ກອງປະຊຸມຈັດຕັ້ງປະຕິບັດຂະບວນການແຂ່ງຂັນຮັກຊາດ, ສ້າງບ້ານພັດທະນາ ແລະ ຜັນຂະ ຫຍາຍວຽກງານ 3 ສ້າງ, ໄດ້ໄຂຂຶ້ນຢ່າງເປັນທາງການໃນລະຫວ່າງວັນທີ
25-26 ພະຈິກນີ້ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ, ໂດຍການໃຫ້ກຽດເຂົ້າຮ່ວມຂອງສະຫາຍເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດແຫ່ງ ສປປ ລາວ ຈູມມາລີ ໄຊຍະສອນ, ພ້ອມດ້ວຍບັນດາການນໍາຂັ້ນສູງພັກ-ລັດເຂົ້າຮ່ວມເປັນຈໍານວນຫລາຍ.
ໃນພິທີອັນມີຄວາມໝາຍນີ້, ສະຫາຍ ບຸນຍັງ ວໍລະຈິດ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ, ຫົວໜ້າຄະນະຊີ້ນຳເຮັດທົດລອງວຽກງານສາມສ້າງໄດ້ຂຶ້ນລາຍງານຕໍ່ກອງປະຊຸມວ່າ: ກອງປະຊຸມຄັ້ງນີ້ແມ່ນການສະຫລຸບຕີລາຄາການຈັດຕັ້ງປະຕິບັດຂະບວນແຂ່ງຂັນຮັກຊາດ ແລະ ພັດທະນາກໍຄືຂະບວນການຫັນລົງຮາກຖານສ້າງບ້ານພັດທະນາ
ແລະ ຊຸກຍູ້ວຽກງານ 3 ສ້າງເຂົ້າສູ່ລວງເລິກໃນຊຸມປີຜ່ານມາຢ່າງຮອບດ້ານ ເພື່ອສະຫລຸບຖອດຖອນບົດຮຽນໃຫ້ເປັນລະບົບ ແລະ ຈະໄດ້ມີການຍ້ອງຍໍສັນລະເສີນຜູ້ທີ່ມີຜົນງານດີເດັ່ນໃນຂະບວນດັ່ງກ່າວ ແລະ ສືບຕໍ່ເປີດຂະບວນການແຂ່ງຂັນຮັກຊາດ, ສ້າງບ້ານພັດທະນາ ແລະ ຜັນຂະຫຍາຍວຽກງານ 3 ສ້າງ ເຂົ້າສູ່ລວງເລິກໃນຊຸມປີຕໍ່ໜ້າ ເພື່ຶອສືບຕໍ່ສ້າງບາດກ້າວບຸກທະລຸທັງ 4 ດ້ານ ໃຫ້ແຂງແຮງກວ່າເກົ່າ ແລະ ປະຕິບັດໃຫ້ເປັນຈິງບັນດາຄາດໝາຍສູ້ຊົນທີ່ວາງອອກໃນກອງປະຊຸມໃຫຍ່ຄັ້ງທີ
X ຂອງພັກ. ຈາກພື້ນຖານດັ່ງກ່າວ ໄດ້ເຮັດໃຫ້ອັດຕາຄອບຄົວທຸກຍາດຫລຸດລົງເຫລືອ 6,59%, ບ້ານທຸກຍາກໄດ້ຫລຸດລົງຍັງເຫລືອ 1.736 ບ້ານກວມເອົາ 20,5%, ບ້ານພັດ ທະນາເພີ່ມຂຶ້ນເປັນ 3.557 ບ້ານ, ກວມເອົາ 42,23%, ຈຳນວນບ້ານໃຫຍ່ທີ່ມີລັກສະນະເປັນຕົວເມືອງ ແລະ ເປັນໃຈກາງບໍລິການທາງດ້ານເສດຖະກິດ-ສັງຄົມຢູ່ຊົນນະບົດມີເຖິງ
47 ບ້ານ, ໃນນີ້ໄດ້ຢັ້ງຢືນ ແລະ ຈັດພິທີປະກາດຮັບຮອງເປັນທາງການແລ້ວມີ 17 ບ້ານ, ເມືອງທຸກຍາກໄດ້ຫລຸດລົງຍັງເຫລືອ 23 ເມືອງ, ຊຶ່ງຜົນສຳເລັດດັ່ງກ່າວນັ້ນ, ໄດ້ປະກອບສ່ວນອັນສຳຄັນເຮັດໃຫ້ປະເທດສືບຕໍ່ຮັບປະກັນສະຖຽນລະພາບທາງດ້ານການເມືອງຢ່າງໜັກແໜ້ນ ແລະ ມີຄວາມສະຫງົບ-ປອດໄພ, ມີຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດແຫ່ງຊາດມີການຂະຫຍາຍຕົວຢ່າງຕໍ່ເນື່ອງ ແລະ ໝັ້ນທ່ຽງ, ການຈັດຕັ້ງປະຕິບັດບັນດາຄາດໝາຍສູ້ຊົນຂອງແຜນພັດທະນາເສດຖະກິດ-ສັງຄົມແຫ່ງຊາດ ແລະ ບັນດາເປົ້າໝາຍສະຫັດສະວັດດ້ານການພັດທະນາສາມາດບັນລຸຜົນສຳເລັດໄດ້ຕາມຄາດໝາຍທີ່ວາງໄວ້.
ໄລຍະຜ່ານມາການຈັດຕັ້ງປະຕິບັດວຽກງານ 3 ສ້າງໃນທົ່ວປະເທດ ໄດ້ສ້າງຜົນງານດີເດັ່ນຫລາຍດ້ານຄື: ເອົາໃຈໃສ່ສຶກສາອົບຮົມການເມືອງແນວຄິດໃຫ້ສະມາຊິກພັກ, ພະນັກງານ ແລະ ປະຊາຊົນທຸກຊັ້ນຄົນໄດ້ມີຄວາມຮັບຮູ້ເຂົ້າໃຈ
ແລະ ເຊື່ອໝັ້ນຕໍ່ແນວທາງນະໂຍບາຍ ແລະ ການນຳພາຂອງພັກ-ລັດຢ່າງເລິກເຊິ່ງ, ປັບປຸງລະດັບການເມືອງ-ການປົກຄອງຢູ່ຂັ້ນຮາກຖານໃຫ້ມີຄວາມກ້າວໜ້າ, ໜັກແໜ້ນເຂັ້ມແຂງສາມາດເປັນເຈົ້າການນຳພາປະຊາຊົນ ແລະ ຊັ້ນຄົນຕ່າງໆໃນການປະຕິບັດໜ້າທີ່ວຽກງານຕ່າງໆໄດ້ເປັນຢ່າງດີ, ແນວທາງນະໂຍບາຍປ້ອງກັນຊາດ, ປ້ອງກັນຄວາມສະຫງົບທົ່ວປວງຊົນຮອບດ້ານໄດ້ຮັບການຈັດຕັ້ງຜັນຂະຫຍາຍເລີ່ມແຕ່ຮາກຖານຂຶ້ນມາຢ່າງ ກວ້າງຂວາງຄື: ບ້ານປ້ອງກັນຊາດດີກວມເອົາ 83,72%, ບ້ານປ້ອງກັນຄວາມສະຫງົບດີກວມເອົາ 79,72%, ບ້ານປອດຢາເສບຕິດກວມ 68,25%, ບ້ານປອດຄະດີກວມເອົາ 74,47% ແລະ ບ້ານອື່ນໆກໍມີໂສມໜ້າການພັດທະນາດີຂຶ້ນເປັນກ້າວໆ.
No comments:
Post a Comment