ກະຊວງການຕ່າງປະເທດໄດ້ໃຫ້ຮູ້ອີກວ່າ: ໃນວັນທີ 29 ກັນຍາ 2015 ທີ່ນິວຢອກສະຫະລັດອາເມລິກາທ່ານ ທອງລຸນສີສຸລິດ ຮອງນາຍົກລັດຖະມົນຕີລັດຖະມົນຕີວ່າການກະຊວງການຕ່າງປະເທດແຫ່ງ ສປປ ລາວ
ໄດ້ນຳພາຄະນະຜູ້ແທນລາວເຂົ້າຮ່ວມກອງປະຊຸມລັດຖະມົນຕີການຕ່າງປະເທດອາຊຽນແບບບໍ່ເປັນທາງການ, ເຊິ່ງໄດ້ປຶກສາຫາລືກ່ຽວກັບການສະໝັກຂອງບັນດາປະເທດສະມາຊິກອາຊຽນ ໃນຕຳແໜ່ງຕ່າງໆຢູ່ບັນດາອົງກອນຂອງອົງການສະຫະປະຊາຊາດ ເພື່ອຂໍການສະໜັບສະໜູນເຊິ່ງກັນ ແລະ ກັນພ້ອມກັນນັ້ນ, ກໍໄດ້ທົບທວນຄືນໝາກຜົນຂອງກອງປະຊຸມລັດຖະມົນຕີການຕ່າງປະເທດອາຊຽນຄັ້ງທີ 48 ຈັດຂຶ້ນໃນເດືອນສິງຫາ 2015 ຜ່ານມາທີ່ກົວລາລຳເປີ, ມາເລເຊຍ ລວມທັງການກະກຽມໃຫ້ແກ່ການສ້າງປະຊາຄົມອາຊຽນ ໃນທ້າຍປີ 2015 ແລະ ການກະກຽມໃຫ້ແກ່ກອງປະຊຸມສຸດຍອດອາຊຽນຄັ້ງທີ 27 ແລະ ກອງປະຊຸມສຸດຍອດທີ່ກ່ຽວຂ້ອງຊຶ່ງຈະຈັດຂຶ້ນໃນທ້າຍເດືອນພະຈິກ 2015 ທີ່ມາເລເຊຍ. ນອກນັ້ນ, ຍັງໄດ້ປຶກສາຫາລືເພື່ອກະກຽມໃຫ້ແກ່ກອງປະຊຸມລະຫວ່າງລັດຖະມົນຕີການຕ່າງປະເທດອາຊຽນກັບເລຂາທິການໃຫຍ່ອົງການສະຫະປະຊາຊາດ ແລະ ປະທານສະມັດຊາໃຫຍ່ຄັ້ງທີ
70, ກອງປະຊຸມບໍ່ເປັນທາງການລະຫວ່າງລັດຖະມົນຕີການຕ່າງປະເທດອາຊຽນກັບລັດຖະມົນຕີການຕ່າງປະເທດສະຫະລັດອາເມລິກາ
ແລະ ກອງປະຊຸມລະຫວ່າງລັດຖະມົນຕີການຕ່າງປະເທດອາຊຍນກັບບັນດາອົງການຈັດຕັ້ງພາກພື້ນ. ກອງປະຊຸມຍັງໄດ້ອອກຖະແຫລງການຂອງລັດຖະມົນຕີການຕ່າງປະເທດອາຊຽນ ເນື່ອງໃນໂອກາດຄົບຮອບ 70 ປີ
ແຫ່ງການສ້າງຕັ້ງອົງການສະຫະປະຊາຊາດ.
ກອງປະຊຸມລັດຖະມົນຕີການຕ່າງປະເທດອາຊຽນກັບເລຂາທິການໃຫຍ່ອົງການສະຫະປະຊາຊາດ ແລະ ປະ ທານສະມັດຊາໃຫຍ່ຄັ້ງທີ 70 ໄດ້ທົບທວນຄືນການຮ່ວມມືລະຫວ່າງອາຊຽນກັບອົງການສະຫະປະຊາຊາດ ໃນໄລຍະ 1 ປີຜ່ານມາ ແລະ ໄດ້ເຫັນດີເພີ່ມທະວີການຮ່ວມມືໂດຍຮັດແໜ້ນການປະສານງານໂດຍສະເພາະກອງເລຂາອາຊຽນກັບກອງເລຂາອົງການສະຫະປະຊາຊາດ ໃນການຈັດຕັ້ງປະຕິບັດກິດຈະກຳຕ່າງໆທັງສອງຝ່າຍຍັງໄດ້ເຫັນດີໃຫ້ປຶກສາຫາລືເພື່ອຮ່າງແຜນວຽກໃນການຮ່ວມມືອາຊຽນ-ສະຫະປະຊາຊາດສຳລັບ 5 ປີຕໍ່ໜ້າຫລັງປີ 2015.
ກອງປະຊຸມຍັງໄດ້ແລກປ່ຽນທັດສະນະກ່ຽວກັບບັນຫາພາກພື້ນ ແລະ ສາກົນທີ່ພົ້ນເດັ່ນ ແລະ ມີຄວາມສົນໃຈຮ່ວມກັນ.
No comments:
Post a Comment