົ່ງຜົນກະທົບຕໍ່ສິ່ງແວດລ້ອມ, ໂດຍສະເພາະຕໍ່ບັນດາປະເທດທີ່ຢູ່ລຽບແມ່ນ້ຳຂອງລຸ່ມຈາກປະເທດລາວ, ດ້ານໜຶ່ງອີກກໍເຄົາລົບນັບຖືິສັນຍາສະບັບປີ 1995 ວ່າດ້ວຍການພັດທະນາ ແລະ ຄຸ້ມຄອງອ່າງແມ່ນ້ຳຂອງໃຫ້ມີຄວາມຍືນຍົງ. ບົນຈິດໃຈດັ່ງກ່າວ, ພັກ ແລະ ລັດຖະບານລາວ ໄດ້ສົ່ງເສີມນັກທຸລະກິດທັງພາຍໃນ ແລະ ຕ່າງປະເທດລົງທຶນເຂົ້າໃສ່ການພັດທະນາເຂື່ອນໄຟຟ້າຂະໜາດກາງ ແລະ ຂະໜາດໃຫຍ່, ເຊິ່ງມາຮອດປະຈຸບັນມີ 11 ເຂື່ອນ ໄດ້ດຳເນີນການຜະລິດແລ້ວ ເປັນຕົ້ນ: ໂຄງການເຂື່ອນໄຟຟ້ານ້ຳເທີນ 2, ເຂື່ອນໄຟຟ້ານ້ຳເທີນຫີນບູນ, ເຊິ່ງແມ່ນໂຄງການພັດທະນາຂອງພາກເອກະຊົນຕ່າງປະເທດຮ່ວມກັບລັດຖະບານລາວທີ່ປະສົບຜົນສຳເລັດສູງ, ຊຶ່ງບໍ່ພຽງແຕ່ສາມາດຜະລິດໄຟຟ້າອອກຂາຍ,ແຕ່ຍັງເປັນຕົວແບບທີ່ດີຫລາຍດ້ານເຊິ່ງວົງຄະນາຍາດສາກົນ ແລະ ສະຖາບັນການເງິນສາກົນໄດ້ໃຫ້ການຍ້ອງຍໍວ່າເປັນຕົວແບບລະດັບໂລກໃນການສ້າງເຂື່ອນໄຟ້ຟ້ານ້ຳຕົກທີ່ເປັນມິດຕໍ່ສິ່ງແວດລ້ອມຢ່າງແທ້ຈິງ. ນອກນັ້ນ, ຍັງມີອີກ 12 ເຂື່ອນກຳລັງດຳເນີນການກໍ່ສ້າງ ແລະ ມີ 29 ໂຄງການທີ່ມີແຜນຈະກໍ່ສ້າງໃນອະນາຄົດ.ໃນບັນດາເຂື່ອນເຫລົ່ານັ້ນ ແມ່ນມີບໍລິມາດອ່າງເກັບນ້ຳທີ່ນຳໃຊ້ເຂົ້າໃນການຜະລິດໄຟຟ້າລວມກັນທັງໝົດປະມານ 43.959 ລ້ານແມັດກ້ອນ, ເຊິ່ງບໍລິມາດດັ່ງກ່າວຈະຊ່ວຍບໍລິຫານຈັດການນ້ຳໃນລະດູແລ້ງ ແລະ ລະດູຝົນ ໃຫ້ເກີດປະໂຫຍດສູງສຸດ “ຕໍ່ການຜະລິດໄຟຟ້າ ແລະ ນຳໃຊ້ເຂົ້າໃນການກະສິກຳ, ຊົນລະປະທານ, ການລ້ຽງສັດນ້ຳ, ການບໍລິໂພກ, ການເດີນເຮືອ ແລະ ອຸດສາຫະກຳຕ່າງໆ.

ເນື່ອງຈາກວ່າການສ້າງເຂື່ອນໄຟຟ້າຢູ່ສາຂາແມ່ນໍ້າຂອງກໍຈະໝົດແລ້ວ, ລັດຖະບານລາວຈຶ່ງໄດ້ມີນະໂຍບາຍສ້າງເຂື່ອນໄຟຟ້າຢູ່ຕາມລຳແມ່ນ້ຳຂອງທີ່ຢູ່ໃນເຂດແດນອະທິປະໄຕຂອງ ສປປ ລາວ,ໂດຍໄດ້ເລີ່ມສ້າງເຂື່ອນໄຟຟ້າແຫ່ງທຳອິດຢູ່ຕາມລຳແມ່ນ້ຳຂອງຈຸດໄຊຍະບູລີ, ເຊິ່ງການສ້າງເຂື່ອນດັ່ງກ່າວນີ້ແມ່ນໄດ້ດຳເນີນຕາມຂັ້ນຕອນ ແລະ ຂໍ້ແນະນຳຈາກຄະນະກຳມາທິການແມ່ນ້ຳຂອງສາກົນ MRC ແລະ ວ່າຈ້າງບໍລິສັດທີ່ປຶກສາຕ່າງປະເທດ ທີ່ມີຊື່ສຽງລະດັບໂລກ ເຊັ່ນ: POYRY, CNR. ຜ່ານການຖອດຖອນບົດຮຽນຈາກເຂື່ອນໄຟຟ້ານໍ້າຂອງຈຸດໄຊຍະບູລີ, ລັດຖະບານພວກເຮົາຈຶ່ງໄດ້ຕົກລົງໃຫ້ດຳເນີນການກໍ່ສ້າງໂຄງການເຂື່ອນໄຟຟ້ານ້ຳຕົກດອນສະໂຮງ ເຊິ່ງມີທີ່ຕັ້ງຢູ່ພາກໃຕ້ສຸດຂອງປະເທດທີ່ແຂວງຈຳປາສັກ. ໂຄງການດັ່ງກ່າວແມ່ນມີອັນຄືກັນ ແລະ ແຕກຕ່າງກັນຈາກເຂື່ອນໄຟຟ້າໄຊຍະບູລີ. ອັນທີ່ຄືກັນແມ່ນທັງສອງເຂືອນນີ້ເປັນເຂື່ອນແບບຝາຍນ້ຳລົ້ນທີ່ບໍ່ມີອ່າງເກັບນ້ຳ, ສ່ວນອັນທີ່ຕ່າງກັນແມ່ນເຂື່ອນໄຟຟ້າຢູ່ຈຸດໄຊຍະບູລີ ແມ່ນກວມເອົາລຳນ້ຳຂອງທັງສອງຝັ່ງ, ສຳລັບເຂື່ອນໄຟຟ້າດອນສະໂຮງ ແມ່ນຕັ້ງຢູ່ຮູສະໂຮງ, ເຊິ່ງເປັນຮູໜຶ່ງໃນຈຳ ນວນຫລາຍຮູນ້ຳທີ່ມີຄວາມກວ້າງສະເລຍພຽງ 35 ແມັດໃນແມ່ນ້ຳຂອງເຂດສີພັນດອນທີ່ມີຄວາມກວ້າງຫລາຍກິໂລແມັດ. ໃນນັ້ນແມ່ນໄດ້ວ່າຈ້າງບໍລິສັດທີ່ປຶກສາສາກົນທີ່ມີຊື່ສຽງລະດັບໂລກມາຊ່ວຍໃຫ້ຄຳປຶກສາ ແລະ ແກ້ໄຂບັນຫາຕ່າງໆທີ່ຍັງຄົງຄ້າງໃຫ້ຫລຸດໜ້ອຍລົງທີ່ສຸດ, ສິ່ງສຳຄັນແມ່ນພວກເຮົາໄດ້ດຳເນີນຕາມຂັ້ນຕອນຂອງສົນທິສັນຍາວ່າດ້ວຍການນຳໃຊ້ແມ່ນ້ຳຂອງປີ 1995 ຢ່າງຈິງຈັງເໝືອນກັບເວລາກະກຽມກໍ່ສ້າງເຂື່ອນໄຟຟ້າໄຊຍະບູລີ.

ໃນຕອນທ້າຍ, ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ໄດ້ຢືນຢັນຢ່າງໜຽວແໜ້ນວ່າລັດຖະບານລາວ ຈະບໍ່ກະທຳສິ່ງໃດທີ່ເປັນການເອົາປຽບ ຫລື ນຳເອົາຜົນເສຍຫາຍມາສູ່ປະເທດເພື່ອນບ້ານຢ່າງເດັດຂາດ, ພ້ອມກັນນັ້ນກໍຈະສ້າງເຂື່ອນດ້ວຍຄວາມຮັບຜິດຊອບສູງ, ຮັບປະກັນຄວາມເປີດເຜີຍ, ໂປ່ງໃສ, ຍິນດີໃຫ້ຂໍ້ມູນຂ່າວສານແກ່ບັນດາປະເທດ ແລະ ອົງການກໍຄືທຸກຄົນທີ່ສົນໃຈ ແລະ ຜ່ານການຮັບຟັງການແຈ້ງຂ່າວຈາກທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ແລ້ວ, ການນຳຂັ້ນສູງຂອງກຳປູເຈຍກໍໄດ້ມີຄຳເຫັນວ່າ:ລັດ ຖະບານລາຊາອະນາຈັກກໍາປູເຈຍບໍ່ມີຈຸດປະສົງທີ່ຈະໄປກົດໜ່ວງການພັດທະນາຂອງລາວ ແລະ ຖືວ່າການສ້າງເຂື່ອນໄຟຟ້າດ່ັງກ່າວ ແມ່ນຂຶ້ນກັບອະທິປະໄຕຂອງປະເທດລາວ, ພຽງແຕ່ສະເໜີລັດຖະບານລາວເອົາໃຈໃສ່ການພັດທະນາດັ່ງກ່າວໃຫ້ມີຄວາມຍືນຍົງ ແລະ ມີຜົນກະທົບຕໍ່ສິ່ງແວດລ້ອມ ແລະ ສັງຄົມ ໃຫ້ໜ້ອຍທີ່ສຸດ, ພ້ອມກັນນັ້ນ ກໍໃຫ້ແລກ ປ່ຽນຂໍ້ມູນຂ່່າວສານເປັນປົກກະຕິລະຫວ່າງ 2 ຝ່າຍ ເພື່ອຊີ້ແຈງອະທິບາຍ ໃຫ້ສາທາລະນະຊົນມີຄວາມຮັບຮູ້ເປັນເອກະພາບກັນ.